<$BlogRSDUrl$>

Friday, February 03, 2006

ALMA TSAPTER 47 

Si Amalickiah naggagamit nin katrayduran, panggagadan, asin intriga tanganing magin hade kan mga Lamanita--- An mga Nephitang mga paribok mas grabe an karaotan asin kabangisan kesa sa mga Lamanita.

*******

Ngonian kita mabalik sa satuyang rekord ki Amalickiah asin sa sainda na nagdurulag kaiba niya pasiring sa kaparangan; nin huli ta hilnga, saiyang pinagpa-iriba an mga tawong nagharale na kaiba niya, asin nagpaduman sa kadagaan nin Nephi na pag-iriba kan mga Lamanita, asin nanggad pinagpa-init an mga Lamanita na magka-aranggot kontra sa katawohan ni Nephi, na kaya an hade kan mga Lamanita nagpadara nin sarong proklamasyon sa kabilugan nin gabos na kadagaan, sa gabos na saiyang mga katawohan, na sinda dapat na magkasararong magkatiripon kan saindang mga sadire giraray sa pakikipaggiyera kontra sa mga Nephita.
2 Asin ini nangyaring naglipas na kan an proklamasyon nakaabot sa pag-iriba ninda nagkatarakot na gayo sinda; iyo, sinda nagkatarakot na mapa-anggot an hade, asin sinda man nagkatarakot na magpasiring sa pakigiyera kontra sa mga Nephita ta baka sinda magkawararaan kan saindang mga buhay. Asin ini nanyaring naglipas na sinda harabo, o an kadakul na parte sainda nagharabo, na magsunod sa mga kasugoan kan hade.
3 Asin ngonian ini nangyaring naglipas na an hade nag-anggot nin huli kan saindang pagsarayuma; kun kaya saiyang pinagtao ki Amelickiah an pagpapamahala kan parte kan saiyang paralaban na magsurunod sa saiyang mga kasugoan, asin pinagsugo siya na magduman asin piriton sinda na mag-armas.
4 Ngonian hilnga, iyo ini an pagmamawot ni Amalickiah; nin huli ta siya bilang sarong matusuhon na tawo sa paggibo nin karaotan kun kaya siya naglatag nin plano sa saiyang puso na haleon sa trono an hade kan mga Lamanita.
5 Asin ngonian siya nagkaigwa kan pagpapamahala kaidtong mga parte kan mga Lamanita na pabor sa hade; asin siya naghanap na makua an pabor ninda na bakong masinunod-sunod; kun kaya siya nag-abante pasiring sa lugar na pinag-aapud na Onidah, nin huli ta duman an gabos na mga Lamanita nagkadurulag; nin huli ta saindang napag-araman na an paralaban maarabot, asin, naghuhuna na sinda maarabot sa pagdestroso sainda, kun kaya sinda nagdurulag pasiring sa Onidah, pasiring sa lugar kan mga armas.
6 Asin sinda nagngaran nin sarong tawo na magin sarong hade asin sarong lider na mangingibabaw sainda, nagbilog sa saindang mga isip nin sarong determinadong resolusyon na sinda dae nanggad mapasa-irarom sa sugo na makigiyera kontra sa mga Nephita.
7 Asin ini nangyaring naglipas na sinda nagkatiripon-tipon kan saindang mga sadire na magkasararo sa ibabaw kan bukid na pinag-apud na Antipas, para sa preparasyon sa pakigiyera.
8 Ngonian ini bako sa intensiyon ni Amalickiah magduman sainda sa pakigiyera kundi uyon sa mga kasugoan kan hade; pero hilnga, ini iyo an saiyang intensiyon na ganahon an pabor kan mga paralaban kan mga Lamanita, na tanganing saiyang puwedeng maipamugtak an sadire niya na magin nindang pamayo asin haleon sa trono an hade asin kuahon an kahadean.
9 Asin hilnga, ini nangyaring naglipas na saiyang pinagsugo an saiyang mga paralaban na itugdok an saindang mga tolda sa buro-bukid na haranihon sa bukid nin Antipas.
10 Asin ini nangyaring naglipas na kan banggi na siya nagpadara nin sarong sikretong mensahero paduman sa bukid Antipas, nagmamawot na an lider ninda na yaraon sa bukid, na an pangaran Lehonti, na magbaba siya sa pamitisan kan bukid, nin huli ta siya nagmamawot na makaolay siya.
11 Asin ini nangyaring naglipas na kan si Lehonti naresibe an mensahe siya habong magbaba sa pamitisan kan bukid. Asin ini nangyaring naglipas na si Amalickiah nagpadara giraray sa ikaduwang pagkakataon, pinagmamawot siyang bumaba. Asin ini nangyaring naglipas na si Lehonti habo; asin siya nagpadara giraray sa ikatulong pagkakataon.
12 Asin ini nangyaring naglipas na kan si Amalickiah nanagboan na dae niya makuang mapababa si Lehonti paluwas gikan sa bukid, siya nagpasiring paitaas sa bukid, haros harani na sa kampo ni Lehonti; asin siya nagpadara giraray sa ikaapat na pagkakataon kan saiyang mensahe ki Lehonti, nagmamawot na siya magbaba, asin saiyang darahon an saiyang mga guwardiya na kaiba niya.
13 Asin ini nangyaring naglipas na kan si Lehonti nagbaba kaiba an saiyang mga guwardiya pasiring ki Amalickiah, na tanganing si Amalickiah nagmawot saiya na magbaba kaiba an saiyang paralaban sa oras nin banggi, asin palibutan idtong mga tawohan na yaon sa saindang mga kampo na ipinagtao saiya kan hade para pamahalaan, asin ta saiyang ipapatunod sinda pasiring sa mga kamot ni Lehonti, kun siya gigibohon siyang (Amalickiah) ikaduwang lider sa kabilugan kan mga paralaban.
14 Asin ini nangyaring naglipas na si Lehonti nagbaba kaiba an saiyang mga tauhan asin pinarilibutan an mga tauhan ni Amalickiah, kaya bago pa man sinda nagmarata sa pagbuka kan aldaw sinda nagkaparilibutan na kan mga paralaban ni Lehonti.
15 Asin ini nangyaring naglipas na kan saindang namansayan na sinda nakaparilibutan na, sinda nakiolay ki Amalickiah na saiya sindang tugutan na makiiba na lang sa saindang mga katugangan, na tanganing sinda puwedeng dae magkaderestroso. Ngonian iyo ini nanggad an bagay na si Amalickiah nagmawot.
16 Asin ini nangyaring naglipas na saiyang ipinatunod an saiyang mga tauhan, na kontraryo sa mga isinugo kan hade. Ngonian iyo ini an bagay na si Amalickiah nagmawot, na tanganing saiyang mapagpangyari an saiyang mga disenyo na haleon sa trono an hade.
