An Libro Ni Mormon (An Saro Pang Tipan Ni Jesucristo)

Si Alma asin si Amulek ipinagkunkon sa prisohan asin pinasakitan--- An mga paratubod asin an saindang mga banal na eskritura pinagsurulo nin kalayo--- An mga martir na ini pinagtanggap nin Kagurangnan sa kamurawayan--- An mga muralya nin prisohan nagkararaot asin nagkahurugmok--- Si Alma asin si Amulek iniligtas asin an saindang mga persigidor nagkagaradan.

*******

Asin ini nangyaring naglipas na pagkatapos na siya nakapagtaram na nin tapos sa mga katawohan kadakul sainda an nagtubod sa saiyang mga tataramon, asin nagpoon na magsosolsol, asin sa pagsaliksik sa mga eskritura.
2 Alagad an mas kadakul na parte sainda nagmamawot na saindang madestroso sinda Alma asin Amulek; nin huli ta sinda nagka-aranggot ki Alma, nin huli sa kalinawan kan saiyang mga tataramon ki Zeezrom; asin sinda man nagsabi na si Amulek nakapagputik sa sainda, asin nakapagbasang-basang laban sa saindang ley asin man laban sa saindang mga abugado asin mga huwes.
3 Asin sinda man nagka-aranggot kina Alma asin Amulek; asin nin huli ta sinda nakapagpatotoo nin yanong kapaliwanagan laban sa saindang mga karigsokan, sinda nagplanong garadanon sinda nin patago.
4 Alagad ini nangyaring naglipas na sinda dae nakagibo, pero sainda pinagdara sinda asin ginarapos sinda nin makukusog na mga pangapos, asin pinagdara sinda sa atubangan kan pinakapamayong huwes kan daga.
5 Asin an mga katawohan nagduruman asin nagterestigo laban sa sainda--- nagparapatotoo na sinda nagbasang-basang laban sa ley, asin kan saindang mga abugado asin mga huwes nin kadagaan, asin man sa gabos na mga katawohan na yaraon sa kadagaan; asin man nagpatotoo na igwang Diyos alagad saro sana, asin na tanganing saiyang ipadara an saiyang Ake sa mga katawohan, alagad siya dae dapat na magliligtas sainda; asin kadakul kaining mga bagay na ipinagpatotoo kan mga katawohan laban kina Alma asin Amulek. Ngonian ini ginibo sa atubangan mismo kan pinakapamayong huwes nin kadagaan.
6 Asin ini nangyaring naglipas na si Zeezrom nagngalas sa mga tataramon na saiya nang ipinagtaram; asin siya man nakaaram na manungod sa pagkabulag kan mga isip, na saiyang pinagkausa sa mga katawohan sa paagi kan saiyang kaputikang mga tataramon; asin an saiyang kalag nagpoon na malugadan sa irarom nin sarong pagkaaram kan saiyang sadireng kasalanan; iyo, siya nagpoon na mapalibutan sa paagi kan mga kasakitan nin impiyerno.
7 Asin ini nangyaring naglipas na siya nagpoon sa pagkurahaw sa mga katawohan, na nagsasabi: Hilnga, ako nagkasala, asin an mga tawong ini mayong kadugtaan sa atubangan nin Diyos. Asin siya nagpoon sa pagpapakiolay para sainda magpoon sa panahon na idto sagkud pa man; alagad saindang sinikwal siya, na nagsasabi: Bako daw na ika man nalulukuban nin diyablo? Asin sinda nagtupga nin laway sa saiya, asin pinaghaboan siya gikan sa pag-iriba ninda, asin man an gabos na nagtubod sa mga tataramon na ipinagtaram na ni Alma asin Amulek; asin sainda sindang pinagtabuyan paluwas, asin nagpadara nin mga tawo na tanganing gapoon sinda.
8 Asin saindang pinagdara an saindang mga agom na babae asin mga kaakian na magkasararo, asin an siirisay na nagtubod o natukdoan na magtubod sa tataramon nin Dios saindang pinaggibo na sinda maisapog pasiring sa kalayo; asin sainda man dinarara an saindang mga talaan na naglalaman kan banal na kasuratan, asin pinag-apon man sinda pasiring sa kalayo, na tanganing an mga ini masulo asin madestroso sa paagi nin kalayo.
9 Asin ini nangyaring naglipas na saindang dinakop si Alma asin si Amulek, asin dinarara sinda pasiring sa lugar nin pagkamartir, na tanganing saindang masaksihan an kapahamakan ninda na pinagkukunsumo nin kalayo.
