An Libro Ni Mormon (An Saro Pang Tipan Ni Jesucristo)

An mga Lamanita dinestroso an mga katawohan nin Ammonihah--- Si Zoram iyo an nagpamayo sa mga Nephita sa kapangganahan laban sa mga Lamanita--- Si Alma asin Amulek asin kadakul pang iba nagbalangibog nin tataramon--- Sinda nagparatukdo na pagkatapos sa saiyang pagkabuhay-liwat si Cristo magpapahiling sa mga Nephita.

*******

Asin ini nangyaring naglipas sa ika-onseng taon nin pagpapamahala kan mga huwes sa bilog na katawohan nin Nephi, sa ikalimang aldaw kan ikaduwang bulan, na nagkaigwa nin grabeng katuninongan sa kadagaan nin Zarahemla, na dae nagkaigwa nin mga giyera o pagralaban-laban sa laog nin nagkapirang mga taon, magin hanggan sa ikalimang aldaw kan ikaduwang bulan sa ika-onseng taon, nagkaigwa nin sarong pagkururahaw nin giyera na nadangog sa bilog na kadagaan.
2 Nin huli ta hilnga, an mga kasundaluhan kan mga Lamanita nag-arabot sa may kaparangang parte, pasiriring sa mga kasagkoran nin kadagaan, magin hanggan sa siyudad nin Ammoniha, asin nagpoon sa panggagadan sa mga katawohan asin dinestroso an siyudad.
3 Asin ngonian ini nangyaring naglipas, bago pa man makapagtipon nin maninigong mga paralaban na tanganing sinda paaratrason paluwas sa kadagaan, sainda nang nadestroso an mga katawohan na yaraon sa laog kan siyudad nin Ammonihah, asin sa iba man na yaraon sa mga kasagkoran nin Noah, asin dinarara an iba bilang mga bihag pasiring sa kaparangan.
4 Asin ngonian ini nangyaring naglipas na an mga Nephita nagmarawot na mabawi sinda na nagkadarara paharayo bilang bihag pasiring sa kaparangan.
5 Kun kaya, siya bilang pingngaranan na pinakapamayong kapitan kan bilog na kasundaluhan kan mga Nephita, (asin an saiyang pangaran iyo si Zoram, asin siya igwa nin duwang akeng lalake, si Lehi asin Aha)--- ngonian si Zoram asin an saiyang duwang akeng lalake, na nakakaaram na si Alma iyo an halangkaw na pade sa bilog na simbahan, asin nakadangog na siya igwa nin espiritu kan propesiya, kun kaya sinda nagpaduman sa saiya asin nagmawot sa saiya na maaraman kun an Kagurangnan nagtutugot na sinda magpasiriring sa kaparangan na tanganing haranapon an saindang mga katugangan, na pinagdarara bilang bihag kan mga Lamanita.
6 Asin ini nangyaring naglipas na si Alma naghapot sa Kagurangnan mapanungod kaining bagay. Asin si Alma nagbalik asin nagsabi sa sainda: Hilnga, an mga Lamanita magbabalyo sa salog nin Sidon sa may sur na parte nin kaparangan, paharayo paitaas lampas sa mga kasagkoran kan daga nin Manti. Asin hilnga duman nindo sinda mananagboan, sa may sirangang parte kan salog nin Sidon, asin duman an Kagurangnan iyo an magtatao sa saindo kan saindong mga katugangan na nagkadarara bilang bihag kan mga Lamanita.
7 Asin ini nangyaring naglipas na si Zoram asin an saiyang mga akeng lalake nagbalyo sa salog Sidon, kairiba an saindang mga kasundaluhan, asin nagralakbay paharayo lampas sa mga kasagkoran nin Manti pasiring sa sur na parte nin kaparangan, na yaon sa sirangang parte kan salog nin Sidon.
8 Asin saindang nagka-arabutan an mga paralaban kan mga Lamanita, asin an mga Lamanita nagkawararak asin nag-aratras pasiring sa kaparangan; asin saindang nagkabarawi an saindang mga katugangan na nagkadarara bilang mga bihag nin mga Lamanita, asin mayo ni saro sa mga kalag an nawara sa mga nagkabirihag. Asin sinda pinagdarara kan saindang mga katugangan na tanganing pagsadirehon an saindang mga kadagaan.
9 Asin kaya nagtapos an ika-onseng taon kan mga huwes, an mga Lamanita na pina-aratras paluwas sa kadagaan, asin an mga katawohan nin Ammonihah nagkaderestroso; iyo, an lambang nabubuhay na kalag nin mga Ammonihita nagkaderestroso, asin man an saindang bantog na siyudad, na saindang pinagsasabi na maski an Diyos dae kayang destrosohon ini, nin huli kan kadakulaan kaini.
