An Libro Ni Mormon (An Saro Pang Tipan Ni Jesucristo)

Mga unos, mga linog, mga kalayo, mga buhawi, asin mga pisikal na mga karinsalan nagpapatunay sa pagkakapako ni Cristo--- Kadakul na mga katawohan an nagkaparahamak--- An kadikloman naglakop sa kadagaan sa laog nin tulong aldaw--- Sinda na nagkatarada nagngungoyngoy sa saindang namatean.

*******

Asin ngonian ini nangyaring naglipas na uyon sa satuyang rekord, asin satuyang aram na an mga rekord totoo, nin huli ta hilnga, kaidto sarong hustong tawo iyo an nagtatago sa mga rekord--- nin huli ta siya tunay na naggibo nin kadakul na mga milagro sa pangaran ni Jesus; asin mayo na siisay man na tawo na makapaggibo nin sarong milagro sa pangaran ni Jesus laen lang na siya nakapaglinig na kan lambang kudlit kan saiyang kadaendatahan---
2 Asin ngonian ini nangyaring naglipas, kun mayong kasalaan na ginibo kaining tawo sa mga naglipas kan satuyang panahon, an ika-treynta asin tulong taon an naglipas na;
3 Asin an mga katawohan nagpoon sa paghanap na may dakulang kaigotan para sa senyal na ipinagtao ni propetang Samuel, an Lamanita, iyo, nin huli sa panahon na nagkaigwa nin kadikloman sa laog nin tulong aldaw sa ibabaw kan lalawgon nin kadagaan.
4 Asin nagkaigwa nin pagpoon nin dakulang mga pagdududa asin mga pag-iiriwal-iwal sa pag-iriba kan mga katawohan, maski na ngani sa kadakul na mga senyales an naipahayag na.
5 Asin ini nangyaring naglipas na sa ika-treynta asin apat na taon, sa enot na bulan, sa ika-apat na aldaw kan bulan, nagkaigwa nin sarong dakulaon na bagyo, na dae pa nanunumpungan sa bilog na kadagaan.
6 Asin nagkaigwa man nin sarong unos; asin nagkaigwa nin teribleng pagdadaguldol, na tangani baya ini nakapagyugyog sa bilog na kinaban na garo baga haros ini mababangang gayo na magkapururak.
7 Asin nagkaigwa nin grabe na gayong mga pagkikilat, na dae pa nanunumpungan sa bilog na kadagaan.
8 Asin an siyudad nin Zarahemla nasulo.
9 Asin an siyudad nin Moroni nagtundag sa kairaroman kan dagat, asin an mga naka-erok duman nagkaralamos.
10 Asin an daga nag-usbong sa siyudad nin Moronihah, na an karibay kan siyudad iyo na nagkaigwa nin sarong dakulaon na bukid.
11 Asin nagkaigwa nin sarong dakulaon asin teribleng destruksiyon sa kadagaang parte nin katimogan.
12 Pero hilnga, nagkaigwa nin mas grabe pang kadakulaon asin teribleng destruksiyon sa kadagaan na parte nin kahiragaan; nin huli ta hilnga, an bilog na lalawgon nin kadagaan nagkabarag-o, nin huli sa unos asin kan mga buhawi, asin kan mga pagdadaguldol asin mga pagkikilat, asin an grabe na gayong pagyuyugyog kan bilog na kinaban;
13 Asin an mga katinampuhan nagkabaraak, asin an mga kapatagan kan mga tinampo nagin mayong pakinabang, asin kadakul na patag na lugar nagin maharaphap.
14 Asin kadakul na mga dakula asin bantog na mga siyudad an nagkarulubog, asin kadakul an nagkasurulo, asin kadakul an nagkaruyugyog hanggan sa an mga pagharongon kaini nagkaguruho sa daga, asin an mga nag-eerok duman nagkagaradan, asin an mga lugar nagkabarayaan na mapungawon.
15 Asin igwa nin iba pang mga siyudad na nagkatarada; pero an kadestrosohan kaini grabeng gayo, asin kadakul sa sainda an nagkagaradan.
16 Asin igwa nin iba na nagkadarara paharayo kan buhawi; asin nagkawarara sinda na dae na mapag-araman nin tawo kun anong nangyari, laen lang na sinda naaraman na pinagdagit paharayo.
17 Asin kaya an lalawgon nin bilog na kinaban nagin mayong porma, nin huli sa mga unos, asin kan mga pagdadaguldol, asin kan mga pagkikilat, asin kan paglinog kan daga.
18 Asin hilnga, an mga gapo nagkabaraak sa duwa; sin napagbaranga sa lalawgon kan bilog na kinaban, na tangani baya na an mga ini mananagboan sa saradit na mga pedaso, asin garaak asin garatak, sa bilog na lalawgon nin daga.
19 Asin ini nangyaring naglipas na kan an mga pagdaradaguldol, asin mga pagkikilat, asin pagbagyo, asin pag-unos, asin an mga paglinog kan daga nagpundo na--- nin huli ta hilnga, an mga ini nagtagal sa laog nin tulong oras; asin ini pinagsabi kan iba na an oras naghaloy; daeng pagkukulang, an gabos na ining mga darakula asin teribleng mga bagay nangyari sa laog nin tulong oras--- asin baya hilnga, nagkaigwa nin kadikloman sa lalawgon nin kadagaan.
20 Asin ini nangyaring naglipas na nagkaigwa nin kunop na kadikloman sa bilog na lalawgon nin kadagaan, na tangani baya na an mga nag-eerok na dae napahamak namamatean an sangaw nin kadikloman;
21 Asin dae nagkaigwa nin liwanag, nin huli sa kadikloman, ni mga kandila, ni maski mga karaba; ni magkaigwa nin kalayo na makadukol sa saindang marhay asin grabe kadagang na sunog, na tangani dae nanggad nagkaigwa nin anoman na liwanag;
22 Asin mayo nin anoman na liwanag na mahihiling, ni kalayo, ni kislap, ni an saldang, ni an bulan, ni an mga bitoon, nin huli ta grabeng gayo an mga kunop nin kadikloman na yaon sa lalawgon nin kadagaan.
23 Asin ini nangyaring naglipas na ini nagtagal sa laog nin tulong aldaw na mayong liwanag an nahihiling; asin nagkaigwa nin padagos na dakulang pagmumundo asin pag-amuyong; asin pagtatangis sa pag-iriba kan bilog na mga katawohan; iyo, grabeng gayo an mga pag-agrangay nin mga katawohan, nin huli sa kadikloman asin sa dakulaon na kapahamakan na nag-abot sa sainda.
24 Asin sa sarong lugar sinda nadangog na nagkukururahaw, na nagsasabi: O marhay ngani ta kita nakapagsolsol bago pa man nag-abot ining dakulaon asin teribleng aldaw, asin kuta na an satuyang mga katugangan nagkariligtas, asin sinda dae kuta na nagkasurulo duman sa bantog na siyudad nin Zarahemla.
25 Asin sa ibang lugar sinda nagkadarangog na nagkukururahaw asin nagmumurundo, na nagsasabi: O marhay ngani ta kita nakapagsolsol bago pa man nag-abot ining dakulaon asin teribleng aldaw, asin dae nakagadan asin nakagapo sa mga propeta, asin pinagsikwal-sikwal sinda; na tangani an satuyang mga ina asin an satuyang magagayon na mga akeng babae, asin an satuyang mga kaarakian nagkariligtas, asin dae nagkarulubong duman sa bantog na siyudad nin Moronihah. Asin kaya iyo ini an mga pagtatarangis kan mga katawohan na grabe asin terible.