An Libro Ni Mormon (An Saro Pang Tipan Ni Jesucristo)

Si Lehi naggikan ki Manasseh --- Ipinag-estorya ni Amulek an garo anghel na pagsugo na atamanon niya si Alma --- An mga pangadyeon nin mga matatanos nagkakausa sa mga katawohan na maliligtas --- An mga bakong matatanos na abogado asin mga huwes iyo an nagpamugtak nin pundasyon nin kadestrosohan kan mga katawohan.

*******

Ngonian iyo ini an mga tataramon na ipinagbalangibog ni Amulek sa mga katawohan na yaraon sa kadagaan nin Ammonihah, na nagsasabi:

2 Ako si Amulek; ako an akeng lalake ni Giddonah, na iyo an akeng lalake ni Ishmael, na iyo an mako-apo ni Aminadi; asin iyo man sanang Aminadi na interpretador kan mga isinurat sa paagi kan muro nin Diyos.

3 Asin si Aminadi iyo an saro sa mako-apo ni Nephi, na iyo an ake ni Lehi, na naghale paluwas sa kadagaan nin Jerusalem, na saro sa mako-apo ni Manasseh, na iyo an akeng lalake ni Joseph na ipinabakal na nagpasiring sa Ehipto sa paagi kan mga kamot kan saiyang mga katugangan.

4 Asin hilnga, ako saro mang tawo na bakong sadit an reputasyon sa gabos ninda na nakakamidbid sako; iyo, asin hilnga, ako igwa nin kadakul na mga kalahi asin mga amigo, asin ako nagkaigwa nin grabeng kayamanan sa paagi nin kamot kan sakuyang paghihigos.

5 Daeng pagkukulang, pagkatapos kan gabos na ini, ako dae na nakanuod nin gayo sa mga dalan nin Kagurangnan, asin kan saiyang mga misteryo asin makangangalas na kapangyarihan. Ako nagsasabi na ako mayong gayong pagkaaram kan mga bagay na ini; alagad hilnga, ako napasala, nin huli ta ako nakahiling na gayo kan saiyang mga misteryo asin kan saiyang makangangalas na kapangyarihan; iyo, magin an pag-iingat sa mga buhay kaining mga katawohan.

6 Daeng pagkukulang, ako nagpatagas kan sakuyang puso, nin huli ta ako inapudan nin kadakul na pagkakataon asin ako habong magdangog; kun kaya ako nakaaram na mapanungod sa mga bagay na ini, alagad ako habong makakanuod; kun kaya ako nagpadagos na nagrerebelde laban sa Diyos, sa karigsokan kan sakuyang puso, magin hanggan sa ikaapat na aldaw kaining ikapitong bulan, sa ikasampulong taon na nagpapamahala kan mga huwes.

7 Habang ako naglalakaw na tanganing maghiling sa sarong harani na gayong kalahi, hilnga sarong anghel nin Kagurangnan an nagpahiling sakuya asin nagsabi: Amulek, magbalik ka sa sadire mong harong, nin huli ta ika magpapakakan nin sarong propeta nin Kagurangnan; iyo, sarong banal na tawo, na sarong piniling tawo nin Diyos; nin huli ta siya nag-ayuno nin kadakul na aldaw nin huli sa mga kasalanan nin mga katawohan, asin siya sarong nagugutom, asin saimo siyang padadaguson sa saimong harong asin pakakanon siya, asin saiyang bebendisyunan ka asin an saimong harong; asin an biyaya nin Kagurangnan mapapasaimo asin sa saimong harong.

8 Asin ini nangyaring naglipas na ako nagsunod sa boses kan anghel, asin naglakaw pabalik sa sakuyang harong. Asin habang ako naglalakaw paharani sakong nanagboan an tawo na an anghel ipinagtugon sa sakuya: Saimong padadaguson sa saimong harong --- asin hilnga ini iyo man sana an tawong nagpaparataram sa saindo mapanungod sa mga bagay nin Diyos.

9 Asin an anghel nagtaram sa sakuya siya sarong banal na tawo nin huli ta sinabi sa paagi nin sarong anghel nin Diyos.

10 Asin giraray, ako nakaaram na an mga bagay kun saen siya nagpatunay na totoong gayo; nin huli ta hilnga ako nagsasabi sa saindo, na habang an Kagurangnan nabubuhay, na magin siya nagpadara kan saiyang anghel na maghimo na an mga bagay na ini maipahiling sa sakuya; asin ini saiyang ginibo habang ining Alma yaon nag-eerok sa sakuyang harong.

