An Libro Ni Mormon (An Saro Pang Tipan Ni Jesucristo)

Si Shiblon asin sa kahuri-hurihi si Helaman pinag-ako an sagradong mga talaan--- Kadakul na mga Nephita an nagbiyahe pasiring sa kadagaan sa may norteng parte--- Si Hagath naggibo nin mga barko, na naglalayag pasiring sa dagat pasulnupan--- Si Moronihah an nakadaog kan mga Lamanita sa sarong pakigiyera.

*******

Asin ini nangyaring naglipas na pagpoon kan ika-treynta asin anom na taon kan pagpapamahala nin mga huwes sa mga katawohan nin Nephi, na si Shiblon nag-ako kaidtong mga sagradong bagay na pinagtao ki Helaman ni Alma.
2 Asin siya sarong hustong tawo, asin siya naglalakaw nin matanos sa atubangan nin Diyos; asin siya naghingoha sa padagos na paggibo nin marhay, sa pagsunod sa mga kasugoan nin Kagurangnan saiyang Diyos, asin man an saiyang tugang na lalake.
3 Asin ini nangyaring naglipas na si Moronni nagadan na man. Asin kaya nagtapos an ika-treynta asin anom na taon kan pagpapapamahala nin mga huwes.
4 Asin ini nangyaring naglipas na sa ika-treynta asin pitong taon kan pagpapamahala nin mga huwes, nagkaigwa nin sarong dakulang pag-iriba nin mga tawo, na nag-abot sa limang ribo asin apat na gatos na mga tawo, kairiba an saindang mga agom na babae asin an saindang mga kaarakian, nagharale paluwas sa kadagaan nin Zarahemla pasiring sa kadagaan pahiraga.
5 Asin ini nangyaring naglipas na si Hagath, siya bilang sarong kuryosong gayong tawo, kun kaya siya naghale asin nagtugdok siya nin sarong dakulaon na barko, sa may mga kasagkoran nin kadagaan nin Masagana, sa may kadagaan nin Kalipungawan, asin ini pinaglansar pasiring sa dagat nin sulnopan, sa may hayakpit na dalan-dalan na minapasiring sa kadagaan pa-norte.
6 Asin hilnga, igwa nin kadakul na mga Nephita na nagsakay asin naglayag na may grabeng mga probisyon, asin man kadakul na mga babae asin kaarakian; asin sinda naglayag pasiring sa hiraga. Asin kaya nagtapos an ika-treynta asin pitong taon.
7 Asin sa ika-treynta asin walong taon, an tawong ini naggibo nin iba pang mga barko. Asin an enot na barko nagbalik man giraray, asin kadakul na mga katawohan an nagsarakay kaini; asin sinda man may darang kadakul na probisyon, asin nagbiyahe giraray pasiring sa kadagaan nin norte.
8 Asin ini nangyaring naglipas na sinda dae na nadangog pa. Asin samuyang pinaghuhuna-huna na sinda nagkarulunod na sa irarom nin kadagatan. Asin ini nangyaring naglipas na saro na naman na barko an naglayag; asin kun saen man siya nakaduman dae mi aram.
9 Asin ini nangyaring naglipas na sa taon na ini igwa nin kadakul na mga katawohan an nagpasiring sa kadagaan panorte. Asin kaya nagtapos an ika-treynta asin walong taon.
10 Asin ini nangyaring naglipas sa ika-treynta asin siyam na taon kan pagpapamahala nin mga huwes, si Shiglon nagadan man, asin si Corianton naghale pasiring sa kadagaan pa-norte sakay nin sarong barko, tanganing magdara nin mga probisyon para sa mga katawohan na nagpasiriring sa kadagaan na idto.
11 Kun kaya ini nagin kapakinabangan para ki Shiblon na iwalat an mga sagradong bagay na idto, bago siya nagadan, sa akeng lalake ni Helaman, na inapud na si Helaman, na pinag-apud sa ngaran kan saiyang ama.
12 Ngonian hilnga, idtong gabos na mga inukitan na kinakaputan ni Helaman na pinagsurat asin pinadara sa pag-iriba nin mga kaarakian nin mga tawo na yaon sa bilog na kadagaan, laen lang sa mga parteng idto na pinagsugo ni Alma na dae sinda magduruman.
13 Daeng pagkukulang, an mga bagay na ini dapat na ipagtagong sagrado, asin ipamana gikan sa sarong henerasyon hanggan sa iba pa; kun kaya, sa taon na ini, sinda ipinagkatiwala ki Helaman, bago pa man magadan si Shiglon.
14 Asin ini nangyaring naglipas sa taon man na ini na nagkaigwa nin mga parakontra na nagpasiriring sa mga Lamanita; asin sinda pinag surutsutan giraray na magka-aranggot kontra sa mga Nephita.
15 Asin man sa kaparehong taon sinda nagsaralakay na may kadakulon na armada tanganing makigiyera kontra sa mga katawohan ni Moronihah, o kontra sa armada ni Moronihah, na baya sinda nagkadaraog asin pinadurulag giraray pabalik sa sadire nindang mga lugar, na nagsapo nin grabeng kadaogan.
16 Asin kaya nagtapos an ika-treynta asin siyam na taon nin pagpapamahala kan mga huwes sa mga katawohan nin Nephi.
17 Asin kaya nagtapos an talaan ni Alma, asin Helaman na saiyang akeng lalake, asin man si Shiblon, na ake niya mang lalake.