An Libro Ni Mormon (An Saro Pang Tipan Ni Jesucristo)

Si Jesus nagtukdo sa mga katawohan na paghorop-horopan an saiyang mga tataramon asin magpangadye para sa pagkasabot--- Siya nagbulong kan saindang may-kahelangan--- Siya nagpangadye para sa mga katawohan, na gamit ang lengguwahe na dae puwedeng maisusurat--- An mga anghel nagparatukdo asin kalayo an nakapalibot sa saindang mga kasaraditan.

*******

Hilnga, ngonian ini nangyaring naglipas na kan si Jesus nakapagtaram na kaining mga tataramon siya naghiling sa palibot giraray nin kadaklan, asin siya nagsabi sa sainda: Hilnga, an panahon ko harani na.
2 Sakuyang na-isip-isipan na kamo maruluya na, na kamo dae na makakasabot sa gabos kong mga tataramon na pinagsugo sako ni Ama na sasabihon sa saindo sa panahon na ini.
3 Kun kaya, lakaw kamo sa saindong mga harong, asin maghorop-horop sa mga bagay na sakuyang naisabi na, asin maghapot sa Ama, sa pangaran ko, na tanganing kamo makasabot, asin prepararon an saindong mga isip para sa aga, asin Ako maabot sa saindo giraray.
4 Pero ngonian Ako mabalik ki Ama, asin man magpapahiling kan sakuyang sadire sa mga nagkawararang tribu nin Israel, nin huli ta sinda dae dapat magkawarara sa Ama, nin huli ta siya nakakaaram kun saiyang pagdadarahon sinda.
5 Asin ini nangyaring naglipas na kan si Jesus nakapagtapos na sa pagtaram, saiyang pinaghiling an saiyang mga mata sa palibot giraray sa kadaklan, asin namasdan na sinda yaon sa pagluha, asin nakahiling na nakaputitok sa saiya na garo baga sinda naghahagad saiya na maghaloy pa sa kadikit na panahon na kaibahan ninda.
6 Asin siya nagsabi sa sainda: Hilnga, an sakuyang daghan napapano nin pagkaherak sa saindo.
7 Igwa daw kamo nin may-kahelangan sa pag-iriba nindo? Daraha sinda digde. Igwa daw kamo nin siisay man na mga pilay, o buta, o lumpo, o baldado, o ketongon, o may mga kamatean, o sinda na mga bungog, o sinda na nasasakita sa anuman na manera? Daraha sinda digde asin Ako an magpaparahay sainda, nin huli ta Ako igwa nin pagkaherak sa saindo; an sakuyang daghan napapano nin pagkamaherakon.
8 Nin huli ta Ako narorop na kamo nagmamawot na Ako dapat na makapaghiling sa saindo kun ano an sakong ginibo sa saindong mga katugangan na yaon sa Jerusalem, nin huli ta Ako nakakahiling na an saindong pagtubod tama na Ako dapat na pa-omayan kamo.
9 Asin ini nangyaring naglipas na kan siya nakapagtapos na sa pagtaram, an bilog na kadaklan, na may pagkasararo, nagdarara kaiba ninda an may mga kahelangan asin kan saindang nagkasarakitan, asin kan saindang mga pilay, asin kan saindang mga buta, asin kan saindang mga bungog, asin kan gabos ninda na may kasakitan sa anuman na manera; asin saiyang pinagpa-omayan sinda sa lambang saro habang sinda pinagdarara paharani sa saiya.
10 Asin sinda naggibo na gabos, pareho sinda na nagka-oromayan asin sinda na mga mayong helang, nagruluhod sa saiyang pamitisan, asin nagsamba sa saiya; asin haros kadakul na nakapagdulok gikan sa kadaklan nagharadok sa saiyang mga bitis, na tangani baya saindang pinarigosan an saiyang mga bitis kan saindang mga luha.
11 Asin ini nangyaring naglipas na saiyang pinagsugo na an saindang saradit na kaarakian dapat na ipagdulok.
