An Libro Ni Mormon (An Saro Pang Tipan Ni Jesucristo)

Giyera asin pagkararaot nagpadagos--- An maririgsok nagpapadusa sa maririgsok--- Grabe kadakulaon na karigsokan nangyari kesa kaidto sa bilog na Israel--- Mga kababaehan asin mga kaarakian pinagsasakripisyo sa mga idolo--- An mga Lamanita nagpoon sa pag-atake sa mga Nephita sa atubangan ninda.

*******

Asin ngonian ini nangyaring naglipas na sa ikatulong gatos asin saisiyenta asin tulong taon an mga Nephita nag-atake kairiba an saindang armada sa pakipaglaban kontra sa mga Lamanita, sa luwas nin kadagaan nin Kalipungawan.
2 Asin ini nangyaring naglipas na an armada kan mga Nephita nag-aratras giraray pabalik sa kadagaan nin Kalipungawan. Asin habang sinda paragal na, sarong bagong armada kan mga Lamanita an nag-atake sainda; asin sinda nagkaigwa nin makangirhat na ralabanan, na tanganin baya an mga Lamanita naagaw an siyudad nin Kalipungawan, asin nakagadan nin kadakul na mga Nephita, asin nakadakop nin kadakul na mga prisonero.
3 Asin an tada nakadurulag asin nag-ayon sa mga nag-eerok sa siyudad nin Teancum. Ngonian an siyudad nin Teancum napamugtak sa mga kasagkoran harani sa baybayon; asin idto harani man sa siyudad nin Kalipungawan.
4 Asin idto nangyari nin huli ta an mga armada kan mga Nephita nag-atake sa mga Lamanita na tanganing sinda nagpopoon na magkaparahamak; nin huli ta kun bako kaidto, an mga Lamanita dae kuta na nagkaigwa nin kapangyarihan na mangingibabaw sainda.
5 Pero hilnga, an mga paghuhukom nin Diyos mangingibabaw sa maririgsok; asin sa paagi kan maririgsok an mga marigsok pinagpapadusahan; nin huli ta an maririgsok an nag-aagda sa mga puso nin mga kaarakian nin mga tawo sa pagpapabulos nin dugo.
6 Asin ini nagyaring naglipas na an mga Lamanita naghimo nin mga preparasyon tanganing mag-abot kontra sa siyudad nin Teancum.
7 Asin ini nangyaring naglipas na sa ikatulong gatos asin saisiyenta asin apat na taon an mga Lamanita nag-abot kontra sa siyudad nin Teancum, na tangani saindang makuang makaputan man an siyudad nin Teancum.
8 Asin ini nangyaring naglipas na sinda napugulan asin napa-atras kan mga Nephita. Asin kan an mga Nephita nahiling na saindang napa-atras an mga Lamanita sinda giraray naghambog kan saindang sadireng kusog; asin sinda nag-atake sa sadire nindang kakusugan, asin pinagkuang makaputan giraray an siyudad nin Kalipungawan.
9 Asin ngonian an gabos kaining mga bagay pinaggiribo, asin nagkaigwa nin rinibong nagkagaradan sa magkaparehong lado, pareho sa mga Nephita asin mga Lamanita.
10 Asin ini nangyaring naglipas na sa ikatulong gatos asin saisiyenta asin anom na taon an nakaagi na, asin an mga Lamanita nag-abot giraray sa mga Nephita sa pakikipaglabanan; asin alagad an mga Nephita dae nagsorolsol sa mga karaotan na saindong naginibohan, pero persistido sa saindang padagos na karigsokan.
11 Asin ini imposible para sa dila na maisabi, o para sa tawo na maisurat sa sarong perpektong deskripsiyon kan makatakot na eksena kan madugo asin kadestrosohan na nag-abot sa pag-iriba nin mga katawohan, pareho sa mga Nephita asin sa Lamanita; asin an lambang puso pinagpatagas, na tanganing sinda nagka-orogma sa padagos na pagpapabulos nin dugo.
12 Asin dae nanggad nagkaigwa nin arog kadakulaon na karigsokan sa pag-iriba kan gabos na kaarakian ni Lehi, ni magin sa pag-iriba kan bilog na harong nin Israel, sabi sa mga tataramon nin Kagurangnan, na arog sa pangyayari sa pag-iriba kaining mga katawohan.
13 Asin ini nangyaring naglipas na an mga Lamanita nakuang makaputan an siyudad nin Kalipungawan, asin ini nin huli kan saindang bilang na nagsobra pa sa bilang kan mga Nephita.
14 Asin sinda nagmartsa man paabante kontra sa siyudad nin Teancum, asin napahale an mga nag-eerok paluwas kaini, asin nakadakop nin kadakul na mga prisonero parehong mga kababaehan asin mga kaarakian, asin pinag-aatang sinda bilang mga sakripisyo sa saindang ini-idolong mga diyos-diyosan.
15 Asin ini nangyaring naglipas na sa ikatulong gatos asin saisiyenta asin pitong taon, an mga Nephita nagka-aranggot nin huli sa mga Lamanita na nagsakripisyo kan saindang mga kababaehan asin kan saindang mga kaarakian, na tangani baya sinda nag-atake kontra sa mga Lamanita na may grabeng gayo an kaanggutan, na tanganing saindang nagkadaraog giraray an mga Lamanita, asin napa-atras sinda paluwas sa saindang mga kadagaan.
16 Asin an mga Lamanita dae na naka-atake pa giraray kontra sa mga Nephita hanggan sa ikatulong gatos asin sitenta asin limang taon.
17 Asin sa taon na ini sinda nag-atake kontra sa mga Nephita na may bilog na saindang puwersa; asin sinda dae mabibilang nin huli sa kadakulan kan saindang numero.
18 Asin magpoon sa panahon na ini padagos an mga Nephita dae nakagana nin kapangyarihan na mangingibabaw sa mga Lamanita, pero nagpopoon na magkaparadpad paharayo sa paagi ninda na arog baga nin sarong ambon sa atubangan nin saldang.
19 Asin ini nangyaring naglipas na an mga Lamanita nag-abot kontra sa siyudad nin Kalipungawan; asin nagkaigwa nin grabe na gayong mainit na ralabanan na nangyari sa daga nin Kalipungawan, na kun saen saindang nadaog an mga Nephita.
20 Asin sinda nagdurulag gikan sa atubangan ninda, asin sinda nakaabot sa siyudad nin Boaz; asin duman sinda nagtitindog kontra sa mga Lamanita na igwa nin grabeng kaisogan; na tangani baya na an mga Lamanita dae nakadaog sainda hanggan sinda nag-atake giraray sa ikaduwang pagkakataon.
21 Asin kan sinda nag-abot sa ikaduwang pagkakataon, an mga Nephita napadurulag asin nagkagaradan na may grabeng dakulaon na kagadanan; an saindang mga kababaehan asin an saindang mga kaarakian giraray pinagsakripisyo sa mga idolo.
22 Asin ini nangyaring naglipas na an mga Nephita nagdurulag giraray gikan sa atubangan ninda, dara-dara an bilog na mga kahimanwa na kairiba ninda, pareho sa mga banwaan asin mga kabalangayan.
23 Asin ngonian ako, si Mormon, nasaksihan na an mga Lamanita madalion nang maaagaw an kadagaan, kun kaya ako nagduman sa burobukid nin Shim, asin pinagdara an gabos na mga rekord na si Ammaron an nagtago para sa Kagurangnan.