An Libro Ni Mormon (An Saro Pang Tipan Ni Jesucristo)

Sa pagkabuhay-liwat an mga tawo mabubuhay sa sarong estado nin daeng katapusan na kaogmahan o daeng katapusan na kasakitan--- An karaotan dae maski noarin magin kaogmahan--- An makamundong tao mayo nin Diyos sa mundo--- An kada tawo makakaresibe giraray sa pagbabalik nin mga pag-uugali asin mga katangian na nakua na sa mortalidad.

*******

Asin ngonian, ake ko, ako igwa nin mga bagay na sasabihon mapanungod sa restorasyon na nasambit na; nin huli ta hilnga, sa iba baya pinagkurumo-kumo an mga kasuratan, asin nagkawarara sa harayo nin huli kaining bagay. Asin sakong pinaghuhuna-huna na an sakuyang kaisipan nagin mamondoon man mapanungod kaining bagay. Pero hilnga, ako nagpapaliwanag kaini sa saimo.
2 Ako nagsasabi sa saimo, ake ko, na an plano nin restorasyon sarong bagay na kinakaipo kan hustisya nin Diyos; nin huli ta ini kaipuhan na an gabos na mga bagay dapat na maibalik sa dati nindang kinamugtakan. Hilnga, iyo ini an kinakaipo asin husto, na uyon sa kapangyarihan asin pagkabuhay-liwat ni Cristo, na an kalag nin tawo dapat na maibalik sa hawak kaini, asin na an lambang parte kan hawak dapat na maibalik sa sadire kaini.
3 Asin ini kinakaipuhan na magkaigwa nin hustisya an Diyos na an mga tawo dapat na paghusgaran uyon sa saindang mga gibo; asin kun an saindang mga gibo marahayon sa buhay na ini, asin an mga kamawotan kan saindang mga puso marahayon, na sinda man dapat, sa huring aldaw, na maibalik sa dati na marahayon na.
4 Asin kun an saindang mga gibo mararaot an mga ini gigibohong maibalik sa sainda nin maraot. Kun kaya, an gabos na mga bagay ibabalik sa dati nindang kamugtakan, an lambang bagay sa saindang natural na kapormahan--- an mortalidad bubuhayon pasiring sa immortalidad, an kalapaan pasiring sa daeng kalapaan--- bubuhayon sa daeng katapusan na kaogmahan na magmamana nin kahadean nin Diyos, o pasiring sa daeng katapusan na kasakitan na magmamana nin kahadean kan diyablo, an saro sa sarong kamugtakan, an iba sa iba man---
5 An sarong bubuhayon pasiring sa kaogmahan uyon sa saiyang mga kamawotan na kaogmahan, o an marahayon uyon sa saiyang kamawotan na karahayan; asin an iba pasiring sa maraot uyon sa saiyang mga kamawotan na maraot; nin huli ta habang siya nagmamawot na gumibo nin maraot sa bilog nin kahaluyan nin aldaw iyo man makukua niya sa saiyang pabuyang maraoton sa pag-abot nin pagkabanggi.
6 Asin iyo ini an yaon sa ibong na kamugtakan, kun siya nakapagsolsol kan saiyang mga kasalan, asin nagmawot nin pagkamatanuson hanggan sa katapusan nin saiyang mga aldaw, magin arog man kaini siya mapapabuyaan nin pagkamatanuson.
7 Iyo ini sinda na pinagtubos nin Kagurangna; iyo, iyo ini sinda na pinagkurua paluwas, na pinagligtas gikan sa daeng katapusang banggi nin kadikloman; asin kaya sinda magtitindog o magkahurulog; nin huli ta hilnga, sinda iyo an sainda man sanang mga huwes, kun baya an gumibo nin marahay o an gumibo nin maraot.
8 Ngonian, an mga dekrito nin Diyos dae mababago; kun kaya, an dalan pinag-andam na tanganing an siisay man na magusto puwedeng maglakaw sa laog kaini asin magigin ligtas.
9 Asin ngonian hilnga, ake ko, dae ka makipagsapalaran pa nin saro pang paglapas kontra sa saimong Diyos sa mga puntong ini kan doktrina, na saimo kaidtong pinakipagsapalaran na tanganing makabigo nin kasalan.
10 Dae mo paghuhuna-hunaon, na nin huli ta ini pinagsambit na mapanungod sa restorasyon, na ika puwedeng maibalik gikan sa kasalan pasiring sa kaogmahan. Hilnga, ako nagsasabi sa saimo, na an kasalanan dae nanggad magigin kaogmahan.
11 Asin ngonian, ake ko, an gabos na tawo na yaon sa sarong estado nin makamundong kamugtakan, o sakuyang sasabihon, yaon sa karnal na estado, iyo an yaon sa pinakamatinding kapaitan asin yaon sa mga gapos nin kadaendatahan; sinda mayong Diyos sa mundo, asin sinda nangyaring nagin kontraryo sa natura nin Diyos; kun kaya, sinda yaon sa sarong estado na kontraryo sa natura nin kaogmahan.
12 Asin ngonian hilnga, bako daw na an kahulugan kan tataramon na restorasyon iyo an magdadara sa sarong bagay na natural na estado asin mapamugtak kaini sa sarong bakong natural na estado, o ipamugtak kaini sa sarong bakong natural na estado, o ipamugtak ini sa sarong estado na magkokontra sa natura kaini?
13 O, ake ko, bako ini an kaso; pero an kahulugan kan tataramon na restorasyon iyo an magdadara pabalik giraray nin maraot para sa maraot, o karnal para sa karnal, o makadiyablo para sa makadiyablo--- an marahay para sa bagay na marahay; an pagkamatanos para sa bagay na pagkamatanos; husto para sa bagay na husto; pano pagkaherak para sa bagay na pano nin pagkaherak.
14 Kun kaya, ake ko, hilngon mo baya na ika pano nin pagkaherak sa saimong mga katugangan; maki-iba ka nin may kahustuhan, maghusga nin may pagkamatanos, asin padagos na gumibo nin karahayan; asin kun saimong gigibohon an gabos na bagay na ini saka mo mareresibe an saimong pabuya; iyo, ika magkakaigwa nin herak na maibalik sa saimo giraray; ika magkakaigwa nin hustisya na maibalik sa saimo giraray; ika magkakaigwa nin sarong matanos na huramento na maibalik sa saimo giraray; asin ika magkakaigwa nin marahay na ipagpapabuya sa saimo giraray.
15 Para sa bagay na saimong ginigibong maipadara paluwas maibabalik sa saimo giraray, asin gibohon na maibalik; kun kaya, an tataramon na restorasyon bilog na gayong nagkokondena sa makasalanon, asin daeng gayo siya matawanan nin katwiran.