<$BlogRSDUrl$>

Monday, July 03, 2006

MORMON TSAPTER 6 

An mga Nephita nagkatiripon-tipon sa kadagaan nin Cumorah para sa pinaka-ultimong pakikipaglaban--- Si Mormon an nagtago kan mga banal na rekord sa burobukid nin Cumorah--- An mga Lamanita iyo an nanggana, asin an nasyon kan Nephita nadestroso--- Ginatos na ribo an nagkagaradan sa espada.

*******

Asin ngonian ako matapos kan sakuyang talaan manungod sa kapahamakan kan sakuyang mga katawohan, an mga Nephita. Asin ini nangyaring naglipas na kami nagmartsa pasiring sa atubangan kan mga Lamanita.
2 Asin ako, si Mormon, nagsurat nin sarong surat sa hade kan mga Lamanita, asin naghagad saiya na tugutan niyang kami na samuyang magkakatiripon-tipon na magkakasararo an samuyang mga katawohan sa kadagaan nin Cumorah, sa may burobukid na pinag-apud na Cumorah, asin duman kami makapagtao sainda nin pakikipaglabanan.
3 Asin ini nangyaring naglipas na an hade kan mga Lamanita nagtugot sa sakuya kan bagay na sakuyang pinagmawot.
4 Asin ini nangyaring naglipas na kami nanggad nagmartsa pasiring sa kadagaan nin Cumorah, asin kami nagtugdok kan samuyang mga tolda sa palibot kan burobukid nin Cumorah; asin idto yaon sa sarong kadagaan nin kadakul na mga katubigan, mga salog, asin mga kabubunan; asin digde kami nagkaigwa nin paglaom na makaguno nin bentahe sa mga Lamanita.
5 Asin sa panahon kan ikatulong gatos asin otsenta asin apat na taon an nakaagi na, samuyang pinagtiripon an bilog na katadaan kan samuyang mga katawohan sa kadagaan nin Cumorah.
6 Asin ini nangyaring naglipas na sa panahon na samuyang napagtiripon na an gabos nyamong mga katawohan na magkasararo sa kadagaan nin Cumorah, hilnga, ako, si Mormon, nagpoon na magin gurang na; asin sa kaaraman na iyo ini an pinakahuring pakikipaglabanan kan sakuyang mga katawohan, asin ta ako pinagsugo nin Kagurangnan na dae ko itugot na an mga rekord na pinagpamana kan samuyang mga ama, na mga sagrado, na mapaduman sa mga kamot kan mga Lamanita, (nin huli ta an mga Lamanita iyo an magdedestroso sa mga ini), asin pinagtago sa burobukid nin Cumorah an bilog na mga talaan na ipinagkatiwala sa sakuya sa paagi kan kamot nin Kagurangnan, laen lang kaining mga kadikit na mga lamina na sakuyang pinagtao sa sakuyang akeng lalake na si Moroni.
7 Asin ini nangyaring naglipas na an sakuyang mga katawohan, kairiba an saindang mga agom na babae asin an saindang mga kaarakian, ngonian nahiling an armada kan mga Lamanita na nagmamartsa pasiring sainda; asin sa makangorongirhat na katakutan sa kagadanan na nagpano sa mga daghan kan gabos na mga maririgsok, sinda naghaharalat na akoon ninda.
8 Asin ini nangyaring naglipas na sinda nag-arabot sa pakikipaglaban kontra samuya, asin an lambang kalag napano nin pagkatakot nin huli sa kadakulaan kan saindang bilang.
9 Asin ini nangyaring naglipas na sinda nag-atake sa sakuyang mga katawohan sa paagi nin espada, asin nin bugso, asin pana, asin pin pamatok, asin nin gabos na manera nin armas na panggiyera.
10 Asin ini nangyaring naglipas na an sakuyang mga tawo nagkagurupo, iyo, magin an sakuyang sampulong ribo na pag-iriba ko, asin ako natumbang nakagadan sa katahawan; asin sinda naglampas sakuya na tanganing dae ninda pinagtapos an sakuyang buhay.