17 Ngonian ini iyo an sarong kustombre kan mga Lamanita, kun an saindang pinakapamayong lider nagadan, na pagngaranan an ikaduwang lider na magin an saindang pinakapamayong lider.
18 Asin ini nangyaring naglipas na si Amalickiah nagkausa na saro sa saiyang mga surugoon dapat na gibohong hiluhon nin paluhay-luhay si Lehonti, na tanganing siya magadan.
19 Ngonian, kan si Lehonti nagadan, an mga Lamanita pinagngaranan si Amalickiah na iyo an magin nindang lider asin an saindang pinakapamayong kumander.
20 Asin ini nangyaring naglipas na si Amalickiah nagmartsa kaiba an saiyang mga paralaban (nin huli ta nakua na niya an saiyang mga kamawotan) pasiring sa daga nin Nephi, paduman sa siyudad nin Nephi, na iyo an pinakapamayong siyudad.
21 Asin an hade nagluwas sa pagsabat saiya kaiba an saiyang mga guwardiya, nin huli ta saiyang pinaghuhuna-huna na si Amalickiah nakagibo na kan saiyang mga isinugo, asin ta si Amalickiah pinagtiripon nang magkasararo an grabe na gayong mga paralaban tanganing makilaban sa mga Nephita sa pakigiyera.
22 Pero hilnga, habang an hade nagluluwas pasabat saiya si Amalickiah nagsugo sa saiyang mga surugoon na mangenotan sa pagsabat sa hade. Asin sinda nagduruman asin nagduko kan saindang mga sadire sa atubangan nin hade, kumbaga pinaggalang siya nin huli kan saiyang kadakulaan.
23 Asin ini nangyaring naglipas na an hade ipinagbingat an saiyang kamot sa pagkaway sainda, na siring sa kustombre nin mga Lamanita, bilang palatandaan nin katuninongan, na an kustombreng ini saindang kinua pa gikan sa mga Nephita.
24 Asin ini nangyaring naglipas na kan siya enot na nagbuhat gikan sa daga, hilnga saiyang sinaksak an hade sa may puso; asin siya natumba sa daga.
25 Ngonian an mga surugoon kan hade nagdurulag; asin an mga surugoon ni Amalickiah makusog na nagkururahaw na nagsasabi:
26 Hilnga, an mga surugoon kan hade an nagsaksak saiya sa may puso, asin siya natumba asin sinda nadurulag; hilnga, madya asin hilngon.
27 Asin ini nangyaring naglipas na si Amalickiah nagsugo na an saiyang mga paralaban magpadagos sa pagmartsa asin hilngon kun ano na an nangyari sa hade; asin kan sinda nakaabot na sa lugar, asin nanagboan an hade na nakalagmak na sa saiyang sadireng dugo, si Amalickiah nagsagin-sagin na naanggot, asin nagsabi: Siisay man na namomoot sa hade, tugutan sindang mangenotan, asin ralamagon an saiyang mga surugoon na tanganing sinda paggagaradanon.
28 Asin ini nangyaring naglipas na sinda gabos na nagmomoot sa hade, kan saindang nadangog ining mga tataramon, nangenot asin niralamag an mga surugoon kan hade.
29 Ngonian kan an mga surugoon kan hade nahiling na may mga paralaban na naglalamag sainda, sinda nagkatarakot giraray, asin nagdurulag pasiring sa kaparangan, asin nakaabot sa kadagaan pasiring sa Zarahemla asin suminalak sa mga katawohan ni Ammon.
30 Asin an mga paralaban na nagralamag sainda nagbaralik, na bigo sa pagralamag sainda; asin kaya si Amalickiah, sa paagi kan saiyang padaya, nakua an mga puso nin mga katawohan.
31 Asin ini nangyaring naglipas sa pagkaaga siya naglaog sa siyudad nin Nephi kairiba an saiyang paralaban, asin kinua an pagsasadire kan siyudad.
32 Asin ngonian ini nangyaring naglipas na an reyna, kan saiyang nadangog na an hade ginadan --- nin huli ta si Amalickiah nagpadara nin mensahero pasiring sa reyna na nagpasabot saiya na an hade pinaggadan kan saiyang mga surugoon, na saiyang ipinalamag sinda kan saiyang mga paralaban, pero ini nabigo, asin sinda nakahimong mag-eskapo---
33 Kun kaya, kan an reyna naresibe ining mensahe siya nagpadara ki Amalickiah, pinagmamaot saiya na paligtason an mga katawohan kan siyudad; asin siya man nagmawot saiya na siya magdulok sa saiya; asin siya man nagmawot saiya na siya an dapat na magdara nin pagsasaksi sa kaiba niya na magpapatotoo manungod sa pagkagadan kan hade.
34 Asin ini nangyaring naglipas na si Amalickiah pinag-iba an iyo man sanang mga surugoon na guminadan sa hade, asin an gabos nindang kairiba, asin nagpaduman sa reyna, duman sa lugar kun saen siya nakatukaw; asin sinda gabos nagpatotoo saiya na an hade ginadan kan saiya man sanang mga surugoon; asin sinda nagsabi man: Sinda nakadulag; bako daw na iyo ini patotoo kontra sainda? Asin kaya saindang napatubod an reyna manungod sa pagkagadan kan hade.
35 Asin ini nangyaring naglipas na si Amalickiah naghagad nin pabor sa reyna, asin nagpakasal siya na magin agom niya; asin kaya sa paagi kan saiyang padaya, asin sa paagi kan tabang nin saiyang mga pambihirang surugoon, saiyang nakamtan an kahadean; iyo, siya pinagmidbid na hade sa kabilugan kan daga, magin sa bilog na mga katawohan kan mga Lamanita, na komponido kan mga Lamanita asin mga Lemuelita, asin mga Ishmaelita, asin gabos na paribok na mga Nephita, magpoon sa pagpapamahala ni Nephi sagkod sa presenteng panahon.
36 Ngonian ining mga paribok, na igwa nin kaparehong instruksiyon asin kaparehong impormasyon kan mga Nephita, iyo, bilang nakapag-adal nin kaparehong pagkanuod sa Kagurangnan, daeng pagkukulang, ini sarong makakangalas na pagsabihon, dae pa sana nahahaloy pagkatapos kan saindang pagpaparibok sinda nagin grabe an pagkamatagason asin impenitente, asin man pakawala, maraot asin mabangison kesa sa mga Lamanita--- nakikipag-inuman sa tradisyon kan mga Lamanita; nagpapadara sa kahugakan, asin gabos na manera nin kalaswaan; iyo, bilog na nakakalingaw na sa Kagurangnan nindang Diyos.

