An Libro Ni Mormon (An Saro Pang Tipan Ni Jesucristo)

An ikaduwang surat ni Mormon sa saiyang akeng lalake na si Moroni.

Parehong an mga Nephita asin mga Lamanita nagpakabuhong asin nagpakamaraot--- Sinda nagparasakitan asin naggagaradanan sa lambang saro--- Si Mormon nagpangadye na an grasya asin karahayan mag-abot ki Moroni sagkod pa man.

*******

Sakuyang namumutan na ake, ako nagsurat saimo giraray na tanganing maaraman mo na buhay pa man ako; pero ako nagsurat kan mga bagay na mas grabe kangana.
2 Nin huli ta hilnga, ako nagkaigwa nin matindihong pakikipaglabanan sa mga Lamanita, na kun saen kami dae nakagana; asin si Archeantus nagadan na sa paagi nin espada, asin man si Luram asin Emron; iyo, asin kami nawaraan nin sarong dakulang bilang kan satuyang piling mga tauhan.
3 Asin ngonian hilnga, ake ko, ako natatakot na baka an mga Lamanita iyo an magdedestroso kaining mga katawohan; nin huli ta sinda dae nagsosorolsol, asin si Satanas iyo an nag-estira sainda nin padagos na mag-anggot sa lambang saro.
4 Hilnga, ako naghihingoha na padagos na kaiba ninda; asin kun ako magtataram nin tataramon nin Diyos na may katadungan sinda pinagpanguykuyan asin nagka-aranggot kontra sakuya; asin kun ako dae naggagamit nin katadungan saindang pinapatagas an saindang mga puso kontra sainda; kun baya, ako natatakot na baka an Espiritu nin Kagurangnan mag-uuntok nang makipag-ibahan sainda.
5 Nin huli ta grabeng gayo an pinag-anggot na garo baga sakuya na sinda daeng katakutan sa kagadanan; asin sinda nawaraan na kan saindang pagkamoot, sa lambang saro; asin sinda napapaha na nin dugo asin padagos na nagbabalos.
6 Asin ngonian, sakuyang namumutan na ake, maski na ngani kan saindang katagasan, kita dapat na maghingoha na may kahigosan; nin huli ta kita igwang sarong trabaho na gigibohon habang yaon sa tabernakulo nin dalipay, na tanganing satuyang madaog an kaiwal kan gabos na katanosan, asin ipagpahingalo an satuyang kalag sa kahadean nin Diyos.
7 Asin ngonian ako nagsusurat kan mga bagay mapanungod sa mga kasakitan kaining mga katawohan. Nin huli ta uyon sa kaaraman na sakuyang naresibe gikan ki Amaron, hilnga, an mga Lamanita igwa nin kadakul na mga prisonero, na saindang nagkadarakop sa torre nin Sheirrizah; asin igwa nin mga lalake, mga babae, asin kaarakian.
8 Asin an mga agom na lalake asin mga ama kaidtong mga kababaehan asin kaarakian saindang pinaggaradan; asin saindang pinagpapakakan sa mga kababaehan an laman kan saindang mga agom na lalake, asin an mga kaarakian sa laman kan saindang mga ama; asin mayong tubig, laen lang sa kakadikiton, na saindang pinagtatao sa sainda.
9 Asin maski na ngani na arog kaini kadakulaon an karumputan kan mga Lamanita, ini dae pa makalampas sa satuyang mga katawohan na yaon sa Moriantum. Nin huli ta, hilnga, kadakul an mga kadaragahan kan mga Lamanita na saindang nagkadarakop bilang mga prisonera; asin pagkatapos na pinagbawian ninda kan bagay na mas mahalaga asin presyosa labaw pa sa gabos na mga bagay, na iyo an malinig na kapurihan asin birtud---
10 Asin pagkatapos na ginibo ninda ining bagay, saindang pinaggagaradan sinda sa sarong grabeng gayo kabangis na manera, pinagpasakitan an saindang mga hawak magin sagkod sa kagadanan; asin pagkatapos na saindang ginibo na ini, saindang pinagkakarakan an saindang laman sa arog bagay sa sarong layas na mga hayop, nin huli sa katagasan kan saindang mga puso; asin saindaing ginibo ini bilang sarong regalo nin kaisogan.
11 O sakuyang namumutan na ake, paano daw sa mga tawong arog kaini, na garo baga mayong sibilisasyon---
12 (Asin sarong kadikit na mga taon an naglipas na, asin sinda nagin sarong sibil asin sarong magagayong mga katawohan).
13 Pero O ake ko, paano daw an sarong katawohan na arog kaimi, na an kaogmahan yaon sa sobrang karumputan---
