An Libro Ni Mormon (An Saro Pang Tipan Ni Jesucristo)

Si Zenos nagtukdo na an mga tawo dapat na magpangadye asin magsamba sa gabos na mga lugar, asin na an mga paghuhukom ipinagwaksi nin huli sa Ake--- Si Zenock nagtukdo na an pagkaherak ipinaggagawad nin huli sa Ake--- Si Moises ipinaglangkaw sa kaparangan na siring sa sarong tipo kan Ake nin Diyos.

*******

Ngonian pagkatapos na si Alma nakapagtaram na kaining mga tataramon, sinda nagpaabot sa saiya na may kamawotan na makaaram kun sinda dapat na magtubod sa sarong Diyos, na tanganing saindang maguno ining prutas na saiyang pinagsasabi, o kun paano ninda dapat itanom an pisog, o an tataramon na saiyang pinagsasabi na, na saiyang pinagsabi na kaipuhang itanom sa saindang mga puso; o sa anong manera ninda dapat na poonan na ipag-ehersisyo an saindang pagtubod.
2 Asin si Alma nagsabi sa sainda: Hilnga, kamo nakapagsabi na na kamo dae makakapagsamba sa saindong Diyos nin huli ta kamo pinag-apon paluwas sa saindong mga sinagoga. Pero hilnga, ako nagsasabi sa saindo, kun saindong pinaghuhuna-huna na kamo dae makakapagsamba sa Diyos, kamo napapasalang gayo, asin kamo dapat na maghanap sa mga kasuratan; kun kamo naghuhuna-huna na sinda nakapagtukdo na saindo kaini, kamo dae nakasabot sa mga ini.
3 Kamo daw nakakagiromdom na saindo nang nabasa kun ano baya si Zenos, an propetang luma, na nakapagsabi manungod sa pagpangadye asin pagsamba?
4 Nin huli ta siya nagsabi: Ika pano nin pagkaherak, O Diyos, nin huli ta saimong nadangog an sakuyang pangadyeon, maski ngani ako yaon kaidto sa may kaparangan; iyo, ika nanggad pano nin pagkaherak kan ako maagpangadye manungod sainda na sakuyang mga kaiwal, asin saindo sindang pinagpatunod pasiring sakuya.
5 Iyo, O Diyos, asin ika nanggad pano nin pagkaherak sa sakuya kan ako magkurahaw sa saimo sa sakuyang patanuman; kan ako nagtangis sa saimo sa sakuyang pagpapangadye, asin ika nanggad nakadangog sakuya.
6 Asin giraray, O Diyos, kan ako nagpasiring sa sakuyang harong ika nanggad nakadangog sakuya sa sakuyang pangadyeon.
7 Asin kan ako naglaog sa sakuyang kuwarto, O Kagurangnan, asin nagpangadye sa saimo, ika nanggad nakadangog sakuya.
8 Iyo, ika pano-pano nin pagkaherak sa saimong mga kaakian kan sinda nagtatangis sa saimo, na tanganing madangog mo sinda asin bako kan mga tawo, asin ika nanggad nagdadangog sainda.
9 Iyo, O Diyos, ika nanggad maheherakon sa sakuya, asin nakadangog kan sakuyang mga pagkukurahaw sa tahaw kan saimong mga kongregasyon.
10 Iyo, asin ika nakadangog man sakuya kan ako pinag-apon paluwas asin pinagtutuya-tuya kan sakuyang mga kaiwal; iyo, ika nanggad nadangog an sakuyang mga kinurahaw, asin naanggot sa sakuyang mga kaiwal, asin saimo nanggad sindang binisita sa saimong kaanggutan na may hidaling kapahamakan.
11 Asin saimong nadangog ako nin huli kan sakuyang mga kasakitan asin kan sakuyang sinseridad; asin ini nin huli kan saimong Ake na ika nagin maheherakon sakuya, kun kaya ako magkukurahaw sa saimo sa gabos kong mga kasakitan, nin huli ta sa saimo ako nag-oogma; nin huli ta saimong ipinagharayo an saimong mga paghuhukom sa sakuya, nin huli kan saimong Ake.