10 Pero hilnga, sa sarong aldaw binayaan na mayong tawo; asin an mga bangkay pinagkakarakan nin mga ayam asin mga layas na mga hayop nin kaparangan.
11 Daeng pagkukulang, pagkatapos nin kadakul na mga aldaw an saindang garadan na mga hawak pinagparatong-patong sa lalawgon kan kinaban, asin an mga ini pinagtarambunan nin sarong hababawon na lulubngan. Asin ngonian grabeng gayo an parong kan mga ini na tanganing an mga katawohan dae kayang magpaduman tanganing pagsadirehon an kadagaan nin Ammonihah sa laog nin kadakul na mga taon. Asin ini pinag-aapud na an lugar nin kapahamakan kan mga Nehor; nin huli ta sinda yaon sa propesyon ni Nehor, na nagkagaradan; asin an saindang mga kadagaan nagin yaon sa pagkahamak.
12 Asin an mga Lamanita dae na giraray nag-abot sa pagkipaggiyera laban sa mga Nephita hanggan sa ika-katorseng taon nin pagpapamahala kan mga huwes sa bilog na katawohan nin Nephi. Asin kaya sa laog nin tulong taon na an mga katawohan nin Nephi nagkaigwa nin padagos na katuninongan sa bilog na kadagaan.
13 Asin si Alma asin Amulek nagpadagos sa pagbabalangibog nin pagsosolsol sa mga katawohan sa saindang mga templo, asin sa saindang mga sanktuwaryo, asin man sa saindang mga sinagoga, na ipinagtugdok na arog na gayo sa manera kan mga Hudiyo.
14 Asin habang kadakul na gayo an nakadangog kan saindang mga tataramon, sa sainda sinda nagheras kan tataramon nin Diyos, na mayong pinipiling mga persona, sa pirmeng pagkakataon.
15 Asin kaya iyo ini an padagos na ginibo ni Alma asin Amulek, asin man kan kadakul pang iba na pinili para sa pagtrabaho, na tanganing magbalangibog nin tataramon sa kabilugan nin kadagaan. Asin an pagkatugdas nin simbahan nagin bantog sa kabilugan nin kadagaan, sa gabos na rehiyon sa palibot, sa gabos na mga katawohan nin mga Nephita.
16 Asin mayo nin daeng pagkapararehas sa kairibahan ninda; an Kagurangnan pinagpabulos an saiyang Espiritu sa bilog na lalawgon nin kadagaan na tanganing ipag-andam an mga isip nin mga kaarakian nin mga tawo, o na tanganing ipag-andam an saindang mga puso sa pagtanggap nin tataramon na dapat na ipagtukdo sa pag-iriba ninda sa panahon kan saiyang pag-abot---
17 Na tanganing sinda dae puwedeng magtinagas laban sa tataramon, na tanganing sinda dae puwedeng magin daeng paniniwala, asin magpasiring sa kapahamakan, kundi na tanganing sainda puwedeng tanggapon an tataramon na may pagka-ogma, asin bilang sarong sanga na maisugpon sa tunay na puno nin ubas, na tanganing sinda puwedeng makalaog pasiring sa kapahingaloan nin Kagurangnan saindang Diyos.
18 Ngonian ining mga kapadean na nagpaduman sa mga katawohan nagbalangibog laban sa gabos na mga kaputikan, asin sa mga darayaan asin sa mga iringgitan, asin sa mga iriwal-iwal, asin sa mga malisya, asin sa mga karantiyawan, asin harabonan, pananalakat, pandarambong, panggagadan, pakikiapid, asin sa gabos na manera nin kahalayan, nagtutukdo na an mga bagay na ini dae dapat na mangyayari---
19 Pinapakusog an mga bagay na harani nang gayong mag-abot; iyo, pinapakusog na itinutukdo an pag-abot kan Ake nin Diyos, an saiyang mga pagpapakasakit asin kagadanan, asin man pagkabuhay-liwat nin mga gadan.
20 Asin kadakul sa mga katawohan an nagharapot manungod sa lugar na kun saen an Ake nin Diyos mag-aabot; asin sinda nagtukdo na siya magpapahiling sa sainda pagkatapos na siya mabuhay-liwat; asin kaini an mga katawohan nakadangog na may dakulang kaogmahan asin pagka-ogma.
21 Asin ngonian pagkatapos na an simbahan naitugdas na sa bilog na kapalibutan nin kadagaan--- na nagkaigwa nin kapangganahan kontra sa diyablo, asin an tataramon nin Diyos ipinagbalangibog sa tunay na katotohanan kaini sa bilog na kadagaan, asin an Kagurangnan nagpabulos kan saiyang mga biyaya sa mga katawohan--- kaya nagtapos an ika-katorseng taon kan pagpapamahala nin mga huwes sa bilog na katawohan nin Nephi.