An Libro Ni Mormon (An Saro Pang Tipan Ni Jesucristo)

Milyones na mga Jaredita an nagkagaradan sa ralabanan--- Si Shiz asin Coriantumr pinagtiripon an bilog na mga katawohan para sa sarong mortal na pakipaglabanan--- An Espiritu nin Diyos dae na nag-eerok sa sainda--- An nasyon nin mga Jaredita dagos nang nadestroso--- Si Coriantumr sana an natada.

*******

Asin ini nangyaring naglipas na kan si Coriantumr narahay na kan saiyang mga lugad, siya nagpopoon na makagiromdom sa mga tataramon ni Ether na pinagtaram sa saiya.
2 Saiyang nahiling na igwa nang nagadan sa paagi nin espada na haros mag-abot na sa duwang milyon kan saiyang mga katawohan; asin siya nagpopoon na magmundo sa saiyang puso; iyo, nagkaigwa na nin duwang milyon na nagkagaradan na makukusog na mga tawo, asin man an saindang mga agom asin an saindang mga kaarakian.
3 Siya nagpopoon na magsorolso sa mga karaotan na saiyang nagkaginibohan; siya nagpoon na makagiromdom sa mga tataramon na pinagsabi na kan mga nguso kan gabos na mga propeta, asin siayang nasaksihan sinda na nagkaka-urutob nang gayo, sa lambang kurit; asin an saiyang kalag nagmundo asin habong magparangan.
4 Asin ini nangyaring naglipas na siya nagsurat nin sarong surat ki Shiz, na pinagmamawot niya na saiyang palibrehon an mga katawohan, asin saiyang itatao na an kahadean nin huli sana sa kapakanan kan mga buhay nin mga katawohan.
5 Asin ini nangyaring naglipas na kan si Shiz nagresibe kan saiyang surat siya nagsurat nin sarong surat ki Coriantumr, na kun siya magsuko kan saiyang sadire, na tanganing saiya siyang gadanon kan sadire niyang espada, saka na niya palilibrehon an mga buhay nin mga katawohan.
6 Asin ini nangyaring naglipas na an mga katawohan dae nagsorolsol kan saindang mga kadaendatahan; asin an mga katawohan ni Coriantumr pinag-estera na magka-aranggot kontra sa mga katawohan ni Coriantumr; kun baya, an mga katawohan ni Shiz nagtao nin pakipaglabanan sa mga katawohan ni Coriantumr.
7 Asin kan si Coriantumr nakasaksi na siya haros madadaog na siya nagdulag giraray sa atubangan kan mga katawohan ni Shiz.
8 Asin ini nangyaring naglipas na siya nakaabot sa katubigan kan Ripliancum, na, sa paagi nin interpretasyon, sarong dakulaon, o maglalampas kan gabos; kun baya, kan sinda nakaabot sa mga katubigang ini sinda nagturugdok kan saindang mga tolda; asin si Shiz man nagturugdok kan saiyang mga tolda na harani sainda; asin kun kaya sa kinamaagahon sinda nagsarabatan sa pakipaglabanan.
9 Asin ini nangyaring naglipas na sinda nagralabanan nin sarong grabeng gayo katinding labanan, na kun saen si Coriantumr nalugadan giraray, asin siya pinanluyahan sa kawaraan nin dugo.
10 Asin ini nangyaring naglipas na an armada ni Coriantumr nag-atake sa mga armada ni Shiz na tanganing madaog ninda sinda; na tanganing nagkausa sainda na magdurulag sa atubangan ninda; asin sinda nagdurulag pasiring sa timog na parte, asin nagturugdok kan saindang mga tolda sa lugar na pinag-aapod na Ogath.
11 Asin ini nangyaring naglipas na an armada ni Coriantumr nagtugdok kan saindang mga tolda sa harani kan burobukid na Ramah; asin ini idtong bukid kun saen an sakuyang ama na si Mormon pinagtago an mga rekord para sa Kagurangnan, na mga sagrado.
12 Asin ini nangyaring naglipas na sinda nagkatiripon-tipon na magkasararo an bilog na mga katawohan sa bilog na lalawgon nin kadagaan, na dae nagkagaradan, laen pa ki Ether.
13 Asin ini nangyaring naglipas na si Ether nasaksihan an gabos na mga kaggibohan kan mga katawohan; asin saiyang nahiling na an mga katawohan na gusto ki Coriantumr nagkatiripon-tipon na magkasararo sa armada ni Coriantumr; asin an mga katawohan na gusto ki Shiz nagkatiripon-tipon na magkasararo sa armada ni Shiz.
14 Kun baya, sinda nag-abot sa laog nin apat na taon sa pagtitiripon-tipon na magkasararo an mga katawohan, na tangani baya sinda makakakurua gabos na yaon sa lalawgon nin kadagaan, asin na sinda puwedeng makaresibe kan gabos na kusog na ini na posible na saindang puwedeng magkakakurua.
15 Asin ini nangyaring naglipas na kan panahon na sinda gabos nakapagtiripon-tipon nang magkasararo, an lambang saro sa armada na pinaggusto niya, kairiba an saindang mga agom asin an saindang mga kaarakian--- parehong mga lalake, mga babae asin mga kaarakian na pinag-armasan nin mga armas panggiyera, na may mga panangga, asin mga suknong sa daghan, asin panagang sa payo, asin pinagbadoan susog sa manera kan giyera--- sinda nagmartsa pa-abante an saro kontra sa saro sa pakikipaglaban; asin sinda nagralabanan sa bilog na aldaw na yan, asin daeng nakapanggana.
