An Libro Ni Mormon (An Saro Pang Tipan Ni Jesucristo)

An mga tawo pinag-apud bilang halangkaw na mga pade nin huli kan saindang sobrang pagtubod asin marhay na mga gibo --- Sinda an magtutukdo kan mga kasugoan --- Sa paagi nin pagkamatanos sinda pinagpabanal asin makakalaog pasiring sa kapahingaloan nin Kagurangnan --- Si Melchizedek iyo kaidto an saro kan mga ini --- An mga anghel an nagbalangibog nin marhay na bareta sa bilog na kadagaan --- Sinda an magpapahayag sa tunay na pag-abot ni Cristo.

*******

Asin giraray, sakuyang mga katugangan, ako nagmamawot na sabihon sa saindong mga isip pa-abante sa panahon kan an Kagurangnang Diyos nagtao kaining mga kasugoan sa saiyang mga kaarakian; asin ako nagmamawot na kamo dapat makapaggiromdom na an Kagurangnang Diyos nag-ordina nin mga kapadean, susog sa saiyang banal na orden, na susog man sa orden kan saiyang Ake, na tanganing makakapagtukdo kan mga bagay na ini sa mga katawohan.
2 Asin idtong mga kapadean inordinahan na susog sa orden kan saiyang Ake, sa sarong manera na kun paano an mga katawohan puwedeng makakaaram sa paanong manera na tanganing mag-aasa sa saiyang Ake para sa pagtutubos.
3 Asin iyo ini an manera kun paano sinda pinag-ordinahan--- bilang pinag-aapud asin pinag-aandam gikan sa pundasyon kan mundo uyon sa pangenot na kaaraman nin Diyos, sa paagi kan saindang sobrang pagtubod asin marhay na mga gibo; na sa kapinunan pa sana ipinaubaya na magpipili sa marhay o maraot; kun kaya sinda na nagkapagpili nin marhay, asin pinaghihimong gayo an dakulang pagtubod, inaapud na may sarong banal na pangapudan, iyo, sa arog kaining banal na pangapudan na ipinag-andam na, asin uya sa sarong kaandaman nin pagtutubos para kaini.
4 Asin kaya sinda pinag-apudan kaining banal na pangapudan nin huli kan saindang pagtubod, habang an iba pinagsisikwal an Espiritu nin Diyos nin huli sa katagasan kan saindang mga puso asin sa pagkabuta kan saindang mga isip, habang, kun bako kuta na kaini sinda puwedeng nagkaigwa nin dakulang pribilihiyo na arog kan saindang mga katugangan.
5 O sa halipot na sabihon, sa enot pa sanang lugar sinda kapareho nin tindog sa saindang mga katugangan; kaya ining banal na pangapudan na ipinaghanda na gikan pa sa pundasyon kan mundo para kaini na arog sa dae pagpatagas kan saindang mga puso, bilang yaon sa laog asin sa paagi kan pagbabayad-sala kan Bugtong na Piniling Ake, na ipinag-andam---
6 Asin kaya bilang inapudan sa paagi kaining banal na pangapudan, asin pinag-ordinahan para sa halangkaw na pagkasaserdote kan banal na orden nin Diyos, na tanganing makapagtukdo kan saiyang mga kasugoan sa mga kaarakian nin mga tawo, na tanganing sinda man puwedeng makalaog pasiring sa saiyang kapahingaloan---
7 Ining halangkaw na pagkasaserdote bilang susog sa orden kan saiyang Ake, na iyo ngani an orden na gikan pa sa pundasyon kan mundo; o sa ibang tataramon, bilang mayong kapinunan nin mga aldaw o katapusan nin mga taon, bilang ipinaghanda gikan pa sa eternidad sagkod sa gabos na eternidad, na uyon sa saiyang pangenot na kaaraman sa gabos na mga bagay---
8 Ngonian sinda pinag-ordinahan sa arog kaining manera--- bilang inapudan nin sarong banal na pangapudan, asin pinag-ordinahan nin sarong banal na ordinansa, asin inako sa saindang sadire an halangkaw na pagkasaserdote kan banal na orden, na an pangapudan, asin ordinansa, asin halangkaw na pagkasaserdote, na mayong kapinunan o katapusan---
9 Kaya sinda nagin halangkaw na mga kapadean sagkod pa man, susog sa orden kan Ake, an Bugtong na Pinili kan Ama, na iyo an mayong kapinunan nin mga aldaw o katapusan nin mga taon, na iyo an pano nin grasya, katarungan, asin katotoohan. Asin kaya iyo ini. Amen.