11 Nin huli ta hilnga, saiyang benindisyunan an sakuyang harong, saiyang benindisyunan ako, asin an sakuyang mga kababaehan, asin an sakuyang mga kaakean, asin an sakuyang ama asin an sakuyang mga kaanak; iyo, magin an bilog kong kalahi saiyang benindisyunan, asin an biyaya nin Kagurangnan napasamuya na uyon sa mga tataramon na saiyang ipinagtaram.

12 Asin ngonian, kan si Amulek nakapagtaram na sa mga tataramon na ini an mga katawohan nagpoon sa pagkangalas, nahihiling na nagkaigwa nin sobra sa sarong testigo na nagpatunay kan mga bagay kun saen sinda inakusaran, asin man kan mga bagay na paabuton pa sana, na uyon sa espiritu kan propesiya na yaraon sa sainda.

13 Daeng pagkukulang, nagkaigwa nin iba man sa pag-iriba ninda na nakaisip na maghapot sainda, na sa paagi kan saindang mga padayang mga paagi sinda mapupuwede nindang madakop sa saindang mga tataramon, na tanganing makanagbo nin testigo laban sainda, na tanganing puwedeng maipadara sinda sa saindang mga huwes na tanganing mapupuwede sindang paghuhusgaran na uyon sa ley, asin na tanganing sinda mapupuwedeng paggagaradanon o ikunkon sa prisohan, na uyon sa krimen na saindang magibong maipahiling o maipantestigo laban sainda.

14 Ngonian iyo idto an mga tawo na gustong destrosohon sinda, na mga abogado, na pinag-upahan o pinagngaranan sa paagi nin mga katawohan na iyo an magpasunod kan ley sa mga pagkakataon kan saindang mga pagdadangog, o sa mga pagdadangog kan mga krimen nin mga katawohan sa atubangan kan mga huwes.

15 Ngonian an mga abogadong ini may pagkanuod sa gabos na mga arte asin padaya kan mga katawohan; asin ini nangyari na tanganing sinda magin bihasa sa saindang trabaho.

16 Asin ini nangyaring naglipas na sinda nagpoon sa paghapot ki Amulek, na sa paggibo sainda puwedeng maibaralanggo an saiyang mga tataramon, o magkorontrahan an mga tataramon sa dapat niyang sasabihon.

17 Ngonian sinda dae pa nakaaram na si Amulek puwedeng nakaaram na gayo kan saindang paribong na mga disenyo. Pero ini nangyaring naglipas habang sinda nagpoon sa paghapot saiya, saiyang napag-isip an saindang mga kaisipan, asin siya nagsabi sa sainda: O kamo na maririgsok asin baralinsot na henerasyon, kamong mga abogado asin mga hipokrito, nin huli ta kamo an nagpapamugtak kan mga pundasyon nin diyablo; nin huli ta kamo nagpapamugtak nin mga silo asin mga patibong na tanganing pagdarakopon an mga banal nin Diyos.

18 Kamo an nagpapamugtak nin mga plano sa pagbaliktad kan mga dalan nin pagkamatanos, asin magdadara pababa nin kaanggutan nin Diyos sa ibabaw kan saindong mga payo, magin pasiring sa seguradong pagkadestroso kaining mga katawohan.

19 Iyo, marhay na si Mosiah nagsabi, na iyo an satuyang huring hade, kan saiya na kuta nang ipagbalyo an kahadean, na mayo nin saro na puwedeng ipag-atang ini, na nagin kausa kun tadaw ta ining mga katawohan dapat na pagpapamahalaan sa paagi kan saindong sadireng mga boses --- iyo, marhay na siya nagsabi na kun an panahon mag-abot na an boses kaining mga katawohan iyo an pagpili nin kadaendatahan, iyo ini, na kun an panahon mag-abot na ining mga katawohan magpatihulog pasiring sa kalapasan, sinda magigin hinog nang gayo para sa kapahamakan.