14 Paano kita makakaasa na pupugulan nin Diyos an saiyang kamot sa paghuhukom kontra satuya?
15 Hilnga, an sakuyang puso nagkukurahaw: Herak man kaining mga katawohan. Magluwas ka sa paghuhukom O Diyos, asin tagoa an saindang mga kasalan, asin karigsokan, asin mga karumputan gikan sa atubangan kan saimong lalawgon!
16 Asin giraray, ake ko, igwa pa nin kadalkul na mga balo asin an saindang mga kadaragahan na nagkatarada sa Sherrizah; asin idtong parte kan mga kakanon na an mga Lamanita dae pa pinagdara, hilnga, an armada ni Zenephi iyo an nag-aragaw kaini, asin pinabayaan sindas na magkparalakaw sa maski saeng lugar na sinda makakua nin kakanono, asin kadakul na gurang nang mga kababaehan na pinanluyahan habang naglalakaw asin nagkagaradan.
17 Asin an armada na kairiba ko maruluya na; asin an mga armada kan mga Lamanita yaon sa katahawan nin Sherrizah asin kami; asin habang kadakul an nagdurulag pasiring sa armada ni Aaron nagkagaradan bilang mga biktima kan saindang makangorongirhat na brutalidad.
18 O an kabuhungan kan sakuyang mga katawohan! Sinda mayong patakaran asin mayong pagkaherak. Hilnga, ako saro sanang tawo, asin ako igwa nin kusog nin saro sanang tawo, asin ako dae na makapagpasunod kan sakuyang mga kasugoan.
19 Asin sinda nagin makusugon sa saindang kabalikoan; asin sinda arog sa sarong mabangis, mayong patawad, ni sa gurang man o sa hoben; asin sinda nag-oogma sa lambang bagay laen lang kan bagay na marhay; asin an kasakitan kan satuyang mga kababaehan asin kan satuyang kaarakian sa bilog na lalawgon kaining kadagaan nagsobra pa sa lambang bagay; iyo, an dila dae makapagsabi, ni ini maisusurat.
20 Asin ngonian, ake ko, ako dae na makapag-eerok pa sa arog kaining mangirhat na eksena. Hilnga, saimong naaaramang gayo an karigsokan kaining mga katawohan; saimong naaaramang gayo na sinda mayo nin prinsipyo, asin mga manhid; asin an saindang karigsokan nagsobra pa kesa sa mga Lamanita.
21 Hilnga, ake ko, ako dae makapagrekomenda sainda sa Diyos na baka saiya akong paghahampakon.
22 Pero hilnga, ake ko, ako nagrekomenda saimo sa Diyos, asin ako nagtitiwala ki Cristo na ika maliligtas; asin ako nagpangadye sa Diyos na saiyang paliligtason an saimong buhay, na tanganing magtestigo sa pagbabalik kan saiyang mga katawohan sa saiya, o kan saindang bilog na kapahamakan; nin huli ta ako nakakaaram na sinda dapat na magkaparara laen lang kun sinda nagsorolsol asin nagbaralik sa saiya.
23 Asin kun sinda mapapara ini magigin arog na pangyayari sa mga Jaredita, nin huli sa sobrang mga kamawotan kan saindang mga puso, naghahanap nin dugo asin pagbabalos.
24 Asin kun sinda mangyayaring magkaparara, kita nakakaaram na kadakul kan satuyang mga katugangan na nagbaralyo pasiring sa mga Lamanita, asin kadakul pang gusto na magbalyo sa sainda; kun baya, magsurat ka nin kadikit pang mga bagay, asin kun ika maligtas asin ako mapapara na asin dae ka na mahihiling; pero ako nagtitiwala na mahihiling ta ka pa sa madaling panahon; nin huli ta igwa akong sagradong mga talaan na sakuyang itatao sa saimo.
25 Ake ko, magi kan pano nin pagtubod ki Cristo; asin lugod bako ining mga bagay na sakuyang pinagsusurat an makapagkulog saimo, na tanganing panluyahan ka sagkod sa kagadanan; pero lugod si Cristo iyo an magpapa-itaas saimo, asin lugod an saiyang mga kasakitan asin kagadanan, asin an pagpapahiling kan saiyang hawak sa satuyang mga ama, asin an saiyang pagkaherak asin halawig na pagtitios, asin an paglaom kan saiyang kamurawayan asin daeng kasagkorang buhay, magdanay lugod sa saimong isip sagkod pa man.
26 Asin lugod an grasya nin Diyos an Ama, na an saiyang trono yaon sa kaitaasan nin mga langit, asin an satuyang Kagurangnan na si JesuCristo, na nagtutukaw sa toong kamot kan saiyang kapangyarihan, sagkod na an gabos na bagay magin sakop na sa saiya, mangyari, asin mag-antabay lugod sa saimo sagkod pa man. Amen.