An Libro Ni Mormon (An Saro Pang Tipan Ni Jesucristo)

Si Lamoni nakaresibe nin liwanag kan daeng kasagkoran na buhay asin nahiling an Paratubos ---- An saiyang bilog na pagharongon nahulog sa sarong daeng pagkamangno, asin an iba nakahiling nin mga anghel--- Si Ammon milagrosong pinagpreserba--- Siya nagbunyag nin kadakul asin nag-establisa nin sarong simbahan sa pag-iriba ninda.

*******

Asin ini nangyaring naglipas na sa pagkatapos nin duwang aldaw asin duwang banggi na sainda na kuta nang dadarahon an saiyang hawak asin ilubong na sa sarong lulubngan, na saindang pinaghimo para sa katuyuhan na paglulubngan kan saindang mga gadan.
2 Ngonian an reyna na nakadangog sa kabantugan ni Ammon, kun kaya siya nagpadara asin nagmawot na siya magdulok sa saiya.
3 Asin ini nangyaring naglipas na si Ammon naggibo susog sa pagkasugo saiya, asin nagpasiring palaog sa pagdulok sa reyna, asin nagmawot na maaraman kun ano an gusto niya na saiyang dapat na gibohon.
4 Asin siya nagsabi sa saiya: An mga surugoon kan sakuyang agom iyo an nagpaaram kaini sa sakuya na ika sarong propeta nin sarong banal na Diyos, asin na ika may kapangyarihan na gumibo nin kadakul na mga darakulang kaggibohan sa saiyang pangaran;
5 Kun kaya, kun iyo ini an kaso, ako nagmamawot na dapat kang magpasiring sa laog asin hilngon an sakuyang agom, nin huli ta siya nakahigda sa saiyang higdaan sa laog nin duwang aldaw asin duwang banggi; asin an iba nagsasabi na siya bako pang gadan, pero an iba man nagsasabi na siya gadan na asin na siya namamarong na, asin na siya dapat nang ilaog sa lulubngan; pero para sa sadire ko, na sa sakuya siya dae man nagbabata.
6 Ngonian, iyo ini na si Ammon an nagmawot, nin huli ta siya nakaaram na si hadeng Lamoni yaon sa laog kan kapangyarihan nin Diyos; siya nakaaram na an madiklom na talukbong nin daeng pagtubod iyo an ipinag-apon sa harayo gikan sa saiyang isip, asin an liwanag na iyong gayo an nakapagpa-ilaw sa saiyang isip, na iyo an liwanag kan kamurawayan nin Diyos, na iyo an sarong makangangalas na liwanag kan saiyang karahayan--- iyo, an liwanag na ini nakapagtao nin grabeng kaogmahan sa saiyang kalag, an panginuron nin kadikloman nagkapururak, asin an liwanag nin daeng kasagkoran na buhay an naglalaad sa saiyang kalag, iyo, siya nakakaaram na iyo ini an nakadaog sa saiyang natural na kamugtakan, asin siya pinagdara pasiring sa Diyos---
7 Kun kaya, kun ano an pinagmawot kan reyna sa saiya iyo man sana an saiyang minawot. Kun kaya siya nagduman palaog na tanganing hilingon an hade uyon sa kagustuhan kan reyna saiya; asin saiyang nahiling an hade, asin siya nakakaaram na siya bako pang gadan.
8 Asin siya nagsabi sa reyna: Siya bako pang gadan, pero siya nagtuturog sa Diyos, asin sa pagkaaga siya magbubuhat giraray; kun kaya dae nindo siya ipaglubong.
9 Asin si Ammon nagsabi sa saiya: Nagtutubod ka kaini? Asin siya nagsabi sa saiya: Ako mayong ibang saksi kundi an saimong tataramon, asin an tataramon kan samuyang mga surugoon; daeng pagkukulang na ako nagtutubod na ini mangyayari uyon sa saimong ipinagsabi.
10 Asin si Ammon nagsabi sa saiya: Paladan ka nin huli kan saimong nagsosobrang gayong pagtubod, ako nagsasabi sa saimo, babae, mayo pang arog kaining pagtubod sa pag-iriba kan bilog na katawohan nin mga Nephita.
11 Asin ini nangyaring naglipas na siya nagbantay sa may higdaan kan saiyang agom, magpoon sa oras na idto hanggan sa oras kan pagkaaga na si Ammon iyo an nagtermino na siya magbubuhat.
12 Asin ini nangyaring naglipas na siya nagbuhat, uyon sa mga tataramon ni Ammon; asin habang siya nagbubuhat, saiyang ipinag-abot an saiyang kamot sa babae, asin nagsabi: Bendisyunan man lugod an pangaran nin Diyos, asin paladan ka.
