An Libro Ni Mormon (An Saro Pang Tipan Ni Jesucristo)

An talaan kan mga Jaredita, pinaghango gikan sa beynte-kuwatrong mga lamina na nanagboan kan mga katawohan ni Limhi sa mga aldaw ni hadeng Mosiah.

TSAPTER 1

Si Moroni an nagpahalipot sa mga kasuratan ni Ether--- an talaan kan tala-anakan ni Ether pinaghimo--- An lengguwahe kan mga Jaredita dae pinaglawigaw sa Torre kan Babel--- An Kagurangnan nagpromisa na mangenotan sa sainda pasiring sa piling kadagaan asin gibohon sindang sarong dakulaong nasyon.

*******

Asin ngonian ako, si Moroni, nagpadagos sa pagtao nin kasaysayan ninda na mga lumang namamanwaan na pinagdestroso sa paagi kan kamot nin Kagurangnan sa lalawgon kaining norteng nasyon.
2 Asin sakuyang kinua an kasaysayan gikan sa beynte-kuwatrong lamina na nanagboan kan mga katawohan ni Limhi, na pinag-apud na Libro ni Ether.
3 Asin ako naghuna na an enot na parte kaining talaan, na nagsasabi mapanungod sa paglalang kan kinaban, asin man ki Adan, asin sarong kasaysayan gikan sa panahon na idto sagkod sa dakulaong torre, asin an anumang bagay na nangyari sa pag-iriba kan mga kaarakian nin mga tawo sagkod sa panahon na idto, na arog man an nangyari sa pag-iriba kan mga Judio---
4 Kun kaya ako dae na masurat kaidtong mga bagay na nangyari gikan sa mga aldaw ni Adan sagkod sa panahon na idto; pero sinda nasurat sa mga lamina; asin an siisay man an makakabasa sainda, parehong magkakaigwa nin kapangyarihan na tanganing saiyang makua an bilog na kasaysayan.
5 Pero hilnga, ako dae nagtao kan bilog na kasaysayan, kundi an sarong parte kan kasaysayan an sakuyang itinao, magpoon sa torre sagkod na sinda magkaderestroso/
6 Asin sa kadunungang ini ako matao nin kasaysayan. Siya na nagsurat kaining talaan iyo si Ether, asin siya saro sa kamako-apoan ni Coriantor.
7 Si Coriantor akeng lalake ni Moron.
8 Asin si Moron akeng lalake ni Ethem.
9 Asin si Ethem akeng lalake ni Ahah.
10 Asin si Ahah akeng lalake ni Seth.
11 Asin si Seth akeng lalake ni Shiblon.
12 Asin si Shiblon akeng lalake ni Com.
13 Asin si Com akeng lalake ni Coriantum.
14 Asin si Coriantum akeng lalake ni Amnigaddah.
15 Asin si Amnigaddah akeng lalake ni Aaron.
16 Asin si Aaron sarong kamaku-apoan ni Heth, na akeng lalake ni Hearthom.
17 Asin si Hearthom akeng lalake ni Lib.
18 Asin si Lib akeng lalake ni Kish.
19 Asin si Kish akeng lalake ni Corom.
20 Asin si Corom akeng lalake ni Levi.
21 Asin si Levi akeng lalake ni Kim.
22 Asin si Kim akeng lalake ni Morianton.
23 Asin si Morianton sarong kamaku-apoan ni Riplakish.
24 Asin si Riplakish akeng lalake ni Shez.
25 Asin si Shez akeng lalake ni Heth.
26 Asin si Heth akeng lalake ni Com.
27 Asin si Com akeng lalake ni Coriantum.
28 Asin si Coriantum akeng lalake ni Emer.
29 Asin si Emer akeng lalake ni Omer.
30 Asin si Omer akeng lalake ni Shule.
31 Asin si Shule akeng lalake ni Kib.
32 Asin si Kib akeng lalake ni Orihah, na akeng lalake ni Jared;
33 Na an Jared na ini nagluwas kairiba an saiyang tugang na lalake asin an saindang mga pamilya, kairiba an iba man asin an saindang mga pamilya, gikan sa dakulang torre, sa panahon na an Kagurangnan pinaglawigaw an lengguwahe kan mga katawohan, asin nagsumpa sa saiyang kaanggutan na sinda magkawararak sa bilog na lalawgon; asin uyon sa tataramon nin Kagurangnan an mga katawohan nagkawararak.
