<$BlogRSDUrl$>

Monday, July 03, 2006

MORMON TSAPTER 5 

Si Mormon giraray an namayo sa mga armada kan mga Nephita sa madugong pakikipaglabanan asin karadasan--- An Libro ni Mormon magluluwas tanganing kumbinsihon an bilog nin Israel na si Jesus iyo an Cristo--- An mga Lamanita iyo an magigin maitom, maaati, asin mariringgis na mga katawohan--- Sinda an magreresibe kan ebanghelyo gikan sa mga Hentil sa mga huring aldaw.

*******

Asin ini nangyaring naglipas na ako nagpaduman sa mga Nephita, asin nagsolsol sa sinumpaan na sakuyang hinimo na ako dae na nanggad matabang sainda; asin saindang pinagtao giraray sakuya an pagpapamahala kan saindang armada, nin huli ta saindang pinaghiling ao na garo baga iyo an makakapagligtas sainda gikan sa saindang mga kasakitan.
2 Pero hilnga, ako mayo nin paglaom; nin huli ta ako nakakaaram sa mga paghuhukom nin Kagurangnan na dapat na mag-aabot sa sainda; nin huli ta sinda dae nagsosorolsol kan saindang mga kadaendatahan, pero naghihingoha para sa saindang mga buhay na dae nag-aapod sa Kaglalang na iyo an naglalang sainda.
3 Asin ini nangyaring naglipas na an mga Lamanita nag-arabot kontra samuya habang kami padulag pasiringon sa siyudad nin Jordan; pero hilnga, sinda napa-atras pabalik na tanganing sinda dae pinagsakop an siyudad sa panahon na idto.
4 Asin ini nangyaring naglipas na sinda nag-arabot kontra samuya giraray, asin samuyang pinagmantine an siyudad. Asin igwa pa man nin ibang mga siyudad na pinagmamantine kan mga Nephita, na an mga kuta iyo an nakapagputol sainda na tanganing sinda dae makakalaog pasiring sa nasyon na nakalatag sa atubangan nyamo, na tanganing pagdedestrosohon an mga namamanwaan kan samuyang kadagaan.
5 Pero ini nangyaring naglipas na an arin man na mga kadagaan na samuyang pinag-aagihan, asin an mga namamanwaan duman na dae nagkakasararo, pinagdedestroso kan mga Lamanita, asin an saindang mga banwaan, asin mga baryo, asin mga siyudad pinagsusurulo nin kalayo; asin kaya sa ikatulong gatos asin sitenta asin siyam na taon an nakaagi na.
6 Asin ini nangyaring naglipas na sa ikatulong gatos asin otsentang taon an mga Lamanita nag-arabot giraray kontra samuya sa pakikipaglaban, asin kami nagtindog laban sainda sa kaisogan; pero idto gabos daeng kinamumugtakan, nin huli ta grabeng gayo kadakul an saindang bilang na tanganing saindang pinagtimak-timakan an mga katawohan kan mga Nephita sa irarom kan saindang mga bitis.
7 Asin ini nangyaring naglipas na kami giraray nagralakaw, asin an iba na an pagralakaw mas mabilison kesa sa mga Lamanita naka-eskapo, asin an iba na an pagraralakaw bakong sobra sa mga Lamanita sa pagralakaw pinaghuyupan pababa asin nagkaderestroso.
8 Asin ngonian hilnga, ako, si Mormon , dae nagmawot na pagtarabunan an mga kalag kan mga tawo na ipaghaya sa atubangan ninda an arog kaining makangorongirhat na madugong eksena asin karadasan na nakatambad sa atubangan kan sakuyang mga mata; pero ako, na nakakaaram sa mga bagay na ini seguradong himoon na maipagpabantog, asin na an gabos na mga bagay na nagkatarago kaipuhan na maipagpahayag sa bubungan kan mga harong---
9 Asin man na an sarong kaaraman kaining mga bagay kaipuhan na makaabot sa katadaan kaining mga katawohan, asin man sa mga Hentil, na an Kagurangnan iyo an nagsabi na magpapawaratak-watak kaining mga katawohan, asin ining mga katawohan magigin kabale bilang mayo na sa kairibahan ninda--- kun kaya ako nagsurat nin sarong kadikit na kasaysayang halipot, maigot na dae makapagtao nin sarong bilog na kasaysayan kan mga bagay na sakuyang nasaksihan, nin huli sa kasugoan na sakuyang naresibe, asin man na kamo dae magkakaigwa nin dakulaon na pagkamundo nin huli kan karigsokan kaining mga katawohan.
10 Asin ngonian hilnga, ini sakuyang pinag-estorya sa saindang mga banhi, asin man sa mga Hentil na igwang pagpangataman para sa harong nin Israel, na nakarealisar asin nakakaaram kun saen an saindang mga biyaya naggikan.