12 Kaya saindang ipinagdulok an saindang saradit na mga kaarakian asin pinagpaturukaw sa daga sa palibot niya, asin si Jesus nakatindog sa tahaw, asin an kadaklan nagtaong dalan hanggan sagkod na sinda nagkadarara na sa saiya.
13 Asin ini nangyaring naglipas na kan sinda gabos pinagdara na, asin si Jesus nagtindog sa tahaw ninda, siya nagsugo sa kadaklan na sinda magruluhod sa daga.
14 Asin ini nangyaring naglipas na kan sinda nakapagluhod na sa daga, si Jesus nagngayo-ngayo sa irarom kan sadire niya, asin nagsabi: Ama, Ako naririnsal nin huli sa karigsokan kan mga katawohan sa harong nin Israel.
15 Asin kaya siya nakapagtaram na kaining mga tataramon, siya sa sadire niya mismo nagluhod sa daga; asin hilnga siya nagpangadye sa Ama, asin an mga bagay na saiyang pinagpangadye dae maisusurat, asin an kadaklan nagsurat nin mga bagay na saindang nadangog saiya.
16 Asin sa arog kaining manera nagsurat sinda sa rekord: An mata dae pa nakahiling, ni an talenga nakadangog, kaidto, mga darakula asin makangangalas na mga bagay an samuyang nahiling asin nadangog na si Jesus nakipag-olay sa Ama;
17 Asin mayong dila an puwedeng makapagtaram, ni nagkaigwa na nin anumang naisurat nin tawo, ni kaya nin mga puso nin mga tawo tugkadon an grabe kadakula asin makangalason na mga bagay na samuyang pareho na nagkahiriling asin nadangog si Jesus nagtaram; asin mayo ni saro an kayang tugkadon an kaogmahan na nagpano sa samuyang mga kalag sa panahon na samuyang nadangog siya nagpapangadye para samuya sa Ama.
18 Asin ini nangyaring naglipas na kan si Jesus nagtapos na kan pagpapangadye sa Ama, siya nagbuhat; pero grabeng gayo an kaogmahan nin kadaklan na sinda napangibabawan.
19 Asin ini nangyaring naglipas na si Jesus nagtaram sa sainda, asin sinda pinatirindog.
20 Asin sinda nagtirindog gikan sa daga, asin siya nagsabi sa sainda: Paladan kamo nin huli kan saindong pagtubod. Asin ngonian hilnga, an kaogmahan ko pano.
21 Asin kan siya nakapagsabi na kaining mga tataramon, siya nagbakho, asin an kadaklan nagsurat kaini, asin saiyang pinagkaptan an saindang saradit na kaarakian, saro-saro, asin pinagbendisyunan sinda, asin nagpangadye sa Ama para sainda.
22 Asin kan saiya nang naggibo ini siya naghibi giraray;
23 Asin siya nagtaram sa kadaklan, asin nagsabi sa sainda: Hilnga an saindong mga kasaraditan.
24 Asin habang sinda nagmamansay tanganing mahiling saindang pinagputitok an saindang mga mata patangad sa langit, asin saindang nahiling na an mga kalangitan nagbukas, asin saindang nahiling an mga anghel na nagbaraba paluwas sa langit na garo baga yaon sa tahaw nin kalayo; asin sinda nagbaraba asin nagpalibot-libot sa mga kasaraditan, asin sinda nagkaparilibutan nin kalayo; asin an mga anghel an nagturukdo sa sainda.
25 Asin an kadaklan nakahiling asin nakadangog asin nagsurat sa rekord; asin sinda nakakaaram na an saindang rekord totoo nin huli ta sinda gabos an nakahiling asin nakadangog, an lambang tawo para sa saiyang sadire; asin sinda nabibilang na maabot sa duwang ribo asin limang gatos na mga kalag; asin sinda pag-iriba nin mga kalalakehan, mga kababaehan, asin mga kaarakian.

