An Libro Ni Mormon (An Saro Pang Tipan Ni Jesucristo)

Si Samuel naghula nin liwanag sa pagkabanggi asin sarong bag-ong bitoon sa kamundagan ni Cristo--- Si Cristo an matubos sa mga tawo gikan sa temporal asin espirituwal na kagdanan--- An mga senyal kan saiyang pagkagadan kinabalehan nin tulong aldaw nin kadikloman, an pagkabaraak nin mga gapo, asin dakulang pagbag-o kan panahon.

*******
Asin ngonian ini nangyaring naglipas na si Samuel, an Lamanita, nagpropesiya nin sarong dakulaon na kadakulong pang mga bagay na dae puwedeng maisurat.
2 Asin hilnga, siya nagsabi sa sainda: Hilnga, ako nagtatao saindo nin sarong senyal; nin huli ta limang taon pa an mag-abot, asin hilnga, pagkatapos mag-aabot an Ake nin Diyos tanganing tubuson gabos sinda na nagtutubod sa saiyang pangaran.
3 Asin hilnga, ini itatao ko saindo para sarong senyal sa panahon na siya mag-abot; nin huli ta hilnga, magkakaigwa nin kadakulon na liwanag sa kalangitan, na tangani baya na sa banggi bago siya mag-abot dae magkakaigwa nin kadikloman, na tangani baya na ini magpahiling sa tawo na arog baga na ini sarong aldaw.
4 Kun kaya, magkakaigwa nin sarong aldaw asin sarong banggi asin sarong aldaw, na garo baga na ini sarong aldaw asin ta dae nagkaigwa nin banggi; asin ini para saindo sarong senyal; nin huli ta kamo makakaaram sa pagsirang kan saldang asin man kan pagsulnop kaini; daeng pagkukulang na an banggi dae magkakaigwa nin diklom; asin ini an kabanggihan bago siya imundag.
5 Asin hilnga, magkakaigwa nin sarong bag-ong bitoon na magsisirang, na arog kan saro na dae pa nanggad nindo nagkahiriling; asin ini man magigin sarosng senyal sa saindo.
6 Asin hilnga bako sana ini gabos, magkakaigwa nin kadakul pang mga senyal asin mga kangangalasan sa langit.
7 Asin ini mangyayaring maglipas na kamo gabos matikbalo asin mangangalas, na tangani baya na kamo magkakaturumba sa daga.
8 Asin ini mangyayaring maglipas na an siisay man na magtutubod sa Ake nin Diyos, siya magkakaigwa nin daeng katapusan na buhay.
9 Asin hilnga, kaya an Kagurangnan an nagsugo sako, sa paagi kan saiyang anghel, na ako dapat na magpadigde asin isabi ining mga bagay sa saindo; iyo, siya nagsugo na ako dapat na ipagpropesiya ining mga bagay sa saindo; iyo, siya nagsabi sa sako: Ikurahaw mo sa mga katawohang ini, magsolsol asin andamon an dalan nin Kagurangnan.
10 Asin ngonian, nin huli sa ako sarong Lamanita, asin nakapagtaram sa saindo nin mga tataramon na an Kagurangnan iyo an nagsugo sakuya, asin nin huli ta ini magabat kontra saindo, kamo nagka-aranggot sako asin nagmawot na destrosohon ako, asin pinagpahale paluwas gikan sa pag-iriba nindo.
11 Asin saindong madadangog an sakong mga tataramon, nin huli ta, sa arog kaining intensiyon kaya ako nagsakat sa mga muralya kaining siyudad, na tangani baya kamo makakadangog asin makakaaram sa mga paghuhukom nin Diyos na naghahalat saindo nin huli kan saindong mga kadaendatahan, asin man tanganing puwede nindong magka-araraman an mga kondisyones kan pagsosolsol.
12 Asin man na tangani baya puwede nindong magkaararaman an pag-abot ni JesuCristo, an Ake nin Diyos, an Ama kan langit asin kan daga, an Kaglalang kan gabos na mga bagay gikan pa sa kapinunan; asin na tangani puwede nindong magkaararaman an mga senyales kan saiyang pag-abot, sa intensiyon na tangani kamo puwedeng magtubod sa saiyang pangaran.
13 Asin kun kamo magtutubod sa saiyang pangaran kamo magsosolsol kan gabos nindong mga kasalanan, na pagkatapos kamo puwedeng magkakaigwa nin kapatawaran kan mga ini sa paagi kan saiyang mga merito.
14 Asin hilnga, giraray, may iba pang senyal akong itatao sa saindo, iyo, an senyal kan saiyang kagadanan.
15 Nin huli ta hilnga, siya seguradong magagadan na tanganing an kaligtasan dapat na mag-abot; iyo, ini ipinagputong saiya asin magigin kapakinabangan na siya magagadan, tanganing darahon na mag-agi an pagkabuhay-liwat kan mga gadan, na baya an mga tawo puwedeng madara pasiring sa presensiya nin Kagurangnan.
16 Iyo, hilnga, ini kagadanan na nagdarang maglipas an pagkabuhay-liwat, asin magtutubos sa bilog na nilalang gikan sa enot na kagadanan--- idtong espirituwal na kagadananl para sa bilog na nilalang, sa paagi kan pagkahulog ni Adan na pinaluwas gikan sa presensiya nin Kagurangnan, na pinagkonsidera bilang gadan, pareho sa mga bagay na temporal asin mga bagay na espirituwal.