13 Nin huli ta seguradong ikaw nabubuhay pa, hilnga, nahiling ko an sakuyang Paratubos; asin siya maabot, asin ipapangaki nin sarong babae, asin saiyang tutubuson an bilog na nilalang na tawo na nagtutubod sa saiyang pangaran. Ngonian, kan saiya nang naisabi an mga tataramong ini, an siyang puso nagdakula sa laog niya, asin siya pinanluyahan giraray na may kaogmahan; asin an reyna man pinanluyahan, bilang nadaog sa paagi kan Espiritu.
14 Ngonian si Ammon na nakamasid na an Espiritu nin Kagurangnan nagbulos uyon sa saiyang mga pangadyeon sa mga Lamanita, saiyang mga katugangan, na iyo an nagkausa nin grabeng pagmumundo sa pag-iriba kan mga Nephita, o sa pag-iriba kan bilog na katawohan nin Diyos nin huli kan saindang mga kadaendatahan asin saindang mga tradisyon, siya nagluhod, asin nagpoon na magpabulos kan saiyang kalag sa pagpangadye asin pagpapasalamat sa Diyos nin huli kan saiyang naginibohan sa saiyang mga katugangan; asin siya man nadadaog na may kaogmahan; asin kaya sinda gabos na tulo napalugmok sa daga.
15 Ngonian, kan an mga surugoon kan hade nakasaksi na sinda nagkaturumba sinda man nagpoon sa pag-apud sa Diyos, nin huli ta an pagkatakot sa Kagurangnan nag-abot man sa sainda, nin huli ta sinda iyo an nagtindog sa atubangan nin hade asin nagsaksi sa saiya manungod sa makusog na kapangyarihan ni Ammon.
16 Asin ini nangyaring naglipas na sinda nag-apud sa pangaran nin kagurangnan, sa abot kan saindang kusog, maski hanggan sinda gabos nagkaturumba sa daga, laen kan saro sa mga babaeng Lamanita, na an pangaran iyo si Abish, siya na napagbago na nin boot sa Kagurangnan sa kadakul nang taon, nin huli kan sarong pambihirang bisyon kan saiyang ama---
17 Kaya, bilang napagbago na nin boot sa Kagurangnan, asin dae pa lamang niya ini ipinagpaaram, kun kaya, kan saiyang nasaksihan na an gabos na mga surugoon ni Lamoni nagkaturumba sa daga, asin man an saiyang amang, an reyna, asin an hade, asin si Ammon na nakadapa sa daga, siya nakakaaram na idto nangyari nin huli sa kapanagyarihan nin Diyos; asin naghuhuna na an oportunidad na ini, sa paagi kan paghimong ipaaram sa mga katawohan kun ano talaga an nangyari sa pag-iriba ninda, na sa paagi nin pagsasaksi kaining eksena ini magkakausa sa sainda na magtubod sa kapangyarihan nin Diyos, kun kaya siya nagparadalagan sa harong-harong, pinaghihimo ining maipaaram sa mga katawohan.
18 Asin sinda nagpoon na mag-asembliya kan saindang mga sadire sa laog kan harong nin hade. Asin nag-arabot an kadakul, asin sa saindang pagkangalas, saindang nahiling an hade, asin an reyna, asin an saindang mga surugoon na nakaturumba sa daga, asin sinda gabos nagkahirigda na garo baga sinda garadan na; asin sainda man nahiling si Ammon, asin hilnga, siya sarong Nephita.
19 Asin ngonian an mga katawohan nagpoon sa paggugurumod-gumod sa saindang mga sadire; an iba nagsasabi na idto sarong dakulang karaotan na nag-abot sa sainda, o sa hade asin sa saiyang harong, nin huli ta siya nagtugot na an sarong Nephita mag-erok sa kadagaan.
20 Alagad an iba pinagsaway sinda, na nagsasabi: An hade iyo an nagdara kaining karaotan sa saiyang harong, nin huli ta ginadan niya an saiyang mga surugoon na iyo an nagwaratak-watak kan saindang mga kakarnerohan sa may tubig nin Sebus.
21 Asin sinda man pinagsabihan kaidtong mga tawo na nagtindog sa tubig nin Sebus asin iyo an nagwaratak-watak sa mga kakarnerohan na pagsadire kan hade, nin huli ta anggot sinda ki Ammon nin huli kan numerong saiyang nagkagaradan na saindang mga katugangan sa may tubig nin Sebus, habang pinagdepensahan an mga kakarnerohan nin hade.
22 Ngonian, an saro sainda, na an tugang na lalake nagadan kan espada ni Ammon, bilang grabeng gayo an kanggutan ki Ammon, nagubnot kan siyang espada asin nagdulok na tanganing saiyang itaga ki Ammon, sa paggadan saiya; asin habang saiyang pinagtataas an espada sa pagtaga saiya, hilnga, siya natumbang gadan.
23 Ngonian satuyang nasaksihan na si Ammon dae kayang gadanon, nin huli ta an Kagurangnan nagsabi ki Mosiah, an saiyang ama: Ako an magliligtas saiya, asin ini mangyayari saiya na uyon sa saimong pagtubod--- kun kaya, si Mosiah ipinagkatiwala siya sa Kagurangnan.
