<$BlogRSDUrl$>

Wednesday, February 08, 2006

ALMA TSAPTER 48 

Si Amalickiah pinagpukaw an mga Lamanita kontra sa mga Nephita--- Si Moroni pinag-andam an saiyang mga katawohan na ipaglaban an kausa kan mga kristiyano--- Siya nag-ogma sa libertad asin kalayaan asin nagin sarong pusog na tawo nin Diyos.

*******

Asin ngonian ini nangyaring naglipas na habang dae pa sana naghahaloy na si Amalickiah nagkapot kan kahadean niya nagpoon na pukawon an mga puso kan mga Lamanita kontra sa mga katawohan nin Nephi; iyo, siya nagngaran nin mga tawo na magtaram sa mga Lamanita gikan sa saindang mga tore, kontra sa mga Nephita.
2 Asin kaya saiyng pinukawan an saindang mga puso kontra sa mga Nephita, na tanganing sa huring parte kan ika-desinuwebeng taon kan pagpapamahala kan mga huwes, siya bilang nakagibo na kan saiyang mga desinyo sa dae pa sana naghahaloy, iyo, bilang ginibong hade kan mga Lamanita, siya nagmawot pa man na maghade sa bilog na daga, iyo, asin sa gabos na mga katawohan na yaon sa laog nin daga, an mga Nephita asin man an mga Lamanita.
3 Kun kaya saiyang nagibo na an saiyang desinyo, nin huli ta saiyang pinatagas an mga puso kan mga Lamanita asin binilog an saindang mga kaisipan, asin pinagpukaw sinda hanggan sa pagka-anggot, na sa arog kaini saiyang pinagtiripon na nagkasararo sa sarong kadakulaon na hukbo sa pakikipaggiyera kontra sa mga Nephita.
4 Nin huli ta siya determinado, nin huli kan kadakulaan nin numero kan saiyang mga katawohan, na tanganing daugon an mga Nephita asin darahon sinda pasiring sa kauripnan.
5 Asin kaya siya nagngaran nin pinakapamayong mga kapitan kan mga Zoramita, sinda bilang iyo an mas nakakaaram sa kusog kan mga Nephita, asin kan saindang mga lugar na pinagtitiriponan, asin sa pinakamaluyang mga parte kan saindang mga siyudad; kun kaya saiya sindang pinagngaranan na mga pinakapamayong mga kapitan kan saiyang mga paralaban.
6 Asin ini nangyaring naglipas na saindang sinarakop an saindang mga kampo, asin naghiro pasiring sa kadagaan nin Zarahemla sa may kaparangan.
7 Ngonian ini nangyaring naglipas na habang si Amalickiah padagos na nakakamit nin kapangyarihan sa paagi nin padaya asin panlilinlang, si Moroni, sa balyong lado, pinag-aandam an mga kaisipan kan mga katawohan na magin pano nin pagtubod sa Kagurangnan nindang Diyos.
8 Iyo, saiyang pinapakusog na gayo an mga paralaban kan mga Nephita, asin nagtuturogdok nin saradit na mga kuta, o mga lugar nin pattitiriponan; pinagpapalangkaw an mga gilid nin daga sa palibot na tanganing pananggalang kan saiyang mga paralaban, asin man nagturugdok nin mga pader na gapo na magsisirkulo sainda sa palibot, sa palibot kan saindang mga siyudad asin sa mga kasagkoran kan saindang kadagaan; iyo, sa bilog na palibot kan daga.
9 Asin sa saindang pinakamaluyang parte kan saindang mga pinagkukutaan siya nagbugtak nin mas dakulaon na numero nin mga tawo; asin kaya saiyang pigkutaan asin pinakusog an kadagaan na pagsasadire kan mga Nephita.
10 Asin kaya siya nag-aandam tanganing suportahan an saindang libertad, an saindang kadagaan, an saindang katuninongan, asin ta sinda puwedeng mamuhay sa Kagurangnan saindang Diyos, asin ta sinda puwedeng mamamahala kan bagay na pinag-aapud kan saindang mga kaiwal na kausan kan mga kristiyano.
11 Asin si Moroni sarong makusugon asin sarong dakulaon na tawo; siya idtong sarong tawo na may perpektong pagka-intende; iyo, sarong tawo na dae na-oogma sa garadanan; sarong tawo na an kalag nag-oogma sa libertad asin sa kalayaan kan saiyang banwaan, asin kan saiyan mga katugangan gikan sa kauripnan asin pagka-uripon;
12 Iyo, sarong tawo na an puso nagdakula na may pasasalamat sa saiyang Diyos; para sa kadakul na mga pribilihiyo asin mga bendisyon na saiyang ipinagputong sa saiyang mga katawohan; sarong tawo na nagtrabahong gayo para sa kapakanan asin kaligtasan kan saiyang mga katawohan.
13 Iyo, asin siya idtong sarong tawo na pusog sa pagtubod ki Cristo, asin siya nangako nin sarong panunumpa na bantayan an saiyang mga katawohan, an saiyang mga karapatan, asin an saiyang banwaan, asin an saiyang relihiyon, magin hanggan sa pagpapabulos kan saiyang dugo.