10 Asin kan si Amulek nahiling an mga kasakitan kan mga kababaehan asin mga kaarakian na nagkasurulo nin kalayo, siya man nakulugan; asin siya nagsabi ki Alma: Paano daw kita makapagsaksi kaining makangorongirhat na eksena? Kun kaya kaipuhan tang ibingat an satuyang mga kamot, asin ipahiling an kapangyarihan nin Diyos na yaon satuya, asin iligtas sinda gikan sa mga laad.
11 Pero si Alma nagsabi sa saiya: An Espiritu nagpupugol sakuya na dae ko ipagbingat an sakuyang kamot; nin huli ta an kagurangnan an magtatanggap sainda sa itaas pasiring sa saiyang sadire, sa kamurawayan; asin siya nahimong magtugot na an bagay na ini mangyari, o na an mga katawohan maggibo kaining bagay sa sainda, uyon sa pagkatagas kan saindang mga puso, na tanganing an mga paghuhukom na saiyang gigibohon sa sainda sa saiyang kaanggutan puwedeng magin husto; asin an dugo kan mga inosente magtitindog bilang sarong testigo laban sainda, iyo, asin magkukurahaw nin makusugon laban sainda sa huring aldaw.
12 Ngonian si Amulek nagsabi ki Alma: Hilnga baka saindang susuloon man kita.
13 Asin si Alma nagsabi: Pabayaan tang mangyari iyan uyon sa kagustuhan nin Kagurangnan. Alagad, hilnga, an satuyang trabaho dae pa tapos; kun kaya dae ninda kita susuloon.
14 Ngonian ini nangyaring naglipas na kan an mga hawak kaidtong pinag-arapon pasiring sa kalayo nagkaturupok na, asin man an mga talaan na ipinagsapog sa kairibahan ninda, an pinakapamayong huwes nin kadagaan nag-abot asin nagtindog sa atubangan ni Alma asin ni Amulek, habang sinda nakagapos; asin saiya sindang sinampaling kan saiyang kamot sa saindang mga pisngi, asin nagsabi sa sainda: Pagkatapos kaining saindong nasaksihan, magbabalangibog pa kamo giraray sa mga katawohang ini, na sinda ipagtatapok pasiring sa sarong danaw nin kalayo asin asupre?
15 Hilnga, nahihiling nindo na mayo kamong kapangyarihan sa pagligtas sa sainda na ipinagsasapog pasiring sa kalayo; ni an Diyos iyo an nagligtas sainda nin huli ta sinda yaon sa saindong pagtubod. Asin an huwes pinagsampaling giraray sinda sa saindang mga pisngi, asin naghapot: Ano an masasabi nindo sa saindong mga sadire?
16 Ngonian an huwes na ini saro sa nasususog kan orden asin pagtubod ni Nehor, na iyo an guminadan ki Gideon.
17 Asin ini nangyaring naglipas na si Alma asin si Amulek mayong isinimbag saiya; asin saiya giraray pinakulgan sinda, asin ipinagtao sa mga opisyal sinda na tanganing kulungon sa prisohan.
18 Asin kan sinda kinulong sa prisohan nin tulong aldaw, nag-arabot-abot an kadakul na mga abugado, asin mga huwes, asin mga kapadean, asin mga paratukdo, na yaon sa propesiya ni Nehor; asin sinda nagpasiriring sa laog kan prisohan na mahiling sinda, asin sinda nagharapot sainda manungod sa kadakul na mga tataramon; alagad sinda dae nagsimbag sainda.
19 Asin ini nangyaring naglipas na an huwes nagtindog sa atubangan ninda, asin nagsabi: Tada ta habo nindong pagsimbagon an mga kahaputan kaining mga katawohan? Dae kamo nakakaaram na ako igwa nin kapangyarihan na ipagsapog kamo pasiring sa mga laad? Asin saiya sindang sinugo na magtaram; alagad sinda dae nagsimbag.
20 Asin ini nangyaring naglipas na sinda nagharale asin nagpaduman sa kaniya-kaniyang mga dalan, alagad nagbaralik giraray sa pagkaaga; asin an huwes giraray pinagsampaling sinda sa saindang mga pisngi. Asin kadakul an nag-arabot giraray, asin pinagkulgan sinda, na nagsasabi: Makapagtindog kamo giraray asin paghusgaran ining mga katawohan, asin kondenaron an samuyang ley? Kun kamo igwang gayo nin sobrang kapangyarihan tadaw ta dae nindo ipinagliligtas an saindong mga sadire?
21 Asin kadakul pang mga bagay na arog kaini an saindang isinabi sa sainda, pinaparagot an saindang mga ngipon sa sainda, asin nagtitipga nin laway sa sainda, asin nagsasabi: Ano an samuyang hitsura kun kami kondenado?