11 Asin kan sinda nagtapos na asin pinagdaog an gabos kong mga katawohan laen lang sa biyente asin apat samuya, (kairiba sa sainda iyo an sakuyang akeng lalake na si Moroni) asin kami na nakaligtas sa kagadanan kan samuyang mga katawohan, nakahiling kinaagahan, kan an mga Lamanita nagbaralik na sa saindang mga kampo, gikan sa ibabaw kan burobukid Cumorah, an sampulong rinibo kan sakuyang mga katawohan na naradas na, na pinapamayuhan na mangenotan kaiba ko.
12 Asin samuyang nahiling man sa sampulong rinibo kan sakuyang mga katawohan na pinapamayuhan kan sakuyang akeng lalake na si Moroni.
13 Asin hilnga, an sampulong rinibo ni Gidgiddonah nagkaparahamak asin siya man sa katahawan.
14 Asin si Lamah napahamak kairiba an saiyang sampulong rinibo; asin an Gilgal napahamak kairiba an saiyang sampulong rinibo; asin an Limhah napahamak kairiba an saiyang sampulong rinibo; asin an Cumenihah, asin Moronihah, asin Antionum, asin Shiblom, asin Shem, asin Josh, nagkaparahamak kairiba kan saindang lambang sampulong rinibo.
15 Asin ini nangyaring naglipas na nagkaigwa pa nin sampulo pang iba na nagkaparahamak sa paagi nin espada, kairiba an saindang lambang sampulong rinibo; iyo, magin an gabos kong mga katawohan, laen lang idtong biyente asin apat na kairiba ko, asin man sa sarong kadikit na naka-eskapo pasiring sa mga nasyon kan katimugan, asin an sarong kadikit na nagbaralyo sa mga Lamanita, an nagkaparahamak; asin an saindang mga laman, asin mga tulang, asin dugo na nagkalat sa lalawgon nin daga, na pinagbarayaan kan mga kamot ninda na nanggadan sainda tanganing magtunaw sa daga, asin maglapa asin magbalik sa saindang inang daga.
16 Asin an sakuyang kalag nagsapo nin kasakitan, nin huli sa pagkagadan kan sakuyang mga katawohan, asin ako nagkurahaw:
17 O Kamong mga kaaya-aya, paano daw kamo napatalik-ad gikan sa mga dalan nin Kagurangnan! O Kamong mga kaaya-aya, paano daw kamo nagsikwal ki Jesus, na nagtitindog na may bukas na mga takyag sa pagresibe saindo!
18 Hilnga, kun kamo dae naggibo kaini, kamo dae kuta na nagkaparahamak. Pero hilnga, kamo napahamak, asin ako nagmumundo sa saindong pagkawara.
19 O kamong mga kaaya-ayang akeng lalake asin akeng babae, kamong mga ama asin mga ina, kamong mga agom na lalake asin mga agom na mga babae, kamong mga kaaya-aya, paano daw ini ta kamo baya napahamak!
20 Pero hilnga, kamo nagkaparara, asin an sakuyang mga kamondoan dae na makapagpabalik saindo.
21 Asin an aldaw hidaling mag-aabot na an saindong kamugtakang mortal kaipong magin immortalidad, asin ining mga hawak na ngonian nagtutunaw sa kalapaan kaipong magin daeng kalapaan na mga hawak; asin pagkatapos kamo kaipong magtindog sa atubangan kan tukawan nin paghuhukom ni Cristo, tanganing paghuhukuman uyon sa saindong mga nagkaginibohan; asin kun ini magin iyo na kamo matanos, kamo pagbebendisyunan kan saindong mga ama na nagka-erenot na sa saindo.
22 O na kamo kuta na nagsorolsol na bago pa man ining dakulaon na pagkapahamak mag-abot sa saindo. Pero hilnga, kamo nagkawarara na, asin an Ama, iyo, an Eternal na Ama nin langit, nakakaaram kan saindong kamugtakan; asin siya maggigibo saindo na uyon sa saiyang hustisya asin pagkaherak.

Comments: Post a Comment

This page is powered by Blogger. Isn't yours?