34 Asin an tugang na lalake ni Jared na sarong dakulaon asin makusugong tawo, asin sarong tawo na halangkawong pinapaurog nin Kagurangnan, si Jared, an saiyang tugang na lalake, nagsabi sa saiya: Mag-apod ka sa Kagurangnan, na dae niya kita pagpalawigawon na tanganing dae kita magkasarabatan kan satuyang mga tataramon.
35 Asin ini nangyaring naglipas na an tugang na lalake ni Jared nag-apod sa Kagurangnan, asin an Kagurangnan igwang pagkaherak ki Jared; kun kaya dae niya pinaglawigaw an lengguwahe ni Jared; asin si Jared asin an saiyang tugang na lalake dae pinaglawigaw.
36 Pagkatapos si Jared nagsabi sa saiyang tugang na lalake: Mag-apud ka giraray sa Kagurangnan, asin baka baga na saiyang haleon an saiyang kaanggutan sa sainda na satuyang mga amigo, na tanganing dae niya pagpalawigawon an saindang lengguwahe.
37 Asin ini nangyaring naglipas na an tugang na lalake ni Jared nag-apud sa Kagurangnan, asin an Kagurangnan igwa nin pagkaherak sa saindang mga amigo asin sa saindang mga pamilya man, na tanganing sinda dae pinaglawigaw.
38 Asin ini nangyaring naglipas na si Jared nakiolay giraray sa saiyang tugang na lalake, na nagsasabi: Lakaw asin hapoton mo an Kagurangnan kun saiya kitang pinapahale paluwas sa kadagaan, asin kun saiya kitang pinapahale paluwas sa kadagaan, maghapot ka saiya kun kita maharale na. Asin siisay pa baya an nakakaaram kundi an Kagurangnan na iyo an magdadara satuya pasiring duman sa sarong kadagaan na piniling labaw pa sa bilog nin kinaban? Asin kun iyo man nanggad ini, dapat kitang mapano nin pagtubod sa Kagurangnan, na tanganing satuyang makamtan ini para sa satuyang kamanahan.
39 Asin ini nangyaring naglipas na an tugang na lalake ni Jared nag-apud sa Kagurangnan na uyon duman sa sinabi kan nguso ni Jared.
40 Asin ini nangyaring naglipas na an Kagurangnan nagdangog sa tugang na lalake ni Jared, asin naherak sa saiya, asin nagsabi sa saiya:
41 Lakaw asin tiriponong magkasararo an saimong mga hayupan, parehong lalake asin babae, sa lambang klase; asin man nin banhi kan kinaban sa lambang klase; asin an saimong mga pamilya; asin man si Jared na saimong tugang asin an saiyang pamilya; asin man an saimong mga amigo asin an saindang mga pamilya, asin an mga amigo ni Jared asin an saindang mga pamilya.
42 Asin sa panahon na saimo nang naggibo ini ika an mapaduman sa pamayuhan ninda pasiring duman sa lambak na pasiring sa norteng parte. Asin duman ta ka halaton, asin magduduman enot sa saimo pasiring sa sarong kadagaan na piniling labaw sa gabos na mga kadagaan nin kinaban.
43 Asin duman ta ka bebendisyunan asin an saimong banhi, asin padadakulaon mo para sa sakuya an saimong banhi, asin an banhi kan saimong tugang na lalake, asin sinda na mag-iriba saimo, na magin sarong dakulaon na nasyon. Asin dae magkakaigwa pa nin mas halangkaw pang nasyon na sakuyang aalagaan para sa sakuya na saimong banhi, sa bilog na lalawgon nin kinaban. Asin kaya ako maggigibo kaini saimo nin huli sa halawig na panahon na ika nag-aapud sa sakuya.