An Libro Ni Mormon (An Saro Pang Tipan Ni Jesucristo)

An pagbubunyag nin umboy sarong maraot na abominasyon--- An mga saradit na mga kaarakian buhay ki Cristo nin huli kan saiyang pagbabayad-sala--- Pagtubod, pagsosolsol, kabootan asin kapakumbabaan nin puso, nagreresibe kan Bana na Espiritu, asin an pagpakatatag sagkod sa katapusan magdadara sa kaligtasan.

*******

Sarong surat kan sakuyang ama na si Mormon, pinagsurat para sa sakuya, si Moronil; asin ini pinagsurat sa sakuya sa dae pa naghaloy pagkatapos na ako pinag-apudan sa ministeryo. Asin sa arog kaining paagi siya nagsurat sa sakuya, na nagsasabi:
2 Sakuyang namumutan na ake, Moroni, ako naogmang gayo na an saimong Kagurangnan na si JesuCristo nagin mapagmangno sa saimo, asin nag-apod saimo sa saiyang ministeryo, asin sa saiyang banal na gibo.
3 Ako nagin mapagmangno pirme saimo sa sakuyang mga pangadyeon, padagos na nagpapangadye sa Diyos an Ama sa pangaran kan saiyang Banal na Ake, si Jesus, na tanganing siya, sa paagi kan saiyang daeng kasagkoran na karahayan asin grasya, magbabantay saimo sa paagi nin katatagan nin pagtubod sa saiyang pangaran sagkod sa katapusan.
4 Asin ngonian, ake ko, ako nagtataram sa saimo mapanungod sa bagay na nakapagpamundo sakuya nin grabeng gayo; nin huli ta ini nagpapamundo sakuya na nagkaigwa nin mga pag-iiriwal-iwal na nangyayari sa pag-iriba nindo.
5 Nin huli ta, kun sakuyang naaraman an katotohanan, na nagkaigwa na nin mga pag-iiriwal-iwal sa pag-iriba nindo mapanungod sa pagpapabunyag kan saindong mga saradit na kaarakian.
6 Asin ngonian, ake ko, ako nagmamawot na ika magmaigot sa pagtrabaho, na ining dakulaon na kamalean dapat na mahale gikan sa pag-iriba nindo; nin huli ta, sa arog kaining katuyuhan ako nagsurat kaining surat.
7 Nin huli ta sa hidaling paagi pagkatapos na sakuyang nagka-araraman an mga bagay na ini gikan saindo ako naghapot sa Kagurangnan mapanungod kaining bagay. Asin an tataramon nin Kagurangnan nag-abot sakuya sa paagi nin kapangyarihan kan Banal na Espiritu, na nagsasabi:
8 Magdangog sa mga tataramon ni Cristo, an saindong Paratubos, an saindong Kagurangnan asin an saindong Diyos. Hilnga, ako nagpadigde sa kinaban bako na pag-aapudon ko an mga matatanos kundi an mga parakasala na magsorolsol; an marhay dae nangangaipo nin doktor, kundi sinda na igwang kasakitan; kun baya, an mga saradit na kaarakian bilog, nin huli ta sinda daeng kakayahan na makakakomiter nin kasalan; kun baya an sumpa ni Adan pinagkua gikan sainda sa sakuya, na ini mayong kapangyarihan na mangingibabaw sa sainda; asin an ley nin pagtuturi pinaghale na sa sakuya.
9 Asin sa arog kaining manera na an Banal na Espiritu nagpatotoo sa tataramon nin Diyos sa sakuya; kun baya, sakong namumutan na ake, ako nakakaaram na ini sarong banal na pagtutuya-tuya sa atubangan nin Diyos, na kamo dapat na magbubunyag nin saradit na mga kaarakian.
10 Hilnga ako nagsasabi sa saindo na an bagay na ini saindong ipagtukdo--- pagsosolsol asin pagbubunyag sa sainda na igwa na nin pananagutan asin kapable nang makagibo nin kasalan; iyo, tukdoan an mga magurang na sinda dapat na magsorolsol asin magpabunyag, asin magpakumbaba kan saindang mga sadire arog kan saindang mga saradit na kaarakian, asin sinda gabos magigin ligtas na kairiba an saindong saradit na kaarakian.
11 Asin an saindang saradit na kaarakian dae na nangangaipong magsolsol, ni mabunyagan. Hilnga, an magpabunyag iyo an pasiring sa pagsosolsol sa pag-utob kan mga kasugoan sagkod sa kapatawadan nin mga kasalan.
12 Pero an saradit na mga kaarakian buruhay ki Cristo, magin magpoon pa sa pundasyon kan kinaban; ta kun bako, an Diyos sarong Diyos na may pigkikilingan, asin man sarong nagbabagong Diyos; asin sarong may pinalabing mga tawo; nin huyli ta gurano kadakul an saradit na mga kaarakian an nagkagaradan na na mayong pagbubunyag!
13 Kun baya, kun an saradit na mga kaarakian dae maliligtas kun mayong pagbubunyag, an mga ini kuta napaduman na sa daeng katapusan na impiyerno.
14 Hilnga ako nagsasabi sa saimo, na siya na naghuhuna-huna na an saradit na mga kaarakian nangangaipong pabubunyagan yaon sa sukdulan nin kapaitan asin yaon sa pagkakagapos nin kadaendatahan; nin huli ta siya igwa nin arin na pagtubod, paglaom, asin pagkamoot sa kapwa; kun baya dapat ba siyang ipagsikwal na sa kaisipan, siya na dapat na magpasiring paibaba sa impiyerno.