Si Jesus mabisita sa iba pang mga nagkawararang mga karnero kan Israel--- Sa mga huring aldaw an ebanghelyo magpapaduman sa mga Hentil asin masunod pasiring sa harong nin Israel--- An mga katawohan nin Kagurangnan magkakahirilingan mata sa mata sa panahon na saiyang dadarahon giraray an Sion.

*******

Asin katotoohan, katotoohan, Ako nagsasabi sa saindo na Ako igwang ibang mga karnero, na mayo sa kadagaan na ini, ni sa kadagaan nin Jerusalem, ni sa arin man na parte nin kadagaan na nakapalibot na kun saen Ako mapaduman sa pagmiministro.
2 Nin huli ta sinda iyo idtong sakuyang pinagtataram na sinda nanggad dae pa nakakadangog kan sakuyang boses; ni Ako sa arin man na panahon nakapagpahiling kan sakuyang sadire sa sainda.
3 Pero Ako nakaresibe nin sarong kasugoan kan Ama na Ako magpapasiring sa sainda, asin na sinda makakadangog kan sakuyang boses, asin ibibilang sa pag-iriba kan sakuyang mga karnero, na tanganing magkakaigwa nin sarong pangon asin sarong parapastol; kun kaya ako mapaduman tanganing mapahiling kan sadire ko sa sainda.
4 Asin Ako nagsusugo saindo na saindong isusurat ining mga tataramon pagkatapos na Ako nakahale na, na kun ini nanggad an mangyayari na an sakuyang mga katawohan sa Jerusalem, sinda na nakahiling sa sakuya asin naka-ibahan ko sa sakuyang ministeryo, dae maghahapot sa Ama sa pangaran ko, na tanganing sinda makaresibe nin kaaraman manungod saindo sa paagi nin Espiritu Santo, asin man sa ibang mga tribu na dae sindang pagkaaram, na tanganing ining mga tataramon na saindong isusurat itatago asin ipagtutukdo sa mga Hentil, na sa paagi kan bilog na ining kautuban sa mga Hentil, an katadaan kan saindang banhi, na magkakawaratak-watak sa ibabaw kan lalawgon nin kinaban nin huli kan saindang daeng paniniwala, puwedeng madara sa laog, o puwedeng madadara sa sarong kaaraman sa sako, na saindang Paratubos.
5 Asin pagkasunod sakuya sindang pagtitiriponon gikan sa apat na mga rona kan kinaban; asin pagkasunod mag-uutob Ako sa tipan na an Ama iyo an naghimo sa bilog na mga katawohan kan harong nin Israel.
6 Asin paladan an mga Hentil, nin huli kan saindang paniniwala sa sakuya, sa paagi asin nin huli sa Espiritu Santo, na iyo an magpapatotoo sa sainda manungod sako asin sa Ama.
7 Hilnga, nin huli kan saindang paniniwala sa sakuya, sabi kan Ama, asin nin huli sa dae nindong paniniwala, O harong nin Israel, sa huring aldaw an katotoohan magpapaduman sa mga Hentil, na tanganing an kabilugan kan mga bagay na ini maipapabantog sa sainda.
8 Pero herak man, nagsabi an Ama, sa sainda na mayong paniniwala kan mga hentil--- nin huli ta maski na ngani na sinda nakaabot na sa lalawgon kaining kadagaan, asin nagpawaratak-watak kan sakuyang mga katawohan na yaon sa harong nin Israel; asin an sakuyang mga katawohan na yaon sa harong nin Israel an pinagsisirikwal gikan sa kaibahan ninda, asin pinagtirimak-timakan sa irarom kan mga bitis ninda;