20 Asin ngonian ako nagsasabi sa saindo na marhay na gibohon nin Kagurangnan na maghusga kan saindong mga kadaendatahan; marhay na gibohon niyang magpapahayag sa mga katawohang ini, sa paagi kan boses nin saiyang mga anghel: Magsolsol kamo, magsolsol, nin huli ta an kahadean nin langit yaon na.

21 Iyo, marhay na gibohon niyang magpapahayag sa paagi kan boses nin saiyang mga anghel na: Ako magbababa sa pag-iriba kan sakuyang mga katawohan, na igwa nin katarungan asin hustisya sa sakuyang mga kamot.

22 Iyo, asin ako nagsasabi sa saindo na kun bako sa mga pangadyeon kan mga matatanos, na yaon ngonian sa kadagaan, na kamo kuta na sa ngonian pinagbibisita nin seguradong kapahamakan; pero ini bako sa paagi nin pagbaha, na arog kan nangyari sa mga aldaw ni Noah, alagad nin mangyayari sa paagi nin mga peste, asin kan espada.

23 Alagad iyo ini sa paagi kan matatanos na kamo pinagligtas; ngonian kun kaya, kun kamo magsisikwal kan mga matatanos gikan sa pag-iriba nindo kaya an Kagurangnan dae magpupugol kan saiyang kamot; pero sa saiyang makuring pagka-anggot siya mag-aabot laban saindo; kaya kamo hahampakon sa paagi nin taggutom, asin sa paagi nin peste, asin sa paagi nin espada; asin an panahon harani nang gayo laen lang na kamo magsosolsol.

24 Asin ngonian ini nangyaring naglipas na an mga katawohan nagin grabe an kaanggutan ki Amulek, asin sinda nakururahaw, na nagsasabi: An tawong ini naggibong pagbabasang-basang laban sa satuyang ley na husto, asin sa satuyang mga abugado na satuyang pinirili.

25 Alagad si Amulek pinagbingat an saiyang kamot, asin nagkurahaw nin grabe kakusog sa sainda, nag nagsasabi: O kamo na mga maririgsok asin baliskad na henerasyon, tadaw baya ta nangyari na si Satanas nagkaigwa nin grabe na gayong pamumugol sa saindong mga puso? Tadaw baya ta kamo nagpadara kan saindong mga sadire sa saiya na tanganing siya magka-igwa nin kapangyarihan na mangingibabaw sa saindo, na tanganing bulagon an saindong mga mata, na kamo dae makakasabot sa mga tataramon na pinagtataram, na uyon sa saindang katotoohan.

26 Nin huli ta hilnga, bako daw na ako nagpatotoo laban sa saindong ley? Kamo dae nakakasabot; kamo nagsasabi na ako nakapagtaram kontra sa saindong ley; alagad dae ko ngani ginibo, pero ako nakapagsabi na pabor sa saindong ley, pasiring sa saindong kondenasyon.

27 Asin ngonian hilnga, ako nagsasabi sa saindo, na an pundasyon kan kapahamakan kaining mga katawohan iyo na pinagpoonan na ipinaglalatag sa paagi kan daeng katanosan kan saindong mga abugado asin kan saindong mga huwes.

28 Asin ngonian ini nangyaring naglipas na kan si Amulek nakapagtaram kaining mga tataramon an mga katawohan nagkururahaw laban sa saiya, na nagsasabi: Ngonian kami nakakaaram na an tawong ini sarong ake nin diyablo, nin huli ta siya nagpuputik sa satuya; nin huli ta siya nagkapagtaram nin kontra sa satuyang ley. Asin ngonian siya nagsasabi na siya dae nakapagsabi laban kaini.

29 Asin giraray, siya nagbasang-basang na kontra sa satuyang mga abudado, asin sa satuyang mga huwes.

30 Asin ini nangyaring naglipas na an mga abugado nagbugtak kaini sa saindang mga puso na tanganing saindang pagpagiromdomon kan mga bagay na ini laban saiya.

31 Asin igwa nin saro sa sainda na an pangaran na iyo si Zeezrom. Ngonian siya iyo an nangenotan na akusaran si Amulek asin si Alma, siya bilang saro sa mga mas eksperto sa pag-iriba ninda, na nagkaigwa nin grabe kadakul na kaggibohan sa pag-iriba kan mga katawohan.

32 Ngonian an obheto kaining mga abugado iyo na makakua nin kapakinabangan; asin sinda nagkikita na uyon sa saindang kaipuhan.