17 Pero hilnga, an pagkabuhay-liwat kan Cristo nagtutubos sa nilalang, iyo, magin an bilog na nilalang, asin magdadara sainda pabalik sa presensiya nin Kagurangnan.
18 Iyo, asin ini nagdadara na maglipas an kondisyon kan pagsosolsol, na an siisay an nagsosolsol siya dae tutumbahon asin isusugba pasiring sa kalayo; pero an siisay man na dae nagsosolsol iyo an tutumbahon nasin isusugba pasiring sa kalayo; asin magkakaigwa nin pag-abot sa sainda giraray nin sarong espirituwal na kagadanan, iyo, an ikaduwang kagadanan, nin huli ta sinda pinaghale na giraray sa mga bagay na mapanungod sa pagkamatanos.
19 Kun kaya magsolsol kamo, magsolsol kamo, ta baka sa paagi kan pagkaaram kaining mga bagay asin dae na nindo gigibohon kamo magsasapo sa saindong mga sadire na yaon sa irarom nin kondenasyon, asin kamo pagdadarahon pababa pasiring sa ikaduwang kagadanan.
20 Pero hilnga, habang ako nagsasabi sa saindo manungod sa iba pang senyal, an senyal kan saiyang kagadanan, hilnga, sa aldaw na yan na siya nagsasapo nin kagadanan an saldang magdidiklom asin habang magtatao kan saiyang liwanag sa saindo; asin man an bulan asin an mga bitoon; asin dae magkakaigwa nin liwanag sa lalawgon kaining kadagaan, magin pagpoon sa panahon na siya magsasapo nin kagadanan, sa laog nin tulong aldaw, hanggan sa panahon na siya mabubuhay-liwat gikan sa gadan.
21 Iyo, sa panahon na saiyang ipaghuhunod an espiritu magkakaigwa nin mga pagdadaguldol asin nin mga pagkikilat sa laog nin kadakul na mga oras, asin an daga maglilinog asin magyuyogyog; asin an mga gapo na yaraon sa lalawgon kaining kinaban; na parehong yaon sa ibabaw nin kinaban asin sa irarom, na saindong naaraman sa panahon na ini na birilog pa, o an pinakaparte kaini iyo an sarong pinabilog na kinamumugtakan, magkakabaraak;
22 Iyo, sinda magkakabaranga sa duwa, asin padagos na magkakanaragboan na yaon sa kasiringitan asin sa mga kabaraakan, asin yaon sa baak na karugmukan sa ibabaw nin lalawgon kan bilog na kinaban, pareho sa ibabaw nin kinaban asin sa irarom.
23 Asin hilnga, magkakaigwa nin makukusog na mga bagyo, asin magkakaigwa nin kadakul na mga kabukidan an maghaharababa na arog sa sarong burukid-bukid, asin magkakaigwa nin kadakul na mga lugar na pinag-aarapud na mga burukid-bukid na magigin mga kabukidan, na an kahalangkawan grabe.
24 Asin kadakul na mga tinampo an magkakabaraak, asin kadakul na mga siyudad magigin kalipungawan.
25 Asin kadakul na mga lubungan an magkakaburukasan, asin magluluwa kan saindang mga gadan; asin kadakul na mga santo an magpapahiling sa kadaklan.
26 Asin hilnga, iyo ini an pinagsabi kan anghel sako; nin huli ta siya nagsabi sako na magkakaigwa nin kadakul na mga pagdadaguldol asin mga pagkikilat sa laog nin kadakul na mga oras.
27 Asin siya nagsabi sako na habang an daguldol asin an kikilat nagtatagal, asin an bagyo, na an mga bagay na ini maninigo, asin an kadikloman maglalakop sa lalawgon kan bilog na kinaban sa laog nin tulong aldaw.
28 Asin an anghel nagsabi sa sako na kadakul an makakahiling nin darakulang mga bagay kesa kaini, sa intensiyon na sinda puwedeng magturubod na an mga senyales na ini asin ining mga kangangalasan dapat na maglipas sa bilog na lalawgon kaining kadagaan, sa intensiyon na dae dapat na magkaigwa nin dahilan para dae magtubod an pag-iriba nin kaarakian kan mga tawo---
29 Asin ini para sa intensiyon na an siisay an magtutubod puwedeng maliligtas, asin na an siisay man an dae magtutubod, sarong matanos na paghuhukom an puwedeng mag-abot sa sainda; asin man kun sinda pinagkondena saindong pinagdara sa saindang mga sadire an sainda man sanang kondenasyon.
30 Asin ngonian giromdoma, giromdoma baya, sakong mga katugangan, na an siisay man an naggigibo nin kadaendatahan, naggibo kaini sa saiyang sadire man sana; nin huli ta hilnga, kamo nga libre; kamo may permiso na gumibo para sa saindong mga sadire; nin huli ta hilnga, an Diyos nagtao sa saindo nin sarong kaaraman asin saiya kamong ginibong libre.
31 Siya nagtao sa saindo na tanganing kamo may pagkaaram nin marhay gikan sa maraot, asin saiyang pinagtao sa saindo na tanganing puwede kamong pinili nin buhay o kagadanan; asin kamo makakagibo nin marhay asin maibalik sa bagay na marhay, o magkaigwa kan bagay na marhay na maibabalik sa saindo; o kamo makakagibo nin maraot, asin magkaigwa kan bagay na maraot na maibabalik sa saindo.