16 Asin ini nangyaring naglipas na kan banggi na sinda nagkaparagal na, asin nagbaralik na sa kanya-kanyang mga kampo; asin pagkatapos na sinda nakapagpahingalo na sa saindang mga kampo sinda nag-aragrangay nin sarong kinurahaw asin sarong boses nin kapaitan para sa kawaraan kan mga nagkagaradan na mga katawohan; asin grabeng gayo an saindang mga pag-aragrangay, an saindang mga kinurahaw asin boses nin kapaitan, na saindang haros baraakon an paros sa kabulingugan.
17 Asin ini nangyaring naglipas na sa kinaagahan sinda giraray nagduruman sa pakipaglabanan, asin dakula asin terible an aldaw na idto; daeng pagkukulang, sinda daeng nakapanggana, asin kan an banggi nag-abot giraray saindang pinagbabaak an paros kan saindang mga inagrangay, asin kan saindang mga kinurahaw, asin kan saindang mga pagmumurundo, nin huli sa kawaraan kan mga nagkagaradan nindang mga katawohan.
18 Asin ini nangyaring naglipas na si Coriantumr nagsurat giraray nin sarong surat ki Shiz, nagmamawot na dae na siya mag-atake giraray sa pakikipaglabanan, pero saiya nang kuahon an kahadean, asin palibrehon na an mga buhay nin mga katawohan.
19 Pero hilnga, an Espiritu nin Kagurangnan nag-untok na sa pakipag-iba sainda, asin si Satanas nagkaigwa nin bilog na kapangyarihan na mangingibabaw sa mga puso nin mga katawohan; nin huli ta sinda pinagpatunod na sa katagasan kan saindang mga puso, asin sa kabilugan kan saindang mga isip na tangani sinda puwedeng magkaderestroso; kun baya sinda nagpaduman na giraray sa pakikipaglabanan.
20 Asin ini nangyaring naglipas na sinda nagralaban sa bilog na aldaw na idto, asin kun banggi sinda nakakatururog kairiba an saindang mga espada.
21 Asin sa kinaagahan sinda nakikipaglabanan magin sagkod na an banggi mag-abot.
22 Asin kun an banggi mag-abot na sinda nagkakabururat sa kaanggutan, na magin arog sa sarong tawo na naburat sa arak; asin sinda nakatururog giraray kairiba kan saindang mga espada.
23 Asin sa kinaagahan sinda nakikipaglabanan giraray; asin kan an banggi nag-abot na sinda gabos nagkaturumba sa paagi nin espada laen lang sa singkuwenta asin duwang katawohan ni Coriantumr, asin saisenta asin siyam na mga katawohan ni Shiz.
24 Asin ini nangyaring naglipas na sinda natururog kairiba an saindang mga espada sa bangging idto, asin sa kinaagahan sinda nakikipaglabanan giraray, asin sinda nagralabanan sa saindang kusog kan saindang mga espada asin kan saindang mga panangga, sa bilog na aldaw na idto.
25 Asin kan an banggi nag-abot igwa na sanang trenta asin duwang mga katawohan si Shiz, asin beynte asin pitong mga katawohan si Coriantumr.
26 Asin ini nangyaring naglipas na sinda nagkarakan asin nagtururog, asin nag-aandam para sa kagadanan ninda sa kinaagahan. Asin sinda darakula asin makukusog na mga tawo arog sa kusog nin mga tawo.
27 Asin ini nangyaring naglipas na sinda nagralaban-laban sa laog nin tulong oras, asin sinda pinagpanruluyahan sa kawaraan nin dugo.
28 Asin ini nangyaring naglipas na kan an mga katawohan ni Coriantumr nakapagresibe nin awad-awad na kusog na tanganing sinda puwedeng makapaglakaw, sinda kuta na madurulag na para sa saindang mga buhay; pero hilnga, si Shiz nagtindog, asin man an saiyang mga tawo, asin siya nanumpa sa saiyang kaanggutan na saiyang gagadanon si Coriantumr o siya mapapara sa paagi nin espada.
29 Kun baya, saiyang pinagralamag sinda, asin sa kinaagahan saiyang nagka-arabutan sinda; asin sinda nagralabanan giraray sa paagi nin espada. Asin ini nangyaring naglipas na kan sinda gabos nagkaturumba na sa paagi nin espada, laen lang kina Coriantumr asin Shiz, hilnga si Shiz pinanluyahan na sa kawaraan nin dugo.
30 Asin ini nangyaring naglipas na kan si Coriantumr pinagbingat na an saiyang espada, na siya nagpahingalo nin kadikit, saiyang pinagtagpas an payo ni Shiz.
31 Asin ini nangyaring naglipas na pagkatapos na saiyang tagpason an payo ni Shiz, na si Shiz pinagtaas an saiyang kamot asin nagbagsak; asin pagkatapos kaini siya nagpirit na maghangos, siya nagadan.
32 Asin ini nangyaring naglipas na si Coriantumr natumba sa daga, asin nagin arog baga na siya mayo nang buhay.
33 Asin an Kagurangnan nagtaram ki Ether, asin nagsabi sa saiya: Lakaw. Asin siya naglakawm, asin nasaksihan na an mga tataramon nin Kagurangnan an gabos nagka-urutob na; asin siya nagtapos kan saiyang rekord; (asin an sarong mananggatuson na parte ako dae na nagsurat asin saiyang pinagtago na an mga ini na arog sa manera na an mga katawohan ni Limhi na nakanagbo kaini.
34 Ngonian an mga huring tataramon na pinagsurat ni Ether iyo an mga ini: Maski na an Kagurangnan nagmawot na ako magin translado, o na ako nagtugot sa kawamotan nin Kagurangnan sa laman, di bale na, kun ini iyo na ako makaligtas sa kahadean nin Diyos. Amen.