An Libro Ni Mormon (An Saro Pang Tipan Ni Jesucristo)

An pagbabalangibog kan tataramon nakapagpadestroso sa katusuhan kan mga Zoramita--- Saindang pinaharale an mga nagbalik-loob, na dagos nag-ayon sa katawohan ni Ammon na yaon sa Jershon--- Si Alma nagmundo nin huli sa kadaendatahan kan mga katawohan.

*******

Ngonian ini nangyaring naglipas na pagkatapos na si Amulek naghimo na nin pagtatapos kaining mga tataramon, sinda nagharale kan saindang mga sadire gikan sa kadaklan asin nagpasiring sa daga nin Jershon.
2 Iyo, asin an ibang mga katugangan, pagkatapos na sinda nagparatukdo kan tataramon sa mga Zoramita, nagpasiring man duman sa daga nin Jershon.
3 Asin ini nangyaring naglipas na pagkatapos na an mas bantog na parte kan mga Zoramita nagkaigwa nin konsultasyon sa pagtiripon ninda mapanungod sa mga tataramon na ipinagbalangibog sa sainda, sinda nagka-aranggot nin huli kan tataramon, nin huli ta ini nakapagdestroso kan saindang katusuhan; kun kaya sinda dae nagdadarangog sa mga tataramon.
4 Asin sinda nagpadara asin nagkasararong nagtiripon sa kagabsang bilog na daga an gabos na mga katawohan, asin kinunsulta sinda mapanungod sa mga tataramon na ipinagsambit sainda.
5 Ngonian an saindang mga tagapamahala asin an saindang mga kapadean asin an saindang mga paratukdo dae ginibong maipaaram sa mga katawohan an mapanungod kan saindang pinagmamawot; kun kaya saindang hilom na naaaraman an mga kaisipan kan gabos na mga katawohan.
6 Asin ini nangyaring naglipas na pagkatapos na sindang nagkaararaman an mga kaisipan kan gabos na mga katawohan, mga tawong pabor sa mga tataramon na ipinagtaram ni Alma asin kan saiyang mga katugangan pinaharale paluwas sa kadagaan; asin sinda kadakul; asin sinda nagpasiriring man sa kadagaan nin Jershon.
7 Asin ini nangyaring naglipas na si Alma asin an saiyang mga katugangan nagparatukdo sa sainda.
8 Ngonian an mga katawohan nin mga Zoramita nagka-aranggot sa mga katawohan ni Ammon na yaraon sa Jershon, asin an pinakapamayo kan tagapamahala kan mga Zoramita, bilang sarong grabe karaot na tawo, nagpadara nin pasabot sa mga katawohan ni Ammon na saindang pinagmamawot na dapat na magruluwas sa saindang kadagaan an gabos na nag-arayon sa sainda pasiring man sa saindang sadireng kadagaan.
9 Asin siya nagparataram nin kadakul na mga patakot kontra sainda. Asin ngonian an mga katawohan ni Ammon dae nagkatarakot sa saindang mga tataramon; kun kaya dae ninda sinda napahale paluwas, pero saindang pinagtanggap an gabos na kapobrehan kan mga Zoramita na nagduruman sa sainda; asin sinda pinakarakan ninda, asin pinagbadoan ninda, asin nagparatao sainda nin mga daga para sa saindang kamanahan; asin sinda pinagtarabangan ninda uyon sa saindang mga pangangaipo.
10 Ngonian ini mas lalong nakapagpa-anggot sa mga Zoramita konta sa katawohan nin Ammon, asin sinda nagporoon na makihalobilo sa mga Lamanita asin na tanganing sinda man magka-aranggot kontra sainda.
11 Asin kaya an mga Zoramita asin an mga Lamanita nagpoon na gumibo nin mga pag-aandam para sa pakigiyera kontra sa mga katawohan ni Ammon, asin man kontra sa mga Nephita.
12 Asin kaya nagtapos an ika-disesiyeteng taon kan pagpapamahala nin mga huwes sa mga katawohan ni Nephi.
13 Asin an mga katawohan ni Ammon nagralakbay paluwas sa kadagaan nin Jershon, asin naka-abot sa kadagaan nin Melek, ain ipinagtao an lugar ni Jershon para sa mga paralaban kan mga Nephita, na tanganing sinda puwedeng makikipaglaban sa mga paralaban kan mga Lamanita asin mga paralaban kan mga Zoramita; asin kaya nagpoon an sarong giyera sa tahaw kan mga Lamanita asin mga Nephita, sa ika-desiotsong taon kan pagpapamahala nin mga huwes; asin sarong kasaysayan an itatao kan saindang mga giyera ngonian hanggan sa pagtapos.
14 Asin si Alma, asin si Ammon, asin an saindang mga katugangan, asin man an duwang akeng lalake ni Alma nagbaralik pasiring sa kadagaan nin Zarahemla, pagkatapos na nagin mga instrumento nin mga kamot nin Diyos na nagdara sa kadakul na mga Zoramita pasiring sa pagsosolsol na pinagpaharale paluwas sa saindang kadagaan; pero sinda nagkaigwa nin mga kadagaan para sa saindang kamanahan sa laog kan daga nin Jershon, asin sinda nagkarapot nin mga armas tanganing idepensa an saindang mga sadire, asin an saindang mga agom, asin an saindang mga kaakian, asin an saindang mga kadagaan.
15 Ngonian si Alma, na nagmumundo nin huli sa kadaendatahan kan saiyang katawohan, iyo nin huli kan mga giyera, asin an mga pagpapabulos nin dugo, asin an mga pag-iiriwal-iwal sa laog kan pag-iriba ninda; asin bilang nakapagdeklara na kan tataramon, o ipinadara tanganing magpahayag nin tataramon, sa pag-iriba kan gaobs na mga katawohan sa lambang siyudad; asin nakapaghiling na an mga puso kan mga katawohan nagpopoon na magin matagason, asin sinda nagpopoon na magkakurulugan nin huli sa kaestriktuhan kan tataramon, an saiyang puso nagin sobrang gayo an pagkamundo.
16 Kun kaya, saiyang ipinaapod an saiyang mga akeng lalake na sararong magkatiripon, na tanganing maitao sa lambang saro sainda an saindaang mga gigibohon, na ralaen-laen, mapanungod sa mga bagay tungkol sa pagkamatanos. Asin kami igwa nin talaan kan saiyang mga kasugoan, na saiyang ipinagtao sainda na uyon sa saiyang sadireng rekord.