11 Nin huli ta ako nakakaaram na an arog kaini makakapagmundo sa kalamidad kan harong nin Israel; iyo, sinda magkakamurundo nin huli sa kapahamakan kaining mga katawohan; sinda magkakamurundo na ining mga katawohan dae nagsorolsol na tanganing sinda puwede kuta nang magkakakurugos sa mga takyag ni Jesus.
12 Ngonian ining mga bagay pinagsurat para sa katadaan kan harong nin Jacob; asin sinda pinagsurat sa arog kaining manera, nin huli ta ini naaaraman kan Diyos na an karigsokan dae makakapagdara sainda paduman sa sainda; asin sinda pagtatagoon para sa Kagurangnan na tanganing sinda magruluwas sa saiyang sadireng panahon.
13 Asin iyo ini an kasugoan na sakuyang naresibe; asin hilnga, sinda magruruluwas na uyon sa kasugoan nin Kagurangnan sa panahon na saiyang mahihiling na tama, sa saiyang kadunungan.
14 Asin hilnga, sinda magduduman sa mga daeng pagtutubod na mga Hudiyo; asin nin huli kaining katuyuhan sinda mapapaduman--- na tangani baya sinda puwedeng mapatubod na si Jesus iyo an Cristo, an Ake kan nabubuhay na Diyos; na tanganing an Ama maipaluwas, sa paagi kan saiya na gayong mas na kinamumutan, an saiyang dakulaon asin daeng kasagkorang katuyuhan, sa pagbabalik-giraray nin mga Hudiyo, o kan bilog na harong nin Israel, pasiring sa kadagaan na saindang kamanahan, na an Kagurangnan saindang Diyos iyo an nagtao sainda, sa pag-utob kan saiyang pinagtipanan.
15 Asin man na an banhi kan saiyang mga katawohan puwedeng bilog na magtutubod kan saiyang ebanghelyo, na mag-aabot sa sainda gikan sa mga Hentil; nin huli ta an mga katawohang ini magkakawaratak-watak, asin magigin sarong maitomon, maation, asin sarong mariringgis na mga katawohan, na sobra pa an deskripsiyon sa sainda na enot pang mga kairiba ta, iyo, magin sainda na yaraon sa pag-iriba kan mga Lamanita, asin ini nin huli kan saindang daeng pagtubod asin idolatriya.
16 Nin huli ta hilnga, an Espiritu nin Kagurangnan nag-untok nang gayo sa paki-iba sa saindang mga ama; asin sinda mayong Cristo asin Diyos sa kinaban; asin sinda pinagrurulupad na garong ata sa atubangan nin paros.
17 Sinda kaidto sarong magagayon na mga katawohan, asin sinda yaon ki Cristo bilang saindang pastor; iyo, sinda pinagpangenotan magin kan Diyos an Ama.
18 Pero ngonian, hilnga, sinda pinagpapangenotan ni Satanas, na arog sa ata na pinagrulupad-lupad sa atubangan nin paros, o arog sa sarong barko na pinagkakawatan kan mga alon, na mayong layag o angkla, o mayo nin anuman na bagay na magagamit para sa pagtimon saiya; asin sana kaiyan siya, iyo man baya sinda.
19 Asin hilnga, an Kagurangnan iyo an nagreserba kan saindang mga bendisyon, na sainda kuta nang maresibe sa kadagaan, para sa mga Hentil na iyo an magsasadire kan kadagaan.
20 Pero hilnga, ini mangyayaring malipas na sinda pahaharaleon asin pagwawaratak-watakon kan mga Hentil; asin pagkatapos na sinda pinagpaharale asin pinagwaratak-watak kan mga Hentil, hilnga, saka na an Kagurangnan makapaggiromdom sa tipan na saiyang hinimo ki Abraham asin sa bilog na harong nin Israel.
21 Asin man an Kagurangnan makakagiromdom sa mga pangadyeon kan mga matatanos, na pinagpaabot saiya para sainda.
22 Asin pagkatapos, O kamong mga Hentil, paano daw kamo makakapagtindog sa atubangan nin kapangyarihan nin Diyos, laen lang kun kamo magsosorolsol asin magbago gikan sa saindong mga mararaot na dalan?
23 Nakakaaram daw kamo na kamo yaon sa mga kamot nin Diyos? Nakakaaram daw kamo na siya igwa kan gabos na kapangyarihan, asin sa saiyang pusog na kasugoan an kinaban bilog na lulukuton siring sa sarong eskrulyo?
24 Kun kaya, magsorolsol kamo, asin magpakumbaba sa atubangan niya, baka siya mag-abot na may hustisya laban saindo--- baka an sarong katadaan na banhi ni Jacob mag-aabot sa pag-iriba nindo bilang sarong lion, asin girision kamong magkapere-peredaso, asin mayong mailigtas.

Comments: Post a Comment

This page is powered by Blogger. Isn't yours?