9 Asin nin huli sa mga pagkaherak kan Ama sa mga Hentil, asin man sa mga paghuhukom kan Ama sa sakuyang mga katawohan, na yaon sa harong nin Israel, katotoohan, katotoohan, Ako nagsasabi sa saindo, na pagkatapos kaini gabos, asin Ako nagkausa sa sakuyang mga katawohan na yaon sa harong nin Israel na magkaharampak, asin pagparapasaskitan, asin paggagaradanon, asin pagparasikwalon paluwas gikan sa pag-iriba ninda, asin magin kaorongisan ninda, asin magin sarong singasing-paros asin sarong laman-dila sa pag-iriba ninda---
10 Asin kaya nagsugo an Ama na Ako dapat na magsabi sa saindo: Sa aldaw na yan na an mga Hentil magkakasala laban sa sakuyang ebanghelyo, asin magsisikwal sa kabilugan kan sakuyang ebanghelyo, asin mapagpalangkaw sa kapaabaw-abawan kan saindang mga puso na mas labi sa gabos na mga nasyon, asin mangingibabaw sa gabos na mga katawohan kan bilog na kinaban, asin magkakaparano nin gabos na manera nin mga kaputikan, asin mga kadayaan, asin kan mga daendatang gawi, asin gabos na manera nin kahipokritohan, asin mga paghaya nin laman, asin mga sikretong abominasyon; asin kun sinda maggigibo gabos kaining mga bagay, asin magsisikwal sa kabilugan kan sakuyang ebanghelyo, hilnga, nagsabi an Ama, Ako an magdadara sa kabilugan kan sakuyang ebanghelyo gikan sa pag-iriba ninda.
11 Asin pagkasunod Ako makakagiromdom kan sakuyang tipan na Ako an naghimo sa sakuyang mga katawohan, O harong nin Israel, asin Ako an magdadara kan sakuyang ebanghelyo sa sainda.
12 Asin Ako magpapahiling sa saindo, O harong nin Israel, na an mga Hentil dae magkakaigwa nin kapangyarihan na mangingibabaw sa saindo; pero Ako maggigiromdom kan sakuyang tipan sa saindo, O harong nin Israel, asin kamo makakaabot sa pagkakaaram kan kabilugan nin sakuyang ebanghelyo.
13 Pero kun an mga Hentil magsosolsol asin magbalik sa sakuya, nagsabi an Ama, hilnga sinda ibibilang sa pag-iriba kan sakuyang mga katawohan, O harong nin Israel.
14 Asin ako dae magtutugot na an sakuyang mga katawohan, na yaon sa laog kan harong nin Israel, na magpaduman na makisalak sa iribahan ninda, asin pagparadaog-daogon sinda, nagsabi an Ama.
15 Pero kun sinda dae magbaling sa sakuya, asin magdangog sa sakuyang boses, Ako magtutugot sa sainda, iyo, Ako magtutugot sa sakuyang mga katawohan, O harong nin Israel, na sinda magpaduman na makisalak sa iribahan ninda, asin pagparadaog-daogon sinda, asin sinda magin arog sa asin na nawaraan nin lasa, na dae nanggad sa kamanungdanan kundi ipatatapok, asin pagparatimak-timakan sa irarom kan mga bitis kan sakuyang mga katawohan, O harong nin Israel.
16 Katotoohan, katotoohan, Ako nagsasabi sa saindo, kaya an Ama an nagsugo sakuya--- na sakong ipagtatao sa mga katawohang ini an kadagaan para sa saindang kamanahan.
17 Asin pagkasunod an mga tataramon kan propetang si Isaias mauutob, na nagsasabi:
18 An saimong bantay magpapalangkaw kan boses; kasarabay an boses na sinda magkakanta, nin huli ta sinda makakahiling mata sa mata sa panahon na an Kagurangnan dadarahon giraray an Sion.
19 Magkururahaw sa kaogmahan, sarabay na magkaranta, kamo na mga wasak na lugar nin Jerusalem; nin huli ta an Kagurangnan pinagkalinga an saiyang mga katawohan, saiyang pinatubos an Jerusalem.
20 An Kagurangnan naghimo na mahiling an saiyang lantad na kamot sa mga mata kan gabos na mga nasyon; asin an gabos na mga katapusan kan kinaban makakahiling sa pagliligtas nin Diyos.