10 Ngonian, arog kan sakong sinabi manungod sa banal na ordern, o kaining halangkaw na pagkasaserdote, nagkaigwa nin kadakul na pinag-ordinahan na asin nagin halangkaw na mga kapadean nin Diyos; sinda na nagpili na magsolsol asin magtrabaho sa pagkamatanos kesa mapahamak;
11 Kun kaya sinda pinangapudan susog kaining banal na orden, asin pinabanal, asin an saindang mga bado pinaglabhan na magin mapution sa paagi kan dugo nin Kordero.
12 Ngonian sinda, pagkatapos na pakabanalon sa paagi nin Espiritu Santo, na an saindong mga bado pinaghimong magin mapution, bilang tunay asin mayong dugta sa atubangan nin Diyos, dae makakapahiling sa kasalan laen lang kun ini may kapungotan; asin nagkaigwa nin kadakul, sobrang gayo kadakul, na pinaghimong tunay asin nakapaglaog pasiring sa kapahingaloan nin Kagurangnan saindang Diyos.
13 Asin ngonian, sakuyang mga katugangan, ako nagmamawot na kamo dapat na magpakumbaba sa saindong mga sadire sa atubangan nin Diyos, asin magdara nin bungang pan-andam para sa pagsosolsol, na tanganing kamo puwede man makalaog pasiring kaiyang kapahingaloan.
14 Iyo, magpakumbaba sa saindong mga sadire magin arog sa mga katawohan kan mga aldaw ni Melchizedek, na saro man na halangkaw na pade na susog sa kaparehong orden na sakuya nang naitaram, na nag-ako man sa saiya na halangkaw na pagkasaserdote sagkod pa man.
15 Asin iyo man sana ini kaidto na Melchizedek na si Abraham nagbayad nin mga ikapu; iyo, magin an satuyang ama na si Abraham nagbayad nin mga ikapu na ikasampulong parte kan gabos niyang pagsadire.
16 Ngonian ining mga ordinansa ipinagtao sa arog kaining manera, na tanganing kun saen an mga katawohan puwedeng maglaom sa Ake nin Diyos, ini bilang sarong tipo kan saiyang orden, o ini bilang saiyang orden, asin ini na tanganing sinda pwedeng maglaom sa saiya para sa sarong kapatawaran kan saindang mga pagkakasala, na tanganing sinda puwedeng makalaog pasiring sa kapahingaloan nin Kagurangnan.
17 Ngoning ining Melchizedek na ini sarong hade sa bilog na daga nin Salem; asin an saiyang mga katawohan nagin makusugon sa kadaendatahan asin karumputan; iyo, sinda nanggad gabos nagkaparara; sinda napano kan gabos na manera nin karigsokan;
18 Pero si Melchizedek habang may makusog na pagtubod, asin nakaresibe kan opisina nin halangkaw na pagkasaserdote na uyon sa banal na orden nin Diyos, nagparabalangibog nin pagsosolsol sa saiyang mga katawohan. Asin hilnga, sinda nanggad nagsorolsol; asin si Melchizedek iyo an nag-establisa nin katuninongan, nin huli ta siya iyo an hade kan Salem; asin siya naghade sa irarom kan saiyang ama.
19 Ngonian, nagkaigwa nin kadakul sa pagkatapos nya, pero mayo ni saro an nagin katampad; kun kaya, sa saiya sinda mas pirmeng nahihimong masambitan.
20 Ngonian ako dae kaipong gayo na otrohon pa an mga bagay; kun ano an sakuyang nasabi tama na gayud. Hilnga, an mga eskritura yaon sa saindong atubangan; kun kamo magpabaya sainda ini iyo an magdadara pasiring sa saindong sadireng kapahamakan.
