An Libro Ni Mormon (An Saro Pang Tipan Ni Jesucristo)

Si Pahoran nagsumbong ki Moroni kan insureksiyon asin rebelyon kontra sa gobyerno--- An mga tawong makihade inagaw an Zarahemla asin ka-alyado kan mga Lamanita--- Si Pahoran naghahagad nin ayuda militar kontra sa mga rebelde.

*******

Hilnga, ngonian ini nangyaring naglipas na pagkatapos na si Moroni nakapagpadara na kan saiyang surat pasiring sa pinakapamayong gobernador, siya nakaresibe nin surat gikan ki Pahoran, an pinakapamayong gobernador. Asin an mga ini iyo an mga tataramon na saiyang naresibe:
2 Ako, si Pahoran, na iyo an pinakapamayong gobernador kaining kadagaan, iyo an nagpapaabot kaining mga tataramon ki Moroni, an pinakapamayong kapitan kan armada. Hilnga, ako nagsasabi saimo, Moroni, na ako dae nag-oogma sa saindong dakulaon na mga kasakitan, iyo, ini an ikinamumundo kan sakuyang kalag.
3 Pero hilnga, igwa talagang mga tawo na nag-oogma sa saindong mga kasakitan, iyo, na tanganing sinda mismo nag-alsa nin rebelyon kontra sa sakuya, asin man idtong sakuyang mga katawohan na maki-malaya, iyo, asin sinda na nag-alsa grabe kadakul an bilang.
4 Asin sinda na iyo an nagmamawot na kuahon an tukawan nin paghuhukom gikan sakuya iyo an kausa kaining dakulaon na kadaendatahan; nin huli ta sinda naggamit nin labi-labing pamboboladas, asin saindang nadara an mga puso nin kadakul na mga katawohan, na iyo baya an dahilan kan grabeng kasakitan sa pag-iriba ta; sinda na pinag-aagaw an satuyang mga pagkakan, asin pinatakot an satuyang mga katawohan na maki-malaya na dae sinda magkampi satuya.
5 Asin hilnga, pinalayas ninda ako sa saindang atubangan, asin ako nagdulag pasiring sa kadagaan nin Gideon, kairiba an kadakul na mga tauhan na puwede kong madara.
6 Asin hilnga, ako nagpadara nin proklamasyon kaining bilog na parte nin kadagaan; asin hilnga, sinda nagtitiripon satuya aro-aldaw, na dara an saindang mga armas, para idepensa an saindang nasyon asin an saindang kalayaan, asin ibalos an samuyang mga pagkakamali.
7 Asin sinda nagdurulok sa samuya, na tanganing sinda na nag-alsa nin rebelyon kontra samuya talagang nanindugan sa pakitusay, iyo, na tanganing sinda nagkatarakot samuya asin dae nagruluwas kontra samuya sa pakigiyera.
8 Saindang nakakaputan an kadagaan, o an siyudad nin Zarahemla; sinda nagngaran nin sarong hade sainda, asin siya nagsurat sa hade kan mga Lamanita, na nagsasabi na siya nakipag-alyado na saiya; na sa pagka-alyado kaini siya nakipagkasundo na imamantine an siyudad nin Zarahemla, na sa paaging ini saiyang pinaghuhuna-huna na magtata-ong dalan sa mga Lamanita na masakop an katadaan nin kadagaan, asin siya ipamumugtak na hade na mamamahala sa mga katawohan pagkatapos na sinda nasakop na sa irarom kan mga Lamanita.
9 Asin ngonian, sa saimong surat pinagbasol mo ako, pero ini mayo sakuya; ako dae naanggot, pero nag-oogma sa kadakulaon kan saimong puso. Ako, si Pahoran, dae naghahangad nin kapangyarihan, laen lang na iretine ko an tukawan nin paghuhukom na tanganing baya maipreserba ko an gma karapatan asin an libertad kan sakuyang mga katawohan. An sakuyang kalag naninindugan sa libertad na yaon kun saen an Diyos iyo an naghimo satuya na magin malaya.
10 Asin ngonian, hilnga, kami makikilaban sa kadaendatahan magin hanggan sa pagpapabulos nin dugo. Kami dae magpapabulos nin dugo kan mga Lamanita kun sinda mag-estar sana sa saindang sadireng daga.
11 Kami dae magpapabulos nin dugo kan samuyang mga katugangan kun sinda dae mag-alsa nin rebelyon asin magkapot nin espada kontra samuya.
12 Kami magpapasakop kan samuyang sadire sa gabat kan pagka-uripon kun ini iyo an kinakaipong hustisya nin Diyos, o kun siya magsugo samuya na gibohon ini.
13 Pero hilnga siya dae nagsugo samuya na ipasakop nyamo an samuyang mga sadire sa satuyang mga kalaban, kundi kami magbubugtak kan samuyang tiwala saiya, asin saiya kaming ililigtas.
14 Kun kaya, sakong namumutan na tugang, Moroni, magtarabang kitang kalabanon an karaotan, asin kun ano man na karaotan na dae ta kayang kalabanon sa paagi kan mga tataramon, iyo, arog kan rebelyon asin pagkakabarangaan, tarabangan tang kalabanon sinda sa paagi kan satuyang mga espada, na tanganing iretine ta an satuyang kalayaan, na tanganing kita mag-oorogmang dakula sa pribilihiyo kan satuyang simbahan, asin sa kausa kan satuyang Paratubos asin kan satuyang Diyos.
15 Kun kaya, magpadigde ka sakuya nin hidali kaiba an kadikit mong mga tauhan, asin bayae an katadaan sa pangangalaga ni Lehi asin Teancum; itao mo sainda an kapangyarihan na gibohon an pakigiyera sa parteng yan nin kadagaan, na uyon sa Espiritu nin Diyos, na iyo man an espiritu nin kalayaan na yaon sa sainda.
16 Hilnga ako nagpadara na nin kadikit na pagkakan sa sainda, na tanganing sinda dae magadan hanggan ika makadigde sa sakuya.
17 Tiriponon mong magkasararo an anuman na puwersang igwa ka sa pagpasiring digde, asin kami ma-atakeng hidali laban sa mga parakontra, sa kusog kan satuyang Diyos uyon sa pagtubod na yaon sa samuya.
18 Asin satuyang babawion liwat an siyudad nin Zarahemla, na tanganing makakua kita nin mga pagkakan na ipapadara ta kina Lehi asin Teancum; iyo, kita makikilaban sa sainda sa kusog nin Kagurangnan, asin satuyang tapuson ining dakulaon na kadaendatahan.
19 Asin ngonian, Moroni, ako nag-oogma sa pagkaresibe kan saimong surat, nin huli ta ako baya naghahandal manungod sa kun ano na an samuyang gigibohon, kun baya ini husto sa samuya na makilaban kontra sa satuyang mga katugangan.
20 Pero ika nakapagsasabi, laen lang kun sinda magsosolsol sa Kagurangnan na nagsugo saimo na ikaw dapat na makilaban kontra sainda.
21 Gibohon mo na pakusugon sinda Lehi asin Teancum sa Kagurangnan; sabihi sinda na dae matakot, nin huli ta an Diyos iyo an magliligtas sainda, iyo, asin man sa gabos sainda na naninindugan kaining libertad kun saen an Diyos iyo an naghimo saindang malaya. Asin ngonian ako magsasara kan sakuyang surat para sa sakuyang namumutan na tugang, na si Moroni.