Thursday, February 02, 2006

ALMA TSAPTER 46 

Si Amalickiah nakipagkasundo na iyo an magin hade--- Si Moroni ipinagtaas an titulo nin Libertad--- Saiyang tiniripon an mga katawohan na tanganing idepensa an saindang relihiyon--- An mga tunay na paratubod pinag-apud na mga kristiyano--- Sarong katadaan ni Joseph dapat na mapreserba--- Si Amalickiah asin an mga paribok nagdurulag pasiring sa daga nin Nephi--- Sinda na habong magsuporta sa kausa nin kalayaan gagaradanon.

*******

Asin ini nangyaring naglipas na habang kadakul na habong maghinanyog sa mga tataramon ni Helaman asin kan saiyang mga katugangan an nagkasararong nagkatiripon-tipon kontra sa saindang mga katugangan.
2 Asin ngonian hilnga, sinda nagin grabeng gayo an pagka-anggot, na tanganing sinda determinadong gagaradanon sinda.
3 Ngonian an lider ninda na nagka-aranggot kontra sa saindang mga katugangan iyo an saro sa dakula asin sarong makusugon na tawo; asin an saiyang pangaran iyo si Amalickiah.
4 Asin si Amalickiah nagin mapagmawot na magin sarong hade; asin sindang mga katawohan na nagka-aranggot nagin mapagmawot man na siya an dapat na magin nindang hade; asin sinda an pinakadakulang parte sa sainda na mga hababang mga huwes nin daga, asin sinda nagmamawot nin kapangyarihan.
5 Asin sinda nagkadarara sa paagi kan mga boladas ni Amalickiah, na kun sinda magsusuporta sa saiya asin patindugon siya na magin nindang hade na tanganing saiyang gigibohon sindang mga tagapagpamahala na mangingibabaw sa mga katawohan.
6 Kaya sinda nagkadarara ni Amalickiah pasiring sa mga kariribokan, maski na ngani sa pagparabalangibog ni Helaman asin kan saiyang mga katugangan, iyo, maski na ngani sa saindang sobra na gayong pangangataman sa bilog na simbahan, nin huli ta sinda mga haralangkaw na kapadean sa bilog na simbahan.
7 Asin nagkaigwa nin kadakul na yaon sa simbahan na nagtutubod sa mga boladas na mga tataramon ni Amalickiah, kun kaya sinda nakipagsuhayan magin sa mga taga-simbahan; asin kaya an mga kalakawan kan mga katawohan nin Nephi nagin sobra nang gayong mapangahason asin makatakuton, maski na ngani sa saindang dakulaon na kapangganahan na saindang nakamtan kontra sa mga Lamanita, asin an saindang dakulaon na mga kaogmahan na saindang namatean nin huli kan saindang pagkaligtas sa paagi kan kamot nin Kagurangnan.
8 Kaya satuyang mahihiling kun gurano kadali na an mga kaakian nin mga tawo nahimong makalingaw tulos sa Kagurangnan nindang Diyos, iyo, kun gurano kadali makagibo nin kadaendatahan, asin nagin nagkadarara kan sarong maraoton.
9 Iyo, asin satuya mang mahihiling an dakulang karigsokan na an sarong maraoton na gayong tawo iyo an magkausa na mangyari sa pag-iriba kan mga kaarakian nin mga tawo.
10 Iyo, satuyang mahihiling na si Amalickiah, nin huli ta siya sarong tawo na may pambihirang kakayahan asin sarong tawo na may kadakulon na pamboboladas na mga tataramon, na tanganing saiyang magkadarara an mga puso nin kadakul na mga katawohan na gumibo nin mararaot; iyo, asin naghangad na destrosohon an simbahan nin Diyos, asin tanganing destrosohon an pundasyon nin libertad na an Diyos an nagtao sa sainda, o an bendisyon nin Dios na iyo an nagdara sa ibabaw nin lalawgon kan daga para sa mga matatanos an kamugtakan.
11 Asin ngonian ini nangyaring naglipas na kan si Moroni, na iyo an pinakapamayong kumander kan mga paralaban kan mga Nephita, nakapagdangog kaining mga kariribokan, siya nagin anggot ki Amalickiah.
12 Asin ini nangyaring naglipas na saiyang ginisi an saiyang talukbong; asin siya kuminua nin pedaso gikan kaini, asin sinuratan ini--- Sa kagiromdoman kan satuyang Diyos, kan satuyang relihiyon, kan satuyang mga kaagoman, asin kan satuyang mga kaarakian--- asin saiyang iginakot ini sa puro nin sarong kahoy.
13 Asin saiya ining iginakot sa saiyang panangga sa payo, asin sa saiyang panangga sa daghan, asin sa saiyang mga panangga, asin saiyang hinugkos an saiyang baluti sa saiyang habayan; asin saiyang dinara an kahoy, na sa puro kaini yaon an ginising talukbong, (asin saiya ining pinag-apud na titulo nin libertad) asin siya nagluhod kan saiyang sadire sa daga, asin siya nagpangadye nin makusugon sa saiyang Diyos para sa mga bendisyon nin libertad na mapasaiyang mga katugangan, habang igwa pa nin sarong pag-iribang mga kristiyano na natatada na iyo an magsasadire kan daga---