21 Asin ngonian ini nangyaring naglipas na kan si Alma nakapagsabi na kaining mga tataramon sa sainda, saiyang ibiningat an saiyang kamot sa sainda asin nagkurahaw sa sarong makusugon na boses, na nagsasabi: Ngonian iyo an panahon sa pagsosolsol, nin huli ta an aldaw nin kaligtasan naghaharani nang gayo;
22 Iyo, asin an boses nin Kagurangnan, sa paagi kan nguso nin mga anghel, iyo mismo an nagdeklara kaini sa gabos na mga nasyon; iyo, naggibong maideklara ini, na tanganing sinda puwedeng magkaigwa nin marhay na bareta nin dakulang kaogmahan; iyo, asin siya naggibong ibandelyo ining mga marhay na bareta sa gabos na saiyang mga katawohan, iyo, maski sainda na nagkawararak sa harayo sa lalawgon kan kinaban; kumbaga sinda an nagdulok sa satuya.
23 Asin an mga ini ipinagpaaram sa satuya sa malinaw na termino, na tanganing kita puwedeng makasabot, na tanganing kita dae mapapasala; asin ini nin huli kan satuyang pagiging mga paralakbay sa sarong estrangherong kadagaan; kun kaya, kita may halangkaw na pabor, nin huli ta kita nagkaigwa kaining mga marhay na bareta na naipagdeklara sa satuya sa bilog na parte kan satuyang ubasan.
24 Nin huli ta hilnga, mga anghel nagdedeklara kaini sa kadaklan sa panahon ngonian sa satuyang kadagaan; asin ini nin huli sa katuyuhan na andamon an mga puso nin kaarakian nin mga tawo na tanganing tanggapon an saiyang tataramon sa panahon kan saiyang pag-aabot sa saiyang kamurawayan.
25 Asin ngonian na kita naghahalat sana sa pagdangog kan maogmahon na mga baretang pinagdeklara sa satuya sa paagi kan nguso nin mga anghel, sa saiyang pag-aabot; nin huli ta an panahon mag-aabot, kita dae sana nakakaaram kun ano na kaharani. Pinagmawot kaya nin Diyos na ini mapupuwedeng mangyayari sa sakuyang aldaw; alagad pabayae na ini magharani o maghorohaloy pa, sa laog kaini ako mag-oogma.
26 Asin ini hihimohon na maipaaram sa husto asin banal na mga tawo, sa paagi kan nguso nin mga anghel, sa panahon kan saiyang pag-aabot, na an mga tataramon kan satuyang mga ama puwedeng mautob, uyon sa mga bagay na saindang ipinagtaram manungod saiya, na idto uyon sa espiritu nin propesiya na yaon sa laog ninda.
27 Asin ngonian, sakuyang mga katugangan, ako nangingiturugan gikan sa pinakalaog na parte kan sakuyang puso, iyo, na may dakulang kahandalan pasiring sa kakulugan, na tanganing kamo magdadangog sa sakuyang mga tataramon, asin itapok an saindong mga pagkakasala, asin dae magpaliman-liman sa aldaw kan saindong pagsosolsol;
28 Alagad na tanganing kamo magpapakumbaba kan saindong mga sadire sa atubangan nin Kagurangnan, asin mag-apud sa saiyang banal na pangaran, asin magbantay asi magpangadye pirme, na tanganing kamo dae puwedeng matentaran nin sobra kan saindong makakayanan, asin kaya mapangenotan kan Banal na Espiritu, na magin magpakumbaba, mahuyo, masinunod-sunod, may pasensiya, pano nin pagkamoot asin bilog sa halawig na matinioson;
29 Igwang pagtubod sa Kagurangnan; igwa nin sarong paglaom na tanganing kamo makakatanggap nin buhay na daeng kasagkoran; na igwa kan pagkamoot nin Diyos pirme sa saindong mga puso, na tanganing kamo puwedeng maipagpalangkaw sa huring aldaw asin maglaog sa saiyang kapahingaloan.
30 Asin lugod an Kagurangnan maipaubaya sa saindo an pagsosolsol, na tanganing kamo dae makapagdara paibaba kan saiyang kaanggutan sa saindo, na tanganing kamo dae maigapos pababa sa paagi nin mga kadena nin impiyerno, na tanganing kamo dae magkapagsapo nin ikaduwang kagadanan.
31 Asin si Alma nakapagtaram nin kadakul pang gayong mga tataramon sa mga katawohan, na daeng gayo naisurat sa librong ini.