14 Ngonian an mga Nephita tinurukdoan sa pagdepensa kan saindang mga sadire kontra sa saindang mga kaiwal, magin hanggan sa pagpapabulos nin dugo kun ini kinakaipuhan; iyo, asin sinda man pinagtukdoan na dae nanggad magtao nin opensa, iyo, asin dae nanggad itaas an espada laen lang kun ini kontra sa sarong kaiwal, laen lang kun ini para sa pagpreserba kan saindang mga buhay.
15 Asin iyo ini an saindang pagtubod, na sa paggigibo an Diyos iyo an mapa-asenso sainda sa kadagaan, o sa ibang mga tataramon, kun sinda pano nin pagtubod sa pagsusunod sa mga kasugoan kan Diyos na saiyang papa-asensuhon sinda sa kadagaan; iyo, inabisuhan sinda na magdulag, o mag-andam para sa pakigiyera, uyon sa saindang kadelikaduhan;
16 Asin man, na an Diyos iyo an magpapasabot kaini sa sainda kumbaga sinda dapat na magdepensa para sa mga sadire ninda kontra sa saindang mga kaiwal, asin sa paggigibo, an Kagurangnan iyo an magliligtas sainda; asin iyo ini an pagtubod ni Moroni, asin an saiyang puso nagpamuraway kaini; bako sa pagpapabulos nin dugo kundi sa paggigibo nin marhay, sa pagpreserba kan saiyang mga katawohan, iyo, sa pagsusunod sa mga kasugoan nin Diyos, iyo, asin sa pakipagkontrahan sa kadaendatahan.
17 Iyo, katotohanan, katotohanan ako nagsasabi sa saindo, kun an gabos na tawo kaidto, asin nagin iyo, asin magigin iyo, na arog ki Moroni, hilnga, an mga kapangyarihan nin impiyerno iyo man sana an matatanyog sagkod pa man; iyo, an diyablo dae kuta na magkaigwa nin kapangyarihan na mangingibabaw sa mga puso kan mga kaakian nin mga tawo.
18 Hilnga, siya sarong tawo na arog ki Ammon, an aki ni Mosiah, iyo, asin magin sa ibang mga akeng lalake ni Mosiah, iyo, asin man ki Alma asin kan saiyang mga akeng lalake, nin huli ta sinda gabos mga tawo nin Diyos.
19 Ngonian hilnga, si Helaman asin an saiyang mga katugangan daeng kakulangan sa pagseserbisyo sa mga katawohan kesa ki Moroni; nin huli ta sinda nagbabalangibog nin tataramon nin Diyos, asin sinda nagbubunyag pasiring sa pagsosolsol sa gabos na mga tawo na siisay man na magdadangog sa saindang mga tataramon.
20 Asin kaya sinda nagpadagos, asin an mga katawohan nagpakumbaba kan saindang mga sadire nin huli kan saindang mga tataramon, na tanganing sinda iyo an nagin mas pinaboran nin Kagurangnan, asin kaya sinda nagin libre sa mga pakigiyera asin pagralaban-laban sa pag-iriba kan saindang mga sadire, iyo, magin sa laog nin apat na taon.
21 Pero, arog kan sakong nasabi na, sa hinapos na parte kan ika-desinuwebeng taon, iyo, maski na ngani sa saindang katuninongan sa pag-iriba man sana nindang mga sadire, sinda napipiritan na may pagduduwa-duwa na makilaban sa saindang mga katugangan, an mga Lamanita.
22 Iyo, asin sa madaling tataramon, an saindang mga pakigiyera dae nanggad nag-untok sa laog nin kadakul na mga taon kontra sa mga Lamanita, maski na ngani kan saindang grabeng pagduduwa-duwa.
23 Ngonian, sinda nagmumundo na kumapot nin mga armas kontra sa mga Lamanita, nin huli ta sinda dae na-oogma sa pagpapabulos nin dugo; iyo, asin ini bako sana gabos--- sinda nagmumundo na magin mga dahilan sa pagpapadara sa kadakulon nindang mga katugangan paluwas sa mundong ini pasiring sa daeng kasagkoran na mundo, na dae pa preparado para atubangon an saindang Diyos.
24 Daeng pagkukulang, sinda dae makapagtugot na pababayaan an saindang buhay, an saindang mga agom, asin an saindang mga kaakian na gagaradanon sa paagi nin barbarong kalupitan ninda na kaidto saindang mga katugangan, iyo, asin nagparibok sa saindang simbahan., asin nagbaya sainda asin nagrayo sa pagdestroso sainda sa paagi nin pakipag-ayon sa mga Lamanita.
25 Iyo, sinda dae nanggad makapagtugot na an saindang mga katugangan mag-oogma sa dugo kan mga Nephita, hanggan habang igwa pa nin siisay na magsusunod sa mga kasugoan nin Diyos, nin huli ta an promisa nin Kagurangnan iyo ini, kun sinda magsusunod sa saiyang mga kasugoan sinda mag-aasenso sa kadagaan.

Comments: Post a Comment

This page is powered by Blogger. Isn't yours?