14 Nin huli ta kaya sinda gabos mga tunay na paratubod ni Cristo, na kairiba sa simbahan nin Diyos, na pinag-apud ninda na bakong kairiba kan simbahan.
15 Asin sinda na kairiba sa simbahan nanggad pano nin pagtubod; iyo, an gabos sainda na iyo an mga tunay na paratubod ki Cristo nagdara sa saindang sadire, na may pagkaogma, an pangaran ni Cristo, o mga kristiyano na sinda pinag-aapud, nin huli kan saindang paniniwala ki Cristo na maabuton pa.
16 Asin kun kaya, sa panahong ini, si Moroni nagpangadye na an kausa kan mga kristiyano, asin an kalayaan kan daga dapat iyo an matawanan nin pabor.
17 Asin nangyaring naglipas na kan saiyang ipinagpabulos an saiyang kalag sa Diyos, saiyang pinagngaranan an bilog na kadagaan na yaon sa may timog kan daga nin Kalipungawan, iyo, asin sa madaliong taramon, an bilog na daga, pareho na yaon sa may norte asin sa may sur--- Sarong piniling daga, asin an daga nin libertad.
18 Asin siya nagsabi: Tunay na an Diyos dae magtutugot na kita, na kina-anggutan nin huli ta satuyang pinagdadara an pangaran ni Cristo, pagtatarapak-tapakan asin pagdedestrosohon, hanggan satuyang ipagpatong ini sa satuyang mga sadire sa paagi kan satuyang mga kalapasan.
19 Asin kan si Moroni nakapagsabi na kaining mga tataramon, siya nagpasiring sa pag-iriba kan mga katawohan, na ipinagwagayway an ginising parte kan saiyang yamit sa ere, na tanganing an gabos puwedeng mahiling an nasusurat na saiyang isinurat sa may ginising parte, asin magkukurahaw na may sarong makusugon na boses, na nagsasabi:
20 Hilnga, an siisay man na maninindugan kaining titulo sa ibabaw kan daga, magdulok sinda sa kusog nin Kagurangnan, asin maglaog sa sarong tipan na sinda maninindugan kan saindang mga karapatan, asin sa saindang relihiyon, na tanganing an Kagurangnang Diyos puwedeng magbebendisyon sainda.
21 Asin ini nangyaring naglipas na kan si Moroni nakapagproklama na kaining mga tataramon, hilnga, an mga katawohan nagdaralagan sa pagdulok na an saindang baluti nakagakot sa saindang mga habayan, pinaggirisi an saindang mga yamit bilang palatandaan, o bilang sarong tipan, na sinda dae nanggad matalikod sa Kagurangnan nindang Diyos; o, sa ibang tataramon, kun sinda makapaglapas sa mga kasugoan nin Diyos, o mahulog pasiring sa kalapasan, asin magin masusupgon sinda sa pagdara kan pangaran ni Cristo, an Kagurangnan iyo an magwawasak sainda na arog kan saindang paggisi kan saindang mga yamit.
22 Ngonian iyo ini an tipan na saindang ginibo, asin saindang pinag-iritsa an saindang mga yamit sa may pamitisan ni Moroni, na nagsasabi: Kami nakikipagtipan sa samuyang Diyos, na kami madedestroso, magin arog kan samuyang mga katugangan sa daga pasiring norte kun kami magkakahurulog pasiring sa kalapasan; iyo, puwede niya kaming ipatunod sa pamitisan kan samuyang mga kaiwal, na magin arog kan samuyang pag-itsa kan samuyang mga yamit sa saimong pamitisan na tanganing pagtarapak-tapakan sa irarom kan bitis, kun kami magkakahurulog pasiring sa kalapasan.
23 Si Moroni nagsabi sa sainda: Hilnga, kita iyo an katadaan kan banhi ni Jacob; iyo, kita iyo an katadaan kan banhi ni Joseph, na an kapa pinaggisi kan saiyang mga katugangan sa kadakul na mga pedaso; iyo, asin ngonian hilnga, kaipuhan tang giromdomon na magsusunod sa mga kasugoan nin Diyos, o an satuyang mga yamit gigirision kan satuyang mga katugangan, asin kita ipagkukunkon pasiring sa prisohan, o ipagpabakal, o gagaradanon.
24 Iyo, kaipuhan tang maipreserba an satuyang libertad bilang sarong katadaan ni Joseph; iyo, kaipuhan giromdomon an mga tataramon ni Jacob, bago an saiyang kagadanon, nin huli ta hilnga, saiyang nahiling na an sarong parte kan katadaan kan kapa ni Joseph pinagpreserba asin dae naglapa. Asin siya nagsabi--- Magin arog kaining katadaan kan yamit kan sakuyang akeng lalake na pinagpreserba, iyo man an sarong katadaan kan banhi kan sakuyang akeng lalake na ipreserba sa paagi kan kamot nin Diyos, asin dadarahon sa saiyang sadire mismo, habang an natatada kan banhi ni Joseph mapapara, na magin arog sa katadaan kan saiyang yamit.
25 Ngonian hilnga, ini nakapagtao sa sakuyang kalag nin kamondoan; daeng pagkukulang, an sakuyang kalag nagkaigwa nin kaogmahan sa sakuyang akeng lalake, nin huli kaidtong parte kan saiyang banhi na dadarahon pasiring sa Diyos.
26 Ngonian hilnga, iyo ini an lengguwahe ni Jacob.
27 Asin ngonian siisay an nakakaaram kun arin an katadaan kan banhi ni Joseph, na iyo an mapapara arog kan saiyang yamit, bako daw na iyo sinda na nagpaparibok sa satuya? Iyo, asin magin ining satuyang mga sadire kun kita dae magtindog nin pusog sa pagtubod ki Cristo.
