<$BlogRSDUrl$>

Thursday, January 12, 2006

ALMA TSAPTER 40 

Si Cristo an mapangyari na umabot an pagkabuhay-liwat kan gabos na mga tawo--- An matanos na nagadan mapasiring sa paraiso asin an mararaot mapasiring sa luwas na kadikloman sa paghalat kan aldaw kan saindang pagkabuhay-liwat--- An gabos na mga bagay ibabalik sa tama asin sa perpektong kamugtakan sa pagkabuhay-liwat.

*****

Ngonian ake ko, uya pa baga an kadakul ko pang sasabihon sa saimo; nin huli ta sakuyang napag-isipan na an saimong kaisipan naghahadit manungod sa pagkabuhay-liwat nin mga gadan.
2 Hilnga, ako nagsasabi sa saimo, na mayo nin pagkabuhay-liwat--- o, an boot kong sabihon, sa ibang mga tataramon, na ining mortal dae maipapamugtak sa immortalidad, ining may kalapaan dae maipapamugtak sa mayong kalapaan--- hanggan sa pagkatapos na mag-abot si Cristo.
3 Hilnga, siya an magdadara na mapangyari an pagkabuhay-liwat kan mga gadan. Pero hilnga, ake ko, an pagkabuhay-liwat mayo pa. Ngonian, ako magbubukas sa saimo nin sarong misteryo; daeng pagkukulang, na mayo ni saro man an nakakaaram kan mga ini laen lang an Diyos mismo sa saiyang sadire. Pero ako magpapahiling saimo nin sarong bagay na sakuya nang ipinaghapot na may kahigosan sa Diyos na tanganing ako puwedeng makaaram--- na ini mapanungod na gayo sa pagkabuhay-liwat.
4 Hilnga, igwa nin sarong panahon na pinagtakda na tanganing an gabos magburuhat gikan sa pagkagadan. Ngonian kun noarin an panahon na ini mag-abot mayong nakakaaram; pero an Diyos an nakakaaram sa panahon na ining pinagtakda.
5 Ngonian, maski nagka-igwa nin enot na pagkakataon, o ikaduwang pagkakataon, o ikatulong pagkakataon, na an mga tawo mabubuhay-liwat sa mga gadan, ini bakong importante; nin huli ta an Diyos iyo an nakakaaram kan gabos na ining mga bagay; asin ini tama na para sa sakuya na maaraman na iyo ini an kaso--- na igwa talagang sarong panahon na pinagtakda na an gabos mabubuhay-liwat gikan sa mga gadan.
6 Ngonian dapat na magkakaigwa nin sarong espasyo sa katahawan nin panahon nin kagadanan asin an panahon nin pagkabuhay-liwat.
7 Asin ngonian ako maghihingohang maghahapot sa kun ano an mangyayari sa mga kalag nin tawo magpoon ngonian na panahon nin kagadanan hanggan sa panahon na ipinagtakda para sa pagkabuhay-liwat?
8 Ngonian maski na magkaigwa nin sobra sa sarong pagkakataon na pinagtakda para sa mga tawo na magbuhat ini bako nang importante; nin huli ta an gabos dae nagagadan nin saroan sana, asin ini bakong importante: an gabos igwa nin sarong aldaw kaiba nin Diyos, asin an panahon sana an pinagsusukol para sa mga tawo.
9 Kun kaya, igwa nin sarong panahon an pinagtakda para sa mga tawo na sinda magbubuhat gikan sa mga gadan; asin igwa nin sarong espasyo sa tahaw nin panahon nin kagadanan asin an pagkabuhay-liwat. Asin ngonian, mapanungod kaining espasyo nin panahon, ano baya an mangyayari sa mga kalag nin mga tawo iyo an bagay na sakuyang pinaghapot na may kahigosan sa Kagurangnan na tanganing maaraman; asin iyo ini an bagay na sakuyang naaaraman.
10 Asin sa panahon na maabot na an gabos magbubuhat, saka na ninda maaaraman na an Diyos nakakaaram sa gabos na mga panahon na ipinagtakda sa mga tawo.
11 Ngonian, mapanungod sa estado nin kalag sa tahaw nin kagadanan asin an pagkabuhay-liwat --- Hilnga, ini ginibong ipinagpaaram sa sakuya sa paagi nin sarong anghel, na an mga espiritu nin gabos na mga tawo, habang sa dae naghahaloy sinda mahale na gikan kaining mortal na hawak; iyo, an mga espiritu nin gabos na mga tawo, magin sinda marhay o maraot, pinagdadara pabalik sa Diyos na iyo an nagtao nin saindang buhay.
12 Asin pagkatapos na ini mangyayaring maglipas, na an mga espiritu ninda na mga matatanos reresibihon duman sa sarong estado nin kaogmahan, na inaapud na paraiso, sarong estado nin pagkapahingalo, sarong estado nin katuninongan, na kung saen sinda magpapahingalo gikan sa gabos nindang mga problema asin gikan sa gabos na pagpapangataman, asin kamondoan.
13 Asin pagkatapos na ini mangyayaring maglipas, na an mga espiritu nin mga makasalanon, iyo, na mga mararaot--- nin huli ta hilnga, sinda mayo nin parte ni porsiyon kan Espiritu nin Kagurangnan; nin huli ta hilnga, sinda an nagpili nin mararaot na mga gibo kesa marhay; kun kaya an espiritu kan diyablo iyo an naglaog sa sainda, asin iyo an nagsasadire kan saindang harong--- asin an mga ini an itatapok paluwas pasiring sa panluwas na kadikloman; duman nagkakaigwa nin pagtatangis, asin mga kinurahaw, asin pagraragot nin mga ngipon, asin ini iyo nin huli kan saindang sadireng kadaendatahan, bilang nadarang nadakop baya sa paagi nin kagustuhan kan diyablo.