15 Nin huli ta makangorongirhat an karigsokan na maghuhuna-huna na an Diyos nagliligtas nin sarong ake nin huli ta siya mayong pagbubunyag, asin an iba man dapat na mawara nin huli ta siya mayong pagbubunyag.
16 Herak man sinda na magsusuhay sa mga dalan nin Kagurangnan sa arog kaining manera, nin huli ta sinda mapapara laen lang kun sinda magsosolsol. Hilnga, ako nagtataram na may kakusgan, na igwang autoridad gikan sa Diyos; asin ako dae natatakot kun ano an magigibo nin tawo; nin huli ta an perpektong pagkamoot nagpapahale nin gabos na katakutan.
17 Asin ako pano nin pagkamoot sa kapwa, na iyo an daeng katapusan na pagkamoot; kun baya, an gabos na mga kaarakian siring sa sakuya; kun baya, ako namumuot sa saradit na mga kaarakian na igwa nin perpektong pagkamoot asin sinda gabos pare-pareho asin kaparte sa kaligtasan.
18 Nin huli ta ako nakakaaram na an Diyos bakong sarong Diyos na may kinikilingan, ni sarong may pagbabagong nilalang; kundi siya iyo an daeng pagbabago magpoon pa sa gabos na daeng kasagkoran hanggan sa gabos na daeng kasagkoran.
19 An saradit na mga kaarakian dae makakapagsosolsol; kun baya, ini sarong makangorongirhat na karigsokan na ipagsisikwal an tunay na mga pagkaherak nin Diyos sa sainda, nin huli ta gabos buhay sa saiya nin huli kan saiyang pagkaherak.
20 Asin siya na nagsasabi na an saradit na kaarakian kaipong mabunyagan nagsisikwal sa mga pagkaherak ni Cristo, asin pinagpamugtak sa mayo an pagbabayad-sala niya asin an kapangyarihan kan saiyang pagtutubos.
21 Herak man sa mga arog kaini, nin huli ta sinda napapamugtak sa kagadanan, impiyerno, asin sa sarong daeng katapusan na pagpapasakit. Ako nagtataram kaini na may kakusgan; an Diyos an nagsugo sakuya. Magdangog ka sainda asin magsunod, o sinda magtitindog kontra saimo sa tukawan nin paghuhukom ni Cristo.
22 Nin huli ta hilnga, an gabos na mga kaarakian buhay ki Crsito, asin man gabos sinda na namumuhay na mayong ley. Nin huli ta an kapangyarihan nin pagtutubos minaabot sa gabos ninda na mayong ley; kun baya, siya na bakong pinagkondensa, o siya na dae nasasakupan nin kondenasyon, dae makakapagsolsol; asin sa arog na pagpapabunyag mayong nakakamit---
23 Pero ini sarong katuyawan sa atubangan nin Diyos, paninikwal sa mga pagkaherak ni Cristo, asin sa kapangyarihan kan saiyang Espiritu Santo, asin pagpapamugtak nin tiwala sa mga gadan na gibo.
24 Hilnga, ake ko, an bagay na ini dae dapat na mangyari; nin huli ta an pagsosolsol para sainda na sakop sa kondenasyon asin sakop sa sumpa nin sarong paglapas sa ley.
25 Asin an enot na mga bunga nin pagsosolsol iyo an pagbubunyag; asin an pagpapabunyag minaabot sa paagi nin pagtubod sagkod sa pag-utob sa mga kasugoan; asin an pag-uutob sa mga kasugoan nagdadara sa kapatawaran nin mga kasalan.
26 Asin an kapatawaran kan mga kasalan nagdadara nin kabootan, asin kapakumbabaan nin puso; asin nin huli sa kabootan asin kapakumbabaan nin puso minaabot an pagdalaw kan Banal na Espiritu, na iyo an Tagaranga na nagpapano nin paglaom asin perpektong pagkamoot, na an pagkamoot na ini minatagal sa paagi nin pagmamaigot sa pagpapangadye, sagkod na an katapusan mag-aabot, sa panahon na an gabos na mga banal mag-eerok na kaiba an Diyos.
27 Hilnga, ake ko, ako magsusurat giraray saimo kun ako dae pa magpaduman sa dae mahaloy na panahon tanganing makilaban kontra sa mga Lamanita. Hilnga, an kapaabaw-abawan kaining nasyon, o an mga katawohan kan mga Nephita, iyo an nagpapatunay kan saindang kapahamakan laen lang kun sinda magsosolsol.
28 Magpangadye ka para sainda, ake ko, na tanganing an pagsosolsol mag-abot sa sainda. Pero hilnga, ako natatakot na baka an Espiritu mag-uuntok nang makiki-iba sa sainda; asin sa parteng ini nin kadagaan sinda man nagmamawot na ibagsak an gabos na kapangyarihan asin autoridad na maggigikan sa Diyos; asin saindang pinagsisikwal an Banal na Espiritu.
29 Asin pagkatapos kan paninikwal sa dakulaon na kaaraman, ake ko, sinda mapapara sa madaling panahon, sa pagkautob kan mga propesiya na pinagtaram na kan mga propeta, asin man an mga tataramon kan satuyang Paraligtas mismo.
30 Paaram, ake ko, hanggan sa ako makapagsurat pa, o saimo, o sa pagkahirilingan ta giraray. Amen.