12 Asin ngonian si Alma nagsabi sa sainda: Kamo daw nagtutubod kaining mga kasuratan na pinagsurat nindang mga kaggurang?
13 Hilnga, kun kamo maggigibo, kamo dapat na magtubod kun ano an pinagsasabi ni Zenoz; nin huli ta, hilnga siya nagsabi: Saimong ipinagharayo an saimong mga paghuhukom nin huli kan saimong Ake.
14 Ngonian hilnga, sakuyang mga katugangan, ako maghahapot kun kamo baya nagbabasa nin mga kasuratan? Kun iyo, paano baya kamo daeng pagtubod sa Ake nin Diyos?
15 Nin huli ta ini dae nasusurat na si Zenos sana an nagtaram kaining mga bagay, pero si Zenock man baya nagtaram kaining mga bagay---
16 Nin huli ta hilnga, siya nagsabi: Ika nanggad anggot, O Kagurangnan, sa katawohang ini, nin huli ta sinda dae makaka-intende sa saimong mga pagkaherak na saimong ipinaggawad na sa sainda nin huli kan saimong Ake.
17 Asin ngonian, sakuyang mga katugangan, saindong nahihiling an sarong ikaduwang propeta na kaggurang na iyo an nagsaksi kan Ake nin Diyos, asin nin huli ta an mga katawohan habong makasabot sa saiyang mga tataramon sinda pinaggapo siya hanggan magadan.
18 Pero hilnga, bako lang ini gabos; bako lang ini sinda an nagparataram manungod sa Ake nin Diyos.
19 Hilnga, siya pinagtaram ni Moises; iyo, asin hilnga sarong tipo an ipinaglangkaw sa kaparangan, na an siisay man an maghihiling kaini puwedeng mabubuhay. Asin kadakul an naghiriling asin nabuhay.
20 Alagad kadikit an nakaka-intende sa kahulugan kaining mga bagay, asin ini nin huli sa katagasan kan saindang mga puso. Pero igwa nin kadakul na pinatagas talaga na tanganing sinda habong maghihiling, kun kaya sinda nagkaparara. Ngonian an rason kun tadaw ta habo nindang maghiling iyo na nin huli ta sinda habong maniwala na ini dae magbubulong sa sainda.
21 O sakuyang mga katugangan, kun kamo mararahay sa paagi sana sa pagputitok kan saindong mga mata na tanganing kamo mararahay, kamo daw habong maghiling tulos-tulos, o saindo daw baya pagpapatagason an saindong mga puso sa daeng pagtutubod, asin magin hugakon, na tanganing kamo dae ipagputitok an saindong mga mata, na tanganing kamo mapapara?
22 Kun iyo ini, an pagsakit mag-aabot sa saimo; pero kun bako, kaya ipaghiling mo sa palibot an saimong mga mata asin magpoon na magtubod sa Ake nin Diyos, na siya mapadigde sa pagtubos kan saiyang mga katawohan; asin ta siya magtitios asin magagadan sa pagbabayad-sala para sa saindang mga kasalanan; asin ta siya mabubuhay giraray gikan sa mga gadan, na tanganing darahon na mangyari an pagkabuhay-liwat, na tanganing an gabos na mga tawo magtitindog sa atubangan niya, na tanganing paghuhusgaran sa pinakahuri asin aldaw nin paghuhukom, na uyon sa saindang mga nakaginibohan.
23 Asin ngonian, sakuyang mga katugangan, ako nagmamawot na kamo magtanom kaining tataramon sa saindong mga puso, asin habang ini nagpopoon na magdakula magin dapat na pangatamanan ini sa paagi kan saindong pagtubod. Asin hilnga, ini magigin sarong kahoy, na nagtatalubong magdadakula sa laog nindo sa daeng katapusang buhay. Asin sa pagkatapos lugod an Diyos maggagawad sa saindo na tanganing an saindong mga kagabatan puwedeng magigin magi-anon, sa paagi sa kaogmahan kan saiyang Ake. Asin magin an gabos na ini maggigibo nindo kun saindong pagmamawoton. Amen.