28 Asin ngonian ini nangyaring naglipas na kan si Moroni nakapagsabi na kaining mga tataramon siya nagpadagos, asin man nagpasugo sa bilog na mga parte kan daga kun saen may mga kariribokan, asin pinagtitiripon na magkasararo an gabos na mga katawohan na nagmamawot na imantine an saindang libertad, na magtitindog kontra ki Amalickiah asin sa iba na nagpaparibok, na pinag-apud na Amalikihita.
29 Asin ini nangyaring naglipas na kan si Amalickiah nahiling na an mga katawohan ni Moroni mas grabe an bilang kesa sa mga Amalikihita--- asin saiya man nahiling na an saiyang mga katawohan pano ninn pagdududa manungod sa hustisya kan kausa na saindang pinagtataguyod--- kun kaya, may pagkatakot na siya dae makagana sa punto, saiyang pinagdara sinda na saiyang mga katawohan na may gusto asin nagharale na pasiring sa kadagaan nin Nephi.
30 Ngonian si Moroni nakapag-isip-isip na ini bakong kapakinabangan na an mga Lamanita magkakaigwa pa nin kusog; kun kaya saiyang naisip na harangon an katawohan ni Amalickiah, o kuahon sinda asin darahon sinda pabalik, asin si Amalickiah gadanon; iyo, nin huli ta siya nakakaaram na siya an puwedeng makapag-enganyar kan mga Lamanita na magka-aranggot kontra sainda, asin magkausa sainda na mag-abot sa pakigiyera kontra sainda; asin ini saiyang naaaraman na gigibohon ni Amalickiah na tanganing saiyang makua an saiyang mga katuyuhan.
31 Kun kaya si Moroni nakapag-isip-isip naini kapakinabangan na saiyang darahon an saiyang mga paralaban, nag nagkasararong nagkatiripon, asin armasan sinda, asin pinalaog sa sarong tipan sa pagmantine nin katalingkasan--- asin ini nangyaring naglipas na saiyang kinurua an saiyang paralaban asin nagmartsa paluwas kaiba an saiyang mga tolda pasiring sa kaparangan, tanganing harangon an hukbo ni Amalickiah sa may kaparangan.
32 Asin ini nangyaring naglipas na saiyang ginibo an uyon sa saiyang mga minamawot, asin nagmartsa pasiring sa kaparangan, asin pinag-enotan an mga paralaban ni Amalickiah.
33 Asin ini nangyaring naglipas na si Amalickiah nagdulag kaiba an dikit na numero kan saiyang mga tawohan, asin an natada napaduman sa mga kamot ni Moroni asin dinarara pabalik pasiring sa kadagaan nin Zarahemnah.
34 Ngonian, si Moroni bilang sarong tawo na pinagngaranan kan mga pinakapamayong mga huwes asin nin boses nin mga katawohan, kun kaya siya igwa nin kapangyarihan na uyon sa saiyang kagustuhan sa mga paralaban kan mga Nephita, na tanganing mag-establisa asin tanganing mag-ehersisyo nin autoridad na mangingibabaw sainda.
35 Asin ini nangyaring naglipas na an siisay man sa mga Amalickiah na habong maglalaog sa sarong tipan na magsusuporta sa kausa nin kalayaan, na tanganing sinda makapagmantine nin sarong malayong gobyerno, siya gagadanon;
36 Asin ini nangyaring naglipas man, na saiyang ipinagsugo na an titulo nin libertad ipagbandera sa ibabaw kan lambang tore na yaraon sa bilog na kadagaan, na pagsasadire kan mga Nephita; asin kaya si Moroni pinagtanom an bandera kan libertad sa pag-iribang mga Nephita.
37 Asin sinda nagpoon na magkaigwa nin katuninongan giraray sa daga; asin kaya sinda an nagmantine nin katuninongan sa daga hanggan haros sa ipagtapos kan ika-desinuwebeng taon kan pagpapamahala kan mga huwes.
38 Asin si Helaman asin an mga haralangkaw na mga kapadean nagmantine man nin kahusayan sa laog nin simbahan; iyo, magin sa laog nin apat na taon sinda nagkaigwa nin sobrang katuninongan asin kaogmahan sa laog kan simbahan.
39 Asin ini nangyaring naglipas na nagkaigwa nin kadakul na nagkagaradan, pusog na nagtuturubod na an saindang mga kalag pinagtutubos sa paagi nin Kagurangnang JesuCristo; kaya sinda nagruluwas sa kinaban na nag-oorogma.
40 Asin nagkaigwa nin iba na nagkagaradan na may mga kalintura, na sa kapanahunan kan taon pirme sana yaon sa daga--- pero bako mang gayo sa mga kalintura, nin huli kan pinakamarahay na mga kalidad nin kadakul na mga pananom asin mga ugat na an Diyos iyo an nag-andam tanganing haraleon an kausa kan mga kahelangan, na kun saen iyo an nagpapasa-irarom sa mga tawo sa paagi kan natura nin klima---
41 Pero nagkaigwa nin kadakul na nagkagaradan sa pagkagurang; asin sinda na nagkagaradan sa pagtubod ki Cristo nagin maogmahon na kaiba niya, arog kan kaipuhan nyatong gayo na paghuhuna-hunaon.