22 Asin kadakul pang mga bagay na arog kaini, iyo, gabos na manera nin arog kaining mga bagay na saindang pinagsabi sa sainda; asin kaya saindang pinagtuya-tuya sinda sa laog nin kadakul na mga aldaw. Asin dae sinda pinagtatawanan nin pagkakan na tanganing sinda magkakagurutom, asin tubig na tanganing sinda magkakaparaha; asin saind man sindang hinalean kan saindang mga bado na tanganing sinda nakahuba sana; asin kaya sinda nagagapusan nin makukusog na mga panggapos, asin ikinunkon sa laog nin prisohan.
23 Asin ini nangyaring naglipas pagkatapos na sinda nagtios sa laog nin kadakul na mga aldaw, (asin yaon kaidto sa ikadosing aldaw, sa ikasampulong bulan, sa ikasampulong taon kan pagpapamahala nin mga huwes sa mga katawohan nin Nephi) na an pinakapamayong huwes sa bilog na kadagaan nin Ammonihah asin kadakul sa saindang mga paratukdo asin saindang mga abugado nagpasiriring sa prisohan kun saen si Alma asin si Amulek nagkagarapos nin mga panggapos.
24 Asin an pinakapamayong huwes nagtindog sa atubangan ninda, asin nagpakulg sainda giraray, asin nagsabi sa sainda: Kun kamo igwa nin kapangyarihan nin Diyos iligtas an saindong mga sadire gikan kaining mga pagkakagapos, asin pagkatapos kami maniniwala na an Kagurangnan dedestrosohon ining mga katawohan na uyon sa saindong mga tataramon.
25 Asin ini nangyaring naglipas na sinda gabos nagdurulok asin pinakulgan sinda, na nagsasabi nin arog man sanang mga tataramon, magin hanggan sa pinakahuri; asin kan an pinakahuri nakapagtaram na sa sainda an kapangyarihan nin Diyos nag-abot kina Alma asin Amulek asin sinda nagburuhat asin nagtirindog sa saindang mga bitis.
26 Asin si Alma nagkurahaw, na nagsasabi: Ano kahaloy na kami magsasapo kaining dakulang mga kasakitan, O Kagurangnan? O Kagurangnan, tawan mo kami nin kusog uyon sa samuyang pagtubod na yaon ki Cristo, magin hanggan sa samuyang kaligtasan. Asin saindang nagkapurutol an mga gapos na nakagapos sa sainda; asin kan magkahiriling nin mga katawohan ini, sinda nagpoon na magdurulagan, nin huli kan pagkatakot sa kapahamakan na nag-abot sa sainda.
27 Asin ini nangyaring naglipas na grabeng gayo an saindang katakutan na tanganing sinda nakaturumba sa daga, asin dae nagkakurua an paluwas na pinto kan prisohan; asin an daga naglinog nin makusog, asin an mga muralya nin prisohan nagkabaranga sa duwa, na tanganing nagkaturumba sinda sa daga; asin an pinakapamayong huwes, asin an mga abugado, asin an mga kapadean, asin an mga paratukdo, na iyo an nagpakulog kina Alma asin Amulek, nagkagaradan sa paagi kan pagkadat-og kan mga ini.
28 Asin si Alma asin si Amulek nakaruluwas sa prisohan, asin sinda dae nakulgan; nin huli ta an Kagurangnan nagtao sa sainda nin kapangyarihan, na uyon sa saindang pagtubod na yaon ki Cristo. Asin sinda diretsong nagkaruluwas sa prisohan; asin sinda nagkahurubadan na kan saindang mga gapos; asin an prisohan naghugnak na sa daga, asin an lambang kalag na yaon sa mga muralya kaini, laen lang kina Alma asin Amulek, nagkagaradan; asin sinda diretsong nagpasiring sa siyudad.
29 Ngonian an mga katawohan na nakadangog nin dakulang kariribokan nakadalan na nag-arabot-abot na nagkatiripong gayo an kadaklan na tanganing aramon an kausa kaini; asin kan mahiling ninda si Alma asin Amulek na nagruruluwas gikan sa prisohan, asin an mga muralya kaini nagkaturumba sa daga, sinda inabutan nin dakulang pagkatakot, asin nagdurulag gikan sa presensiya ni Alma asin ni Amulek na baga arog sa sarong kanding na nagdudurulag kairiba an saindang mga ake paharayo sa duwang leon; asin kaya sinda nagdurulag gikan sa presensiya ninda Alma asin Amulek.