An Libro Ni Mormon (An Saro Pang Tipan Ni Jesucristo)

An nag-atakeng mga Lamanita dae nakayanan na makua an mga nakukutaan na mga siyudad nin Ammonihah asin Noah--- Si Amalickiah pinagsumpa an Diyos asin nangako na iinumon an dugo ni Moroni--- Si Helaman asin an saiyang mga katugangan nagpadagos sa pagpapakusog kan Simbahan.

********

Asin ngonian ini nangyaring naglipas sa ika-onseng bulan kan ika-desinuwebeng taon, sa ika-sampulong aldaw kan bulan, an mga paralaban kan mga Lamanita nahiling na paharani pasiring sa daga kan Ammonihah.
2 Asin hilnga, an siyudad pinagtugdok giraray, asin si Moroni nag-estasyon nin paralaban sa mga kasagkoran kan siyudad, asin sinda nagkaralot nin daga asin pinagtambak sa palibot tanganing magsirbeng sangga ninda laban sa mga pana asin mga gapo kan mga Lamanita; nin huli ta hilnga, sinda nakipaglaban sa paagi nin mga bato asin sa paagi nin mga pana.
3 Hilnga, ako nagsasabi na an siyudad nin Ammonihah pinagtugdok giraray. Ako nagsasabi saindo, iyo, na an sarong parte kaini nanggad pinagtugdok giraray; asin nin huli sa mga Lamanita pinagdestroso ini minsan nin huli kan kadaendatahan nin mga katawohan, saindang pinaghuhuna-huna na ini puwede giraray na magin masayunon na dakop para sainda.
4 Pero hilnga, gurano kadakula an saindang pagkadismaya; nin huli ta hilnga, an mga Nephita nagkalot nin mga tambak nin daga na nakapalibot sainda, na grabeng kalangkaw na tanganing an mga Lamanita dae makapagpaturon kan saindang mga gapo asin kan saindang mga pana na magin epektibo, ni dae sinda makadulok sa sainda laen lang ini sa paagi kan saindang lugar na pinaglalaogan.
5 Ngonian sa panahon na ini an mga pinakapamayong mga kapitan kan mga Lamanita grabeng gayo an kangangalasan, nin huli sa kadunungan kan mga Nephita sa pagpara-andam kan saindang mga lugar nin seguridad.
6 Ngonian an mga lider kan mga Lamanita naghuhuna-huna, nin huli kan kadakulaan kan saindang mga bilang, iyo, sinda naghuhuna-huna na sinda dapat nagkaigwa nin pribilihiyo na makadulok sainda arog kaidtong saindang nagibo na; iyo, asin sinda man nag-andam kan saindang mga sadire nin mga panangga, asin nin mga pantahob sa daghan; asin sinda man nakapag-andam kan saindang mga sadire nin mga balat na gubing, iyo, grabe kahibog na mga gubing na magtatahob kan saindang kahubaan.
7 Asin kaya nakapag-andam sinda na naghuhuna-huna na saindang masayunon na madaog asin maipamugtak an saindang mga katugangan pasiring sa paningkaw nin pagkasakop, o garadanon asin puhoon sinda na uyon sa saindang mga kagustuhan.
8 Pero hilnga, sa saindang dakulang gayong pagkangalas, sinda preparado laban sa sainda, sa sarong manera na dae pa napag-aramang gayo kaidto kan mga kaakian ni Lehi. Ngonian sinda nagin preparado para sa mga Lamanita, sa pakikigiyera na uyon sa manera kan mga instruksiyon ni Moroni.
9 Asin ini nangyaring naglipas na an mga Lamanita, o an mga Amalikiyahita, grabeng gayo an pagkangalas sa saindang manera nin preparasyon para sa giyera.
10 Ngonian, kun si hadeng Amalickiah nag-iba sa kadagaan nin Nephi, nasa pagpa-ngenotkan saiyang mga paralaban, kuta na saiyang pinagkausa na atakehon kan mga Lamanita an mga Nephita na yaman sa siyudad kan Ammonihah; nin huli ta hilnga, siya daeng pakiaram para sa dugo kan saiyang mga katawohan.