Wednesday, February 01, 2006

ALMA TSAPTER 45 

An kasaysayan kan mga katawohan nin Nephi, asin an saindang pakikipaggiyera asin pag-iiriwal-iwal, sa mga aldaw ni Helaman, na uyon sa rekord ni Helaman, na saiyang pinaggibo sa saiyang mga aldaw. Kompunido kan Tsapter 45 hanggan 62 inklusibo.

Si Helaman nagtutubod sa mga tataramon ni Alma--- Si Alma nagpropesiya sa kapahamakan kan mga Nephita--- Siya nagbendisyon asin nagsumpa kan daga--- Si Alma pinagkua kan Espiritu, magin arog ki Moises--- Iriwalan nagtalubo sa laog kan Simbahan.

*******

Hilnga, ngonian ini nangyaring naglipas na an mga katawohan nin Nephi grabeng gayo an kaogmahan, nin huli ta an Kagurangnan an nagligtas giraray sainda paluwas sa mga kamot kan saindang mga kaiwal; kun kaya sinda nagtao nin mga pasasalamat sa Kagurangnan na saindang Diyos; iyo, asin sinda nag-ayunong gayo asin nagpangadyeng gayo, asin sinda nagsamba sa Diyos na may dakulaon na gayong pagka-orma.
2 Asin ini nangyaring naglipas na ika-desinuwebeng taon kan pagpapamahala kan mga huwes sa mga katawohan nin Nephi, na si Alma nagdulok sa saiyang akeng lalake na si Helaman asin nagsabi sa saiya: Nagtutubod ka daw sa mga tataramon na sakuyang pinagsasabi sa saimo manungod sa mga talaan na haloy nang pinagtatago?
3 Asin si Helaman nagsabi sa saiya: Iyo po, ako nagtutubod.
4 Asin si Alma nagsabi giraray: Nagtutubod ka daw ki JesuCristo, na maabot?
5 Asin siya nagsabi: Iyo po, ako nagtutubod sa gabos na mga tataramon na saimong pinagsabi na.
6 Asin si Alma nagsabi sa saiya giraray: Magsusunod ka daw sa sakuyang mga kasugoan?
7 Asin siya nagsabi: Iyo po, ako magsusunod sa saimong mga kasugoan sa bilog kong puso.
8 Pagkatapos na si Alma nagsabi sa saiya: Paladan ka; asin an Kagurangnan magpapa-asenso saimo digde sa daga.
9 Pero hilnga, ako igwa nin garo baga propesiya sa saimo; pero kun ano an sakuyang ipinagpropesiya sa saimo dae mo ipagpabantog; iyo, an anuman na sakong ipinagpropesiya sa saimo dae dapat na ipagpabantog, magin hanggan an propesiya mautob; kun kaya surata an mga tataramon na sakong pinagsasabi.
10 Asin iyo ini an mga tataramon: Hilnga, sakuyang nababanaag na ini mismong mga katawohan, an mga Nephita, uyon sa espiritu nin kapahayagan na yaon sa sakuya, sa apat na gatos na taon magpoon sa panahon na si JesuCristo makapagpahiling na sa sainda, magluluhay-luhay na mawawara na daeng paniniwala.
11 Iyo, asin pagkatapos siya makakahiling nin mga giyera asin mga kapestehan, iyo, mga taggutom asin pagpapabulos nin dugo, magin hanggan an mga katawohan nin Nephi magkakaparara---
12 Iyo, asin ini mangyayari nin huli kan saindang mayong paniniwala asin magkakahurulog pasiring sa mga gibo nin kadikloman, asin kalaswaan, asin gabos na manera nin kadaendatahan; iyo, ako nagsasabi sa saimo, na nin huli ta sinda magkakasala kontra sa grabe kadakulaong liwanag asin kaaraman, iyo, ako nagsasabi sa saimo, na sa aldaw na idto, magin sa ikaapat na henerasyon dae nanggad gabos maagi bago pa man ining dakulaon na kadaendatahan na mangyari na.
13 Asin kun an aldaw na idto maabot na, hilnga, an panahon madalion nang mag-abot na sinda na iyo ngonian, o an banhi ninda na iyo ngonian kabilang sa pag-iriba nin mga katawohan nin Nephi, dae na maibibilang pa sa pag-iriba nin mga katawohan nin Nephi.
14 Pero an siisay man na natatada, asin dae nadestroso sa aldaw na yan na dakula asin makangorongirhat na aldaw, mabibilang sa pag-iriba nin mga Lamanita, asin magigin arog sa sainda, gabos, laen lang kaining kadikit na pag-aapudon na mga disipulos nin Kagurangnan; asin sinda an raralamagon kan mga Lamanita magin hanggan na sinda magkakaparara. Asin ngonian, nin huli kan kadaendatahan, ining propesiya mauutob.
15 Asin ngonian ini nangyaring naglipas na pagkatapos ni Alma makapagsabi na kaining mga bagay ki Helaman, saiyang pinagbendisyunan siya, asin man an saiyang ibang akeng lalake; asin saiya man pinagbendisyunan an daga para sa matanos na kamugtakan.
16 Asin siya nagsabi: Kaya sinabi nin Kagurangnang Diyos--- An sumpa mapasa-daga, iyo, ining daga, pasiring sa lambang nasyon, lahi, dila, asin mga katawohan, pasiring sa kapahamakan, sa sainda na naggigibo nin kalapasan, sa panahon na sinda hinog nang bilog; asin habang sakong pinagtataram ini mangyayari; nin huli ta iyo ini an kasumpaan asin kabendisyunan nin Diyos sa ibabaw nin daga, nin huli ta an Kagurangnan dae makapaghiling sa kasalanan sa pinakasadit kaining kinamumugtakan.
17 Asin ngonian, kan si Alma nakapagsabi na kaining mga tataramon saiyang pinagbendisyunan an simbahan, iyo, an gabos ninda na maninindugan para sa pagtubod nagpoon kan panahon na idto hanggan sa maabot pa.
18 Asin kan si Alma nagibo na ini siya naghale paluwas sa daga nin Zarahemla, na kumbaga pasiring sa daga nin Melek. Asin ini nangyaring naglipas na siya dae na nadangog pa giraray; manungod sa saiyang kagadanan o kinalubungan kami mayo nang pagkaaram.
19 Hilnga, iyo ini an samuyang aram, na siya sarong matunuson na tawo; asin an kasabihang ini napabantog sa simbahan na siya pinagkua kan Espiritu, o inilubong kan kamot nin Kagurangnan, na garo baga arog ki Moises. Pero hilnga, an mga kasuratan nagsasabi na an Kagurangnan pinagkua si Moises sa saiya mismong sadire; asin samuyang pinaghuhuna na saiya man naresibe si Alma sa espiritu, pasiring sa sadire niya; kun kaya, nin huli kaining dahilan kami mayong pagkaaram manungod sa saiyang kagadanan asin kinalubungan.
20 Asin ngonian ini nangyaring naglipas sa pagpopoon kan ika-desinuwebeng taon kan pagpapamahala kan mga huwes sa mga katawohan nin Nephi, na si Helaman naglakaw sa pag-iriba kan mga katawohan tanganing ideklara an tataramon sa sainda.
21 Nin huli ta hilnga, nin huli kan saindang pakikipaggiyera sa mga Lamanita asin sa kadakul na saradit na mga beringkilan asin mga kadisturbuhan na yaon sa pag-iriba kan mga katawohan, ini nagin kapakinabangan na an tataramon nin Diyos dapat na ipagdeklara sa pag-iriba ninda, iyo, asin na an regulasyon dapat na mahihimo sa kabilugan nin simbahan.
22 Kun kaya, si Helaman asin an saiyang mga katugangan nagralakaw sa pag-establisa nin simbahan giraray sa bilog na kadagaan, iyo, sa lambang siyudad sa kabilugan nin daga na pagsasadire kan mga katawohan ni Nephi. Asin ini nangyaring naglipas na sinda nagngaran nin mga kapadean asin mga paratukdo sa kabilugan nin daga, sa kabilugan nin gabos na mga simbahan.
23 Asin ngonian ini nangyaring naglipas na pagkatapos ni Helaman asin kan saiyang mga katugangan nakapagngaran nin mga kapadean asin mga paratukdo sa kabilugan nin mga simbahan na nagkaigwa nin beringkilan sa mga pag-iriba ninda, asin sinda habong magsurunod sa mga tataramon ni Helaman asin kan saiyang mga katugangan.
24 Pero sinda nagtaralubo sa kapaabaw-abawan, na pinagpalangkaw sa laog kan saindang mga puso, nin huli sa grabe na garyong kayamanan; kun kaya sinda nagtaralubong mayayaman sa saindang sadireng mga mata, asin habong magdadangog sa saindang mga tataramon, na tanganing magralakaw na may katanusan sa atubangan nin Diyos.