24 Asin ini nangyaring naglipas na kan an kadaklang tawo nakasaksi na an tawo natumbang gadan, na iyo an nagtaas kan espada sa paggadan kuta na ki Ammon, an pagkatakot an nag-abot sa sainda gabos, asin sinda dae na nagbingat pa kan saindang mga kamot na magduta saiya o sa kiisay man sainda na nagkaturumba; asin sinda nagpoon na magngalas giraray sa pag-iriba kan saindang mga sadire na kun ano man nanggad an nagkausa kaining dakulaon na kapangyarihan, o kun ano an boot sabihon kan gabos na ining mga bagay.
25 Asin ini nangyaring naglipas na an kadaklan sa sainda na nagsabi na si Ammon iyo an Bantugang Espiritu, asin an iba man nagsabi na siya ipinadara kan Bantugang Espiritu;
26 Alagad an iba nagsabi sa sainda gabos, na nagsasabi na siya sarong halimaw, o ipinadara gikan sa mga Nephita na tanganing padusahan sinda.
27 Asin igwang iba na nagsabi na si Ammon iyo an ipinadara kan Bantugang Espiritu sa pagpasakit sainda nin huli kan saindang mga kadaendatahan; asin na an Bantugang Espiritu iyo an pirmeng nagbabantay sa mga Nephita, na iyong gayo an nagliligtas sainda paluwas sa saindang mga kamot; asin sinda nagsabi na iyo ini an Bantugang Espiritu na iyo an naderestroso nin kadakul na gayo na saindang mga katugangan, an mga Lamanita.
28 Asin kaya an pag-iiriwal-iwal nagpoon na magin mataromon na gayo sa pag-iriba ninda. Asin habang sinda nagkakadireskusyunan, an babaeng surugoon na iyo an nagkausa kan kadaklang-tawo na magkasararong magtiripon nag-abot, asin kan saiyang nahiling an pag-iiriwal-iwal na nangyari sa pag-iriba nin kadaklang-tawo siya napano nin grabeng gayong kamundoan, magin hanggan sa pagluha.
29 Asin ini nangyaring naglipas na siya nagdulok asin kinaputan an reyna sa kamot, na baka laman siya puwedeng mapabuhat gikan sa daga; asin habang saiyang nadutaan an kamot siya nagbuhat asin nagtindog sa saiyang mga bitis, asin nagkurahaw nin sarong dakulaong boses, na nagsasabi: O banal na Jesus, na iyo an nagligtas sakuya gikan sa makangorongirhat na impiyerno! O banal na Diyos, na igwa nin pagkaherak kaining mga katawohan!
30 Asin kan siya nakapagsabi kaini, saiyang pinagdaop an saiyang mga kamot, na napapano nin kaogmahan, nagtataram nin kadakul na mga tataramon na dae naiintindihan; asin kan saiya nang naggibo ini, saiyang kinua an hade, si Lamoni, sa paagi nin kamot, asin hilnga siya nagbuhat man asin nagtindog sa saiyang mga bitis.
31 Asin siya, tulos-tulos, na nahihiling an pag-iiriwal-iwal sa pag-iriba kan saiyang mga katawohan, nagpaduman asin nagpoon sa pagsaway sainda, asin sa pagtukdo sainda nin mga tataramon na saiyang nadangog gikan sa nguso ni Ammon; asin habang kadakul an nakadangog kan saiyang mga tataramon na nagturubod, asin napagbago an boot sa Kagurangnan.
32 Alagad igwa nin kadakul sa pag-iriba ninda na habong magdangog sa saiyang mga tataramon; kun kaya sinda nagharale pasiring sa saindang sadireng dalan.
33 Asin ini nangyaring naglipas na kan si Ammon nagbuhat naman siya man nagtukdo sa sainda, asin man an gabos na mga surugon ni Lamoni; asin sinda gabos nagpahayag sa mga katawohan nin kaparehong bagay--- na tanganing an saindang mga puso nagkabarago; na tanganing sinda nawaraan na nin pagmawot na gumibo pa nin maraot.
34 Asin hilnga, kadakul an nagdeklara sa mga katawohan na tanganing sinda nakahiling nin mga anghel asin nakipag-olay-olay sainda; asin kaya sinda nagtaram sainda nin mga bagay nin Diyos, asin kan saiyang pagkamatanos.
35 Asin ini nangyaring naglipas na igwa nin kadakul na nagtutubod sa saindang mga tataramon; asin an kadakul na nagtubod binurunyagan; asin sinda nagin sarong matanos na mga katawohan, asin sinda nagtugdok nin sarong simbahan sa pag-iriba ninda.
36 Asin kaya an gibo nin Kagurangnan nanggad nagpoon sa pag-iriba kan mga Lamanita; kaya an nagpoon na pabuluson an saiyang Espiritu sa sainda; asin samuyang nasaksihan na an saiyang takyag nakaunat sa gabos na mga katawohan na magsosolsol asin magtutubod sa saiyang pangaran.