14 Ngonian iyo ini an estado kan mga kalag nin mga makasalanon, iyo duman sa kadikloman, asin sa sarong estadong makangorongirhat, na pano nin pagkatakot na nahihiling nin huli sa nagkakalayong indignasyon kan kaanggutan nin Diyos sa sainda; kaya sinda yaon man giraray sa estadong ini, asin man siring man sa mga matatanos sa paraiso, hanggan sa panahon kan saindang pagkabuhay-liwat.
15 Ngonian, igwa nin iba na igwa nin pagkasabot na ining estado nin kaogmahan asin ining estado nin kasakitan kan mga kalag, bago pa man an pagkabuhay-liwat, iyo kaidto an enot na pagkabuhay-liwat. Iyo, ako nag-aako na puwede man nanggad ining pag-aapudon na sarong pagkabuhay-liwat, an pagpapabuhay nin espiritu o nin kalag asin an saindang padudumanan na kaogmahan o kasakitan, uyon sa mga tataramon na pinagsambit na.
16 Asin hilnga, giraray ini pinagsambit na, na igwa nin sarong enot na pagkabuhay-liwat, sarong pagkabuhay-liwat kan gabos nindang nakalipas na, o sinda ngonian, o sinda na maarabot pa sana, hanggan sa pagkabuhay-liwat ni Cristo gikan sa pagkagadan.
17 Ngonian, dae nyato pinaghuhuna-huna na ining enot na pagkabuhay-liwat, na pinagsambit sa arog kaining manera, magigin iyo man an pagkabuhay-liwat kan mga kalag asin an saindang papadumanan na kaogmahan o kasakitan. Ika dae puwedeng maghuhuna-huna na iyo na ini an boot na pagkahulugan.
18 Hilnga, ako nagsasabi sa saimo, Bako; pero ini nangangahulugan nin pagkakasararo kan kalag na igwa nin hawak, kaidto sinda na gikan pa sa mga aldaw ni Adan hanggan sa pagkabuhay-liwat ni Cristo.
19 Ngonian, maski na ngani an mga kalag asin an mga hawak ninda na iyo an pinagsasambit na an gabos na ini magigin magkakasararo tulos-tulos, an makasalanon siring man an mga matatanos, ako dae makapagsasabi; tuguti na ini sana, na ako masabi na sinda gabos mabubuhay; o sa ibang tataramon, an saindang pagkabuhay-liwat mangyayaring malipas nguna bago pa man an pagkabuhay-liwat ninda na nagkagaradan pagkatapos nin pagkabuhay-liwat ni Cristo.
20 Ngonian, ake ko, ako dae nagsasabi na an saindang pagkabuhay-liwat maabot mismo sa pagkabuhay-liwat ni Cristo; pero hilnga, ako nagtatao kaini bilang opinyon ko, na an mga kalag asin an mga hawak magkakasararo giraray, sa mga matatanos, sa panahon nin pagkabuhay-liwat ni Cristo, asin sa saiyang pagsakat pasiring sa langit.
21 Pero maski ngani ini mangyayari sa saiyang pagkabuhay-liwat o pagkatapos, ako mayong masasabi; pero iyo sanang gayo an sakong masasabi, na igwa nin sarong espasyo sa katahawan nin kagadanan asin an pagkabuhay-liwat kan hawak, asin an sarong estado nin kalag sa kaogmahan o sa kasakitan hanggan sa panahon na pinagtakda nin Diyos na an gadan magkakaburuhay, asin magin kasararo giraray, pareho sa kalag asin hawak, asin pagdadarahon na magtitindog sa atubangan nin Diyos, asin paghuhusgaran uyon sa saindang mga gibo.
22 Iyo, iyo ini an magdadara kan restorasyon kaidtong mga bagay na pinagsambit na sa paagi kan mga nguso nin mga propeta.
23 An kalag ibabalik giraray sa hawak, asin an hawak sa kalag; iyo, asin an lambang kalami-as asin kasu-kasuan ibabalik giraray sa hawak kaini; iyo, magin an sarong buhok sa payo dae nanggad mawawara; pero an gabos na mga bagay ibabalik giraray sa saindang kamumugtakan asin perpektong kapormahan.
24 Asin ngonian, ake ko, iyo ini an restorasyon na pinagsambit na sa paagi kan mga nguso nin mga propeta---
25 Asin pagkatapos an matatanos magsisirang sa kahadean nin Diyos.
26 Pero hilnga, sarong makangorongirhat na kagadanan an maabot sa mga makasalanon; nin huli ta sinda nagadan arog sa mga bagay na manunungod sa pagkamatanuson; nin huli ta sinda bakong malinigon, asin mayong bakong malinig na bagay an makakamana sa kahadean nin Diyos; pero sinda pinagtapok, asin pinagpamugtak na makiparte sa mga prutas kan saindang mga trabaho o kan saindang mga kagibohan, na mararaot; asin sinda mag-iinom sa mga lagod kan sarong mapait na kopa.

Comments: Post a Comment

This page is powered by Blogger. Isn't yours?