Monday, January 30, 2006

ALMA TSAPTER 44 

Si Moroni nagsugo na an mga Lamanita makipagsundo nin sarong tipan nin katuninongan o mapahamak--- Si Zarahemnah dae nag-uyon sa inalok, asin an giyera nagpoon giraray--- An mga paralaban ni Moroni dinaraog an mga Lamanita.

*******

Asin ini nangyaring naglipas na sinda nag-untok asin si Moroni nagsabi ki Zarahemnah: Hilnga, Zarahemnah, na kami dae nagmawot na mgin mga malupiton na tawo. Ika nakakaaram na ika yaon sa samuyang mga kamot, alagad kami habong magmawot na garadanon kamo.
2 Hilnga, kami dae nagruluwas tanganing makilaban kontra saindo na tanganing samuyang puwedeng pabuluson an saindong dugo para sa kapangyarihan; ni kami nagmawot na darahon an siisay man saindo pasiring sa renda nin pagka-uripon. Pero ini iyo an pinaka-kausa kun tadaw kamo nag-arabot kontra samuya; iyo, asin kamo anggot sa samuya nin huli kan samuyang relihiyon.
3 Hilnga ngonian, ika nakahiling na an Kagurangnan yaon samuya; asin saimong nasaksihan na siya an nagtao saindo pasiring sa samuyang mga kamot. Asin ngonian ako mahimo na kamo dapat makasabot na ini pinaggibo sa samuya nin huli kan samuyang relihiyon asin kan samuyang pagtubod ki Cristo. Asin ngonian saimong nahihiling na kamo dae makadestroso kaining samuyang pagtubod.
4 Ngonian saimong nahihiling na ini iyo an tunay na pagtubod sa Diyos; iyo, saimong nahihiling na an Diyos minasuporta; asin nagbabantay, asin minapreserba samuya, sagkod na kami pano nin pagtubod saiya, asin sa samuyang pagtubod, asin sa samuyang relihiyon; asin dae nanggad an Kagurangnan matugot na kami mapapahamak laen lang kun kami mahuhulog pasiring sa kalapasan asin isikwal an samuyang pagtubod.
5 Asin ngonian, Zerahemnah, ako nagsusugo saimo, sa pangaran kan makapangyarihan sa gabos na Diyos, na iyo an nagpakusog sa samuyang mga armas na tanganing kami makaguno nin kapangyarihan na mangibabaw saindo, sa paagi kan samuyang pagtubod, sa paagi kan samuyang relihiyon, asin sa paagi kan samuyang mga rito nin pagsasamba, asin sa paagi kan samuyang simbahan, asin sa paagi nin sagradong suporta na samuyang nakua gikan sa samuyang mga agom asin samuyang mga kaakian, sa paagi kan libertad na nagbubugkos samuya sa samuyang mga kadagaan asin sa samuyang nasyon; iyo, asin man sa paagi kan pagsusunod kan sagradong tataramon nin Diyos, kun saen iyo an pinagkakautangan kan bilog nyamong kaogmahan; asin sas paagi kan gabos na iyo an mas mahalaga sa samuya---
6 Iyo, asin bako lang ini gabos; ako nagsusugo saimo sa paagi kan bilog mong pinagmamawot na igwa ka sa buhay, na saindong isuko ang mga armas panggiyera nindo sa samuya, asin dae nyamo pagmamawoton an saindong dugo, pero samuya kamong bubuhayon, kun kamo mapasiring sa sadire nindong dalan asin dae na nanggad makigiyera pa kontra samuya.
7 Asin ngonian, kun dae nindo gigibohon ini, hilnga, kamo yaon sa samuyang mga kamot, asin ako magsusugo sa sakuyang mga tauhan na atakehon kamo, asin itao an mga lugad nin kagadanan sa mga hawak nindo, na tanganing kamo magkaparara; asin pagkatapos mahihiling ta kun siisay talaga an igwa nin kapangyarihan na mangingibabaw kaining mga katawohan; iyo, mahihiling nyato kun siisay talaga an madadara pasiring sa kauripnan.
8 Asin ngonian ini nangyaring naglipas na kan si Zerahemnah nadangog an mga sinabing ini siya nangenot asin ipinagtao an saiyang espada asin saiyang panusok, asin an saiyang pangatlig sa mga kamot ni Moroni, asin nagsabi sa saiya: Hilnga, uya an samuyang mga armas panggiyera; samuya ining itatao sa saindo, pero kami dae matugot sa sadire nyamo an magsumpa sa saindo, na sa samuyang pagkaaram malalapas lang nyamo, asin kan samuyang mga kaakian; pero kuaha an samuyang mga armas panggiyera, asin tuguti na kami puwedeng makahale pasiring sa kaparangan; ta kun dae samuyang kukuahon giraray an samuyang mga espada, asin kami magkakagaradan o magsasakop.
9 Hilnga, kami bakong kaiba nindo sa pagtubod; kami mayong pagtubod na an Diyos iyo an nagtao samuya pasiring sa saindong mga kamot; pero kami nagtutubod na an pambihira nindong kakayahan iyo an nagpreserba saindo gikan sa samuyang mga espada. Hilnga, an saindong pantahob sa daghan asin an saindong mga panangga iyo an nagpreserba saindo.
10 Asin ngonian kan si Zarahemnah nagtapos na sa pagtataram kaining mga tataramon, ibinalik ni Moroni an espada asin mga armas panggiyera, na saiyang naresibe, pasiring ki Zerahemnah, na nagsasabi: Hilnga, satuyang tatapuson an ralabanan.