11 Pero hilnga, si Amalickiah dae nag-iba kan saiyang sadire sa pakigiyera. Asin hilnga, an saiyang pinakapamayong mga kapitan dae pinag-atake an mga Nephita sa siyudad kan Ammonihah, nin huli ta pinagbag-o ni Moroni an manehamento kan palakaw sa pag-iriba nin mga Nephita, na iyong gayo na an mga Lamanita pinanluyahan sa mga lugar nin pag-atras asin sinda dae nakapagdulok sa sainda.
12 Kun kaya sinda nag-atras pasiring sa kaparangan, asin dinarara an saindang mga kampo asin nagmartsa pasiring sa kadagaan nin Noah, na naghuhuna-huna na iyo an magin sunod na marhay na lugar para sa sainda na mag-abot kontra sa mga Nephita.
13 Nin huli ta sinda dae nakaaram na si Moroni iyo an nagpakusog kaini, o nakapagtugdok na nin mga kuta nin seguridad, para sa gabos na siyudad sa bilog na kapalibutan nin daga; kun kaya, sinda nagmartsa paabante pasiring sa kadagaan nin Noah na may pusog na determinasyon; iyo, an saindang mga pinakapamayong mga kapitan nagpangenot asin nakitipan na saindang destrosohon an mga katawohan kan siyudad.
14 Pero hilnga, sa saindang kangangalasan, an siyudad nin Noah, na kaidto sarong maluyang lugar, na ngonian, sa paagi ni Moroni, nagin makusog, iyo, magin sobra an kusog pa sa siyudad nin Ammonihah.
15 Asin ngonian , hilnga, iyo ini an kadunungan ni Moroni; nin huli ta siya naghuhuna-huna na sinda magkatarakot sa siyudad nin Ammonihah; asin arog kan siyudad nin Noah na iyo kaidto an pinakamaluyang lugar nin daga, kun kaya sinda nagmartsa pasiring duman sa pakigiyera; asin kaya iyo an uyon kan saiyang kamawotan.
16 Asin hilnga, si Moroni iyo an nagngaran ki Lehi na iyo an magin pinakapamayong kapitan sa mga tawo sa siyudad na idto; asin iyo ini man giraray an Lehi na iyo an nakipaglaban sa mga Lamanita sa may buro-bukid sa may sirangan kan salog Sidon.
17 Asin ngonian hilnga ini nangyaring naglipas, na kan an mga Lamanita makanagbo na si Lehi iyo an tagapagpamahala sa siyudad sinda giraray pinanluyahan, nin huli ta sinda natatakot ki Lehi na gayo; daeng pagkukulang na an saindang mga pinakapamayong mga kapitan nakapagpanumpa na nin sarong tipan na atakehon an siyudad; kun kaya, saindang pinagdarara paitaas an saindang mga paralaban.
18 Ngonian hilnga, an mga Lamanita dae nakakalaog sa saindang mga kuta nin seguriri sa maski anong paagi kundi sa may pintuan sana, nin huli sa pagkalangkaw kan mga paraharong-gilid na pinaghimong palangkawon, asin sa kaharumon kan kinalutan na pinagkalot sa palibot, laen lang ini sa paagi kan pintuan.
19 Asin kaya an mga Nephita nagin preparado sa pagdedestroso sa gabos na maghingoha na magsakat sa paglaog sa kuta sa anuman na agihan, sa paagi nin paggapo asin nagpana sainda.
20 Kaya sinda preparado, iyo, sarong kawan kan saindang mga pinakamakukusog na mga tawo, n a may mga espada asin may mga tirador, tanganing sugpoon an gabos na siisay na magprubar na maglaog pasiring sa saindang lupa nin seguridad sa may lugar kan pintuan; asin kaya sinda preparado na idepensa an saindang mga sadire kontra sa mga Lamanita.
21 Asin ini nangyaring naglipas na an mga kapitan kan mga Lamanita pinagdarara an saindang mga paralaban sa may atubangan kan pintuan, asin nagpoon sa pakipaglaban sa mga Nephita, na tanganing makalaog sa lugar kan saindong seguridad; pero hilnga, sinda pinapa-atras sa kada atake, na tanganing sinda magkagaradan nin sarong dakulaon na kagaradanan.