Si Jesus nagbalangibog na an ley ni Moises nautob na saiya--- An mga Nephita iyo an ibang mga karnero na saiyang pinagsabi sa Jerusalem--- Nin huli ta sa kadaendatahan an mga katawohan nin Kagurangnan dae nakaaram sa nagkawararak na mga karnero nin Israel.

*******

Asin ngonian ini nangyaring naglipas na kan si Jesus nagtapos na kaining mga tataramon siya nagbaling kan saiyang mga mata sa palibot kan kadaklang mga tawo, asin nagsabi sa sainda: Hilnga, kamo nakadangog kan mga bagay na sakuya nang pinagtukdo bago pa man ako nagsakat pasiring sa sakuyang Ama; kun kaya, an siisay an makapaggiromdom kaining mga tataramon ko asin maggibo kan mga ini, siya bubuhayon ko liwat sa huring aldaw.
2 Asin ini nangyaring naglipas na kan si Jesus nakapagtaram na kaining mga tataramon saiyang namansayan na may iba sa pag-iriba ninda na nagngangaralas, asin nag-iisip-isip kun ano an saiyang boot manungod sa ley ni Moises; nin huli ta sinda dae nakakasabot sa tataramon na an mga lumang bagay naglipas na, asin an gabos na mga bagay nagin bag-o.
3 Asin siya nagsabi sa sainda: Dae kamo magngangalas na Ako nakapagsabi sa saindo na an mga lumang bagay naglipas na, asin an gabos na mga bagay nagin bag-o na.
4 Hilnga, Ako nagsasabi sa saindo na an ley nautob na sakuyang ipinagtao ki Moises.
5 Hilnga, Ako iyo idtong nagtao kan ley, asin Ako iyo siya na nakipagtipan sa sakuyang mga katawohan na Israel, kun kaya, an ley na yaon sako nautob na, nin huli ta ako nagpadigde sa pag-utob kan ley; kun kaya ini nagtapos na.
6 Hilnga, Ako dae pinagdestroso an mga propeta, nin huli sa kadakul na dae nagka-urutob sa sakuya, katotoohan Ako nagsasabi sa saindo, an gabos dapat na mautob na.
7 Asin nin huli ta Ako nagsasabi sa saindo na an mga lumang bagay naglipas na, Ako dae nagdedestroso kaidtong mga naitaram na mapanungod sa mga bagay na paabuton pa sana.
8 Nin huli ta hilnga, an tipan na sakuyang hinimo sa sakuyang mga katawohan dae pa gabos nauutob; kundi an ley na ipinagtao ki Moises nagtapos na sakuya.
9 Hilnga, Ako an ley, asin an liwanag. Maghanap kamo sako, asin magpakakusog sagkod sa katapusan, asin kamo mabubuhay; nin huli ta sa sainda na nagpapakakusog sagkod sa katapusan itatao ko an buhay na daeng kasagkoran.
10 Hilnga, Ako nagtao na saindo nin mga kasugoan; kun kaya magsunod sa sakuyang mga kasugoan. Asin iyo ini an ley asin an mga propeta, nin huli ta sinda tunay nanggad na nagpatotoo tungkol sakuya.
11 Asin ini nangyaring naglipas na kan si Jesus nakapagtaram na kan mga tataramon na ini, siya nagsabi sa doseng ini na saiyang pinagpili na:
12 Kamo an sakuyang mga disipulos; asin kamo an liwanag kaining mga katawohan, na iyo an sarong katadaan kan harong ni Joseph.
13 Asin hilnga, iyo ini an kadagaan kan saindong kamanahan; asin an Ama iyo an nagtao kaini sa saindo.
14 Asin dae sa anuman na pagkakataon na an Ama nagsugo sako na dapat kong ipahayag ini sa saindong mga katugangan na yaon sa Jerusalem.
15 Ni sa anuman na pagkakataon na an Ama nakapagtao sakuya nin kasugoan na dapat kong sabihon sa sainda an mapanungod sa iba pang mga tribu kan harong nin Israel, na an Ama iyo an nagpahale paluwas sa kadagaan.
16 Iyo sana ini na an Ama nagsugo sakuya, na dapat kong sabihon sa sainda:
17 Na an ibang karnero na igwa Ako na mayo sa pangon na ini; sinda man sakuyang kaipo na pagdadarahon, asin saindang madadangog an sakuyang boses; asin magkakaigwa nin sarong pangon, asin sarong parabantay.
18 Asin ngonian, nin huli sa katisoan nin liog asin daeng paniniwala sinda dae nakasabot kan sakuyang mga tataramon; kun kaya Ako pinagsugo nin Ama na dae na Ako magtaram mapanungod sa bagay na ini sa sainda.
19 Pero, katotoohan, Ako nagsasabi sa saindo na an Ama nagsugo sakuya, asin Ako magsasabi kaini sa saindo, na kamo an pinaglaen na gikan sa pag-iriba ninda nin huli kan saindang kadaendatahan; kun kaya ini nin huli kan saindang kadaendatahan na kaya sinda daeng pagkaaram saindo.
20 Asin katotoohan, Ako nagsasabi saindo giraray na an ibang mga tribu na pinaglaen kan Ama gikan sa sainda; asin iyo ini nin huli kan saindang kadaendatahan na kaya sinda daeng pagkaaram sa sainda.
21 Asin sa katotoohan Ako nagsasabi sa saindo, na kamo iyo sinda na pinanungdan na sinasabi ko: Ibang mga karnero na pagsadire ko na mayo sa pangon na ini; sinda man dapat kong darahon, asin sinda magdadangog kan sakuyang boses; asin magkakaigwa nin sarong pangon, asin sarong parapastol.
22 Asin sinda dae nakasabot sakuya, nin huli ta saindang pinaghuhuna-huna sinda iyo an mga Hentil; nin huli ta sinda dae nakasabot na an mga Hentil mapapagbag-o sa paagi kan saindang pagpapabalangibog.
23 Asin sinda dae nakasabot na sinabi ko na sinda magdadangog kan sakuyang boses; asin sinda dae nakasabot na an mga Hentil dae dapat sa arin na panahon makakadangog kan sakuyang boses--- na Ako dae dapat na magpapahiling kan sakuyang sadire sa sainda laen lang kun ini sa paagi nin Banal na Espiritu.
24 Pero hilnga, kamo parehong nakadangog kan sakuyang boses, asin nahiling Ako; asin kamo an sakuyang mga karnero asin kamo kabilang sa pag-iriba ninda na an Ama iyo an nagtao sa sakuya.

Si Jesus nagsugo: Dae ka maghusga; maghapot sa Diyos; mag-ingat sa mga palsong propeta--- Siya nagpromisa nin kaligtasan para sainda na maggigibo sa kagustuhan kan Ama. Ikumpara sa Mateo 7.