11 Ngonian ako dae makakagiromdom kan mga tataramon na sakuyang naisabi na, kun kaya habang an Kagurangna nabubuhay, kamo dae makakahale laen lang na kamo mahale na may panunumpa na kamo dae na magbabaralik giraray kontra samuya tanganing makigiyera. Ngonian habang kamo yaon sa samuyang mga kamot samuyang patuturoon an saindong dugo sa daga, o kamo mag-uyon sa mga kondisyon na sakuyang ipinagpahayag na.
12 Asin ngonian kan si Moroni nakapagsabi na kaining mga tataramon, si Zerahemnah kinua an saiyang espada, asin siya nag-anggot ki Moroni, asin siya nagruso paabante na tanganing magadan niya si Moroni; pero habang ipinagtaas niya an saiyang espada, hilnga, saro sa mga soldados ni Moroni pinagsangga ini paibaba sa daga, asin ini naputol sa may puluhan; asin saiyang pinagtagpas si Zerahemnah na tanganing matigpas an saiyang bumbunan asin ini nahulog sa daga. Asin si Zerahemnah napaatras sa sainda pasiring sa pag-iriba kan saiyang mga soldados.
13 Asin ini nangyaring naglipas na an soldado na nakatindog na iyo an nakatigpas kan bumbunan ni Zerahemnah, kinua paitaas gikan sa daga sa paagi nin buhok, asin sinukbit ini sa puro kan saiyang espada, asin ipinagpahiling ini sa sainda, na nagsasabi sa sainda na may dakulang boses:
14 Magin habang an bumbunan na ini nahulog pasiring sa daga, na iyo an bumbunan kan saindang pinakapamayo, iyo man kamo na magkakaturumba sa daga laen lang na kamo ipagtatao an saindong mga armas panggiyera asin magharale na igwa nin tipan nin katuninongan.
15 Ngonian igwa sa kadaklan, kan madangog an mga tataramon na ini asin nahiling an bumbunan na yaon sa puro kan espada, na inabutan nin pagkatakot; asin kadakul an nangenota asin ipinaghulog an saindang armas panggiyera sa pamitisan ni Moroni, asin naglaog sa sarong tipan nin katuninongan. Asin habang kadakul-dakul an nagralaog sa sarong tipan sinda tinugutan na makahale pasiring sa kaparangan.
16 Ngonian ini nangyaring naglipas na si Zerahemnah grabeng gayo an pagka-anggot, asin saiyang pinag-init an mga natatada pa niyang mga soldados na magka-aranggot, na tanganing makilaban pa sa bilog na kakusugan kontra sa mga Nephita.
17 Asin ngonian si Moroni naanggot, nin huli sa kasutilan kan mga Lamanita; kun kaya siya nagsugo sa saiyang mga katawohan na atakihon sinda sin garadanon sinda. Asin ini nangyaring naglipas na sinda nagpoon sa paggaradan sainda; iyo, asin an mga Lamanita nakilaban sa paagi kan saindang mga espada asin kan saindang kusog;
18 Pero hilnga, an saindang hubang mga unit asin an saindang lantad na mga payo nakayagyag sa matarom na mga espada kan mga Nephita; iyo, hilnga sinda nagkaturusok asin tinaduman, iyo, asin nagkapurukan sa mas hidaling panahon sa mga espada kan mga Nephita; asin sinda nagkaproon na maubos, magin arog sa pinagpropesiya kan soldado ni Moroni.
19 Ngonian si Zarahemnah, kan saiyang nahiling na madalion na sindang madestroso, nagkurahaw nin makusog ki Moroni, nagpopromisa na siya na makikipagtipan na asin man an saiyang mga katawohan sa sainda, kun saindang pabayaang ligtas an katadaan kan saindang mga buhay, na sinda dae na nanggaad mag-abot sa pakigiyera giraray kontra sainda.
20 Asin ini nangyaring naglipas na si Moroni nagkausa na an gibo nin kagadanan dapat na mag-untok giraray sa pag-iriba nin mga katawohan. Asin saiyang kinurua an mga armas panggiyera gikan sa mga Lamanita; asin pagkatapos na sinda nagralaog sa sarong tipan nin katuninongan sa saiya pinagtugutan na magharale pasiring sa kaparangan.
21 Ngonian an numero kan saindang mga gadan dae mabilang nin huli sa kadakulan nin numero; iyo, an numero kan saindang mga gadan grabeng gayo, pareho sa parte kan mga Nehita asin kan mga Lamanita.
22 Asin ini nangyaring naglipas na saindang ipinatapok an saindang mga gadan pasiring sa mga tubig nin Sidon, asin sinda nagka-aranod asin nagkarulubong sa mga kairaroman nin dagat.
23 Asin an mga paralaban kan mga Nephita, o ni Moroni, nabaralik asin nag-uruli sa saindang mga harong asin sa saindang mga kadagaan.
24 Asin kaya natapos an ika-desiotsong taon na pagpapamahala kan mga huwes sa mga katawohan nin Nephi. Asin kay natapos an talaan ni Alma, na isinurat sa mga lamina ni Nephi.

This page is powered by Blogger. Isn't yours?