22 Ngonian kan saindang nanagboan na sinda dae makakua nin kapangyarihan na mangingibabaw sa mga Nephita sa paagi kan pintuan, sinda nagpoonna magkaralot kan saindang mga kahanggilidan na daga na tanganing makagibo nin agihan para sa saindang mga paralaban, na sinda puwedeng magkaigwa nin kaparehong pagkakataon sa pakikipaglaban; pero hilnga, sa mga pagprubar ninda sinda nagkasirighid sa paagi kan mga gapo asin mga pana na pinapatama sainda; asin embes baga na tambakan an mga kinalutan sa paagi nin pagpaguho kan mga kahanggilidad na daga, an mga ini nagkatarambakan kan saindang mga gadan asin nagkarulugadan na mga hawak.
23 Kaya an mga Nephita nagkamit nin bilog na kapangyarihan na nangibabaw sa saindang mga kaiwal; asin kaya an mga Lamanita nagprubar na destrosohon an mga Nephita hanggan sa an saindang pinakapamayong mga kapitan gabos nagkagaradan; iyo, asin sobra sa sarong ribo kan mga Lamanita an nagkagaradan; habang sa balyong lado, mayo ni saro man na kalag kan mga Nephita an nagadan.
24 Igwa seguro nin mga singkuwenta an nagkarulugadan, na nakalantad sa mga pana kan mga Lamanita sa may parteng pintuan, pero sinda natabunan kan saindang mga panangga, asin kan saindang pantahob sa daghan, asin kan saindang mga pangopya sa payo, na tanganing an saindang mga lugad yaraon sa saindang mga bitis, na kadakul kaini malalang gayo.
25 Asin ini nangyaring naglipas, na kan magkahiriling kan mga Lamanita na an saindang pinakapamayong mga kapitan gabos nagkagaradan na sinda nagdurulag pasiring sa kaparangan. Asin ini nangyaring naglipas na sinda nagbaralik pasiring sa kadagaan nin Nephi, tanganing paaramon an saindang hade, si Amalickiah, na sarong Nephita sa paagi nin kamundagan, manungod kan saindang dakulang kawaraan.
26 Asin ini nangyaring naglipas na siya grabeng gayo an kaanggutan sa saiyang mga katawohan, nin huli ta dae niya nakamtan an saiyang mga kamawotan sa mga Nephita; dae niya sinda naipamugtak sa paningkaw nin kauripnan.
27 Iyo, siya na grabeng gayo an pagka-anggot, asin saiyang pinagsumpa an Diyos, asin man si Moroni, nanunumpa nin sarong tipan na saiyang iinumon an saiyang dugo; asin ini nin huli ta si Moroni nagsunod sa mga kasugoan nin Diyos sa pag-andam para sa kaligtasan kan saiyang mga katawohan.
28 Asin ini nangyaring naglipas, na sa balyong lado, an mga katawohan nin Nephi nagpasalamat sa Kagurangnan na saindang Diyos, nin huli sa daeng katampad na kapangyarihan na pagliligtas sainda gikan sa mga kamot kan saindang mga kaiwal.
29 Asin kaya nagtapos an ika-desinuwebeng taon nin pagpapamahala kan mga huwes sa mga katawohan nin Nephi.
30 Iyo, asin nagkaigwa nin padagos na katuninongan sa pag-iriba ninda, asin grabeng gayo kadakulang kasaganaan sa simbahan nin huli kan saindang pagdangog asin kahigosan na saindang ipinagtao sa tataramon nin Diyos, na ipinagdeklara sa sainda ninda ni Helaman, asin Shiblon, asin Corianton, asin Ammon asin kan saiyang mga katugangan, iyo, asin sa paagi kan gabos ninda na pinag-ordinahan kan banal na orden nin Diyos, na nagkaburunyagan pasiring sa pagsosolsol, asin ipinadara sa pagbalangibog sa mga katawohan.