*******

Asin ngonian ini nangyaring naglipas na kan si Jesus nakapagtaram na kaining mga tataramon nagbaling giraray siya sa kadaklang tawo, asin pinagbukas nya an saiyang nguso sa sainda giraray, na nagsasabi: Katotoohan, katotoohan, ako nagsasabi sa saindo, Dae kamo maghusga, na tanganing kamo dae paghuhusgaran.
2 Nin huli ta kun anong paghuhukom an saindong pinaghusga, kamo paghuhusgaran; asin sa kun anong sukol an saimong isinukol, iyo man an ipagsusukol saimo giraray.
3 Asin tadaw baya ta nahihiling mo an muta na yaon sa mata kan saimong tugang, pero dae mo pinagkonsidera an tukod na yaon sa sadire nindong mata?
4 O paano ta kamo makapagsabi sa saindong tugang: Tuguti akong haleon an muta sa saimong mata--- asin hilnga, sarong tukod an yaon sa saindong mata?
5 Hipokrito ka, enot halea nguna an tukod kan saimong sadireng mata; asin baya ika makapaghiling nin malinaw tanganing mahale mo an muta sa mata kan saimong tugang.
6 Dae kamo magtao nin bagay na sagrado sa mga ido, ni ipagtatapok an saindong mga perlas sa mga kauringan, baka saindang pagtitimak-timakan sa irarom kan saindang mga bitis, asin magbaling saimo asin pagsakmalon ka.
7 Maghagad, asin ini ipagtatao sa saindo; maghanap, asin saindong manunumpungan; magtuktok, asin ini pagbubukasan para saindo.
8 Nin huli ta an gabos na naghahagad, makakaresibe; asin siya na naghahanap, makakanumpong; asin siya na nagtutuktok, ini pagbubuksan.
9 O ano bayang klaseng tawo an yaon sa pag-iriba nindo, siya, na kun an saiyang akeng lalake naghahagad nin tinapay, magtatao sa saiya nin gapo?
10 O kun ini naghagad nin isda, magtatao sa saiya nin sarong halas?
11 Kun kamo ngani, sarong maraot, nakakaaram kun paano magtatao nin marhay na mga regalo para sa saindong mga kaarakian, mas paano pa daw an saindong Ama na yaon sa langit na magtao nin marhay na mga bagay sa sainda na naghahagad sainda?
12 Kun kaya, an anuman na mga bagay na saimong pinagmamawot na an mga tawo boot nindong gibohon para saindo, gibohon mo man para sainda, nin huli ta iyo ini an ley asin an mga propeta.
13 Maglaog kamo sa makuputon na pintuan; nin huli ta halakbangon an pintuan, asin haluwag an dalan, na paglalakawon pasiring sa kapahamakan, asin kadakul na an nakaduman sainda na nakaralaog na duman;
14 Nin huli ta makiputon an pintuan, asin hayakpit an dalan, na paglalakawon pasiring sa buhay, asin kakadikit sinda na nakanumpong kaini.
15 Mag-ingat sa mga palsong propeta, na magdudulok saindo na may bado nin karnero, pero sa kairaroman ninda sinda mga gutom na lobo.
16 Kamo makakabisto sainda sa paagi kan saindang mga bunga. Nagtitipon daw an mga tawo nin mga ubas kan mga tunok, o mga tarom nin mga binit?
17 Magin arog kaini na an marhay na kahoy nagbubunga nin marhayon na prutas; pero an sarong koraptong kahoy nagbubunga nin sarong maraot na prutas.
18 An sarong marhay na kahoy dae makapagbunga nin mararaot na prutas, ni an sarong koraptong kahoy makapagbunga nin marhayon na prutas.
19 An lambang kahoy na dae mapagbubunga nin marhayon na prutas pagbubuhalon, asin ipaggagatong sa kalayo.
20 Kun kaya baya, sa paagi kan saindang mga prutas kamo makakabisto sainda.
21 Bakong an lambang saro na nagsasabi sa sakuya, Kagurangnan, Kagurangnan, makakalaog sa kahadean nin langit; kundi siya na naggigibo kan kagustuhan nin sakuyang Ama na yaon sa langit.
22 Kadakul an magsasabi sakuya sa aldaw na iyan: Kagurangnan, Kagurangnan, bako daw na kami nagparapropesiya sa saimong pangaran, asin sa pangaran mo nakapagpahale nin mga diyablo, asin sa pangaran mo nakapaggibo nin kadakul na magagayon na mga kaggibohan?
23 Asin pagkatapos ako magtutukdo sa sainda: Ako dae nakakabisto saindo; magharale kamo, kamo na naggigibo nin kadaendatahan.
24 Kun kaya, an siisay man na nakakadangog kaining mga tataramon ko asin maggigibo kan mga ini, Ako ipag-aarog ko siya sa sarong madunong na tawo, na nagtugdok kan saiyang harong sa ibabaw kan sarong gapo---
25 Asin an uran nagbulos, asin an mga baha nag-abot, asin an mga paros naghuyop, asin ini dae nagtumba, nin huli ta ini nakapundar sa ibabaw nin sarong gapo.
26 Asin an lambang saro na nakakadangog kaining mga tataramon ko asin naggigibo dae naggigibo kan mga ini maiaarog sa sarong tampalasan na tawo, na nagtugdok kan saiyang harong sa ibabaw nin buhangin---
27 Asin an uran nagbulos, asin an mga baha nag-abot, asin an mga paros naghuyop, asin naghampas sa harong na ini; asin ini nagtumba, asin grabeng gayo an pagkatumba kaini.

Si Jesus nagtukdo sa mga Nephita nin Pangadyeon--- Sinda magtipon nin kayamanan sa langit--- An Dose sa saindang pagmiministeryo sinugo na dae mag-isip nin mga temporal na mga bagay--- Ikumpara sa Mateo 6.

*******

Katotoohan, katotoohan, Ako nagsasabi na Ako nagmamawot na kamo dapat na magtao nin limos sa pobre; pero magdangog na kamo dae magtatao kan saindong mga limos sa atubangan nin mga tawo na tanganing mahiling ninda; ta kun bako kamo mayo nang balos gikan sa Ama na yaon sa langit.
2 Kun kaya, kun kamo magtatao kan saindong mga limos dae ka magpatugtog nin sarong trumpeta sa atubangan mo, na arog sa mgaq hepokrito sa mga sinagoga asin sa mga agihan, na tanganing makakua nin pag-omaw sa mga tawo. Katotoohan Ako nagsasabi sa saindo, sinda nakakua na kan saindang balos.
3 Pero kun ika magtatao nin mga limos dae pagtuguti na an saimong walang kamot makaaram kun ano an pinaggigibo kan saimong tuong kamot;
4 Na tanganing an saimong mga limos magin sikreto; asin an saindong Ama na nakahiling sa tago, siya an magbabalos saimo nin hayagan.
5 Asin kun kamo magpapangadye dae mo pag-arogon an mga hepokrito, nin huli ta sinda namumuot na magpangadye, na nakatindog sa mga sinagoga asin sa mga kanto kan mga agihan, na tanganing sinda magkahiriling kan mga tawo. Katotoohan Ako nagsasabi sa saindo, sinda nakakua na kan saindang balos.
6 Pero kamo, kun kamo magpapangadye, maglaog sa saindong kuwarto, asin kun ika yaon na sa laog sereduhan an saindong pinto, magpangadye sa saindong Ama na yaon sa sikreto; asin an saindong Ama na nakahiling sa tago, magbabalos sa saindo nin hayagan.
7 Pero kun ika magpangadye, dae ka maggamit nin daeng kamugtakan na mga pabalik-balik, arog kan mga pagano, nin huli ta sinda naghuhuna-huna na sinda pagdadangogon nin huli kan saindang grabeng pagtabil.
8 Dae baya kamo mag-arog sainda, nin huli ta an saindang Ama nakakaaram kan mga bagay na saindong pangangaipo bago pa man kamo maghagad saiya.
9 Sa arog kaining manera kun kaya kamo magpapangadye; Ama nyamo na yaon sa langit, pakabanalon an saimong pangaran.
10 An saimong kagustuhan an mapangyari sa daga na arog ini sa langit.
11 Asin patawadon mo kami kan samuyang kautangan, arog kan pagpapatawad nyamo sa mga parautang.
12 Asin dae mo kami ipagtugot sa tentasyon, kundi iligtas mo kami gikan sa maraot.
13 Nin huli ta saimo an kahadean, asin an kapangyarihan, asin an kamurawayan, sa daeng kasagkoran. Amen.
14 Nin huli ta, kun kamo magpapatawad sa mga tawo kan saindang mga kalapasan an saindong langitnon na Ama magpapatwad man saindo;
15 Pero kun kamo dae magpapatawad sa mga tawo kan saindang mga kalapasan dae man an saindong Ama makapagpatawad sa saindong mga kalapasan.
16 Kadagdagan pa, kun kamo mag-aayuno dae kamo mag-arog sa mga hipokrito, na igwang mamundong lalawgon, nin huli ta saindang pinagpalaen an saindang mga lalawgon na tanganing mahiling sinda kan mga tawo na nag-aayuno. Katotoohan Ako nagsasabi sa saindo, sinda nakatanggap na kan saindang mga balos.
17 Pero kamo, kun kamo mag-aayuno, lanahan nindo an saindong mga payo, asin hugasi an saindong lalawgon;
18 Na tanganing kamo dae mamangnohan kan mga tawo na nag-aayuno, kundi sa saindong Ama, na yaon sa tago; asin an saindong Ama, na nakahiling sa sikreto, magbabalos sa saindo nin hayagan.
19 Dae kamo magtago para saindong sadire nin mga kayamanan sa kinaban, kun saen an mga alibagta asin kalawang an makapgparaot, asin an mga parahabon makalusot asin makapaghabon.
20 Pero magtago kamo para sa mga sadire nindo nin kayamanan sa langit, kun saen dae an mga alibagta ni an kalawang makapagraot, asin kun saen an mga parahabon dae makakalusot asin makapaghabon.
21 Nin huli ta kun saen an saindong kayamanan, yaon man duman an saindong puso.
22 An liwanag kan hawak iyo an mata; kun kaya, kun an saindong mata nagin marhay, an saindong bilog na hawak mapapano nin liwanag.
23 Pero kun an saindong mata nagin maraot, an bilog mong hawak mapapano nin kadikloman. Kun kaya, kun an liwanag na yaon saindo nagin kadikloman, gurano pa daw kaitom an kadikloman na iyan!
24 Mayong tawo na makapagsirbe sa duwang amo; nin huli ta saiyang maaanggutan an saro asin kamumutan an saro, o kaya saiyang mapupugulan an saro asin isisikwal an saro. Dae kamo makapagsirbe sa Diyos asin sa pankinaban na kayamanan.
25 Asin ngonian ini nangyaring naglipas na kan si Jesus nakapagtaram na kaining mga tataramon siya naghiling sa dose na saiyang pinagpili, asin nagsabi sainda: Giromdoma baya an mga tataramon na sakuyang pinagsabi na. Nin huli ta hilnga, kamo iyo sinda na sakuyang pinagpirili tanganing magmiministeryo kaining mga katawohan. Kun kaya ako nagsasabi sa saindo, dae kamo mag-isip para sa saindong buhay, na kun ano an saindong pagkakakanon, o kun ano an saindong pag-iinomon; ni an para sa saindong mga hawak, na kun ano an saindong pagsusul-uton. Bako daw na an buhay mas mahalaga sa pagkakan, asin an hawak kesa pagbado?
26 Hilnga an mga gamgam sa kalangitan, nin huli ta sinda dae nagsasabwag, ni sinda mag-aani ni magtitipon sa mga kamalig; alagad an saindong langitnon na Ama iyo an nagbabahog sainda. Bako daw na kamo mas marhay pa kesa saindo?
27 Siisay daw saindo an may kaisipan na makapagdagdag nin sarong kubito sa saindong panindugon?
28 Asin tadaw baya ta mag-iisip kamo para sa pagbabado? Isipa baya na an mga liryo sa parang kun paano sinda nagtalubo; sinda dae nagbubungkal, ni sinda nagtatahi;
29 Asin alagad ako nagsasabi sa saindo, na maski si Solomon, sa bilog niyang kabantugan, dae nakapagbado na arog kan mga saro kaini.
30 Kun kaya baya, kun an Diyos pinagbabadoan niya an mga awot sa kaparangan, na ngonian panahon iyo pa, asin sa pagkaaga ipagtatapok sa hurno, magin kamo man saiyang pagbabadoan, kun kamo bakong dikit an pagtubod.
31 Kun kaya dae kamo mag-isip, na magsasabi, Ano baya an satuyang kakakanon? O baya, Ano an satuyang iinomon? O baya, Saen kita makakakua nin pagbabadoon?
32 Nin huli ta an saindong Langitnon na Ama nakakaaram na kamo nangangaipo kan gabos na ining mga bagay.
33 Pero hanapon nguna nindo enot an kahadean nin Diyos asin an saiyang pagkamatanos, asin an gabos na ining mga bagay ipagdadagdag na sana saindo.
34 Dae baya kamo magpara-isip para sa pagkaaga, nin huli ta an pagkaaga iyo man sana an mag-iisip para sa mga bagay sa aldaw na yan. Tama sana man ka-aldawan na